گولوۆكين: مەن ءوز ەلىمدە باتىر ەمەسپىن
سۇقبات كەزىندە GGG باپكەرى ابەل سانچەس جايلى ويىمەن ءبولىسىپ، تانىمالدىلىققا قالاي قارايتىنىن ايتتى.
«سانچەس - كەرەمەت ادام. ءوز ءىسىنىڭ ناعىز شەبەرى. مەن وعان سەنەمىن. باستىسى - تىنباي ەڭبەك ەتۋ. جاتتىعۋعا بارىڭدى ارناۋ كەرەكسىڭ. نازارىڭ جاتتىعۋدا بولۋ كەرەك. سول كەزدە عانا چەمپيون بولاسىڭ. ەگەر جاتتىعۋعا نەمقۇرايلى قارايتىن بولسا، ەشتەڭەگە قول جەتكىزە المايسىڭ. ۋاقىتىڭ دا زايا كەتەدى.
مەنى الەمنىڭ ۇزدىك بوكسشىسى دەگەن تەڭەۋمەن كەلىسپەيمىن. ءار بوكسشى ءارتۇرلى. ءبىرىنىڭ ءستيلى باسقا، ءبىرىنىڭ تالانتى مىقتى، ءبىرىنىڭ مۇمكىندىكتەرى كوپ. سوندىقتان دا مەن الەمنىڭ ۇزدىك بوكسشىسىمىن دەپ ايتا المايمىن. ءيا، مۇحامەد ءالي - ۇلى بوكسشى. الايدا مەن ودان كەيىن ەكىنشى ورىندا دا تۇرعان جوقپىن. ءبىزدىڭ بارلىعىمىزدىڭ ەرەكشەلىكتەرىمىز بار. اۋىر سالماقتاعى بوكسشىلار - ءىرى دەنەلى، سوققىلارى اۋىر. جەڭىل سالماقتاعىلار - جىلدام. مەنى ەكىنشى قويعىڭىز كەلەدى مە؟ بۇل مەن ءۇشىن قىزىق ەمەس. مەن ءۇشىن P4P رەيتينگى دە ماڭىزدى ەمەس.
تانىمالدىلىق؟ ماعان ول دا قىزىق ەمەس. تانىمال بولعىم كەلمەيدى. جانە ول ماعان ەشقاشان اسەر دە ەتپەگەن. مەن بوكسشىمىن. ءيا، مەنى كوپشىلىك تانىپ جاتادى. دەيتۇرعانمەن ماعان «ول جۇلدىز»، «ول تانىمال» دەگەن اڭگىمەلەر اسەر ەتپەيدى. رينگتەن سىرتىندا مەن قاراپايىم اداممىن. جۇلدىز ەمەسپىن. مەن ءوز حالقىمنىڭ باتىرى دا ەمەسپىن. شىنىمەن. مەن ءۇشىن ول اسا ماڭىزدى ەمەس.
الۆارەسپەن وتەتىن جەكپە-جەك مەن ءۇشىن ماڭىزدى. «كانەلو» - ەرەكشە بوكسشىلاردىڭ ءبىرى. ءبىراق ول دا سۋپەرچەمپيون ەمەس. ءبىزدىڭ جەكپە-جەگىمىز بوكس ءۇشىن ۇلكەن وقيعا دەپ ويلايمىن. قايسىمىزدىڭ جەڭەتىنىمىز ماڭىزدى ەمەس. ول ما، الدە مەن بە؟ ءبىراق بۇل ەكەۋمىز ءۇشىن دە ۇلكەن جەڭىس بولايىن دەپ تۇر. كەيبىرەۋلەر بۇل جەكپە-جەكتە رەيتينگتىڭ، P4P كورسەتكىشىندەگى ورىن، مىقتى ەكەنى انىقتالادى دەپ ويلايدى. الايدا، باستىسى - جەڭىس»، - دەيدى گولوۆكين.
ەسكە سالايىق، گولوۆكين- الۆارەس جەكپە-جەگى 16- قىركۇيەكتە لاس-ۆەگاستاعى 20 مىڭ ادام سياتىن T- Mobile ارەناسىندا وتەدى.