جاڭا پرەزيدەنتتىڭ ءومىر جولى اركىمدى دە قىزىقتىرارى انىق. NUR. KZ پورتالى ءۇندى ەلىندە تومەنگى تاپ اراسىنان سايلانعان ەكىنشى پرەزيدەنت جايىندا قىزىقتى دەرەكتەردى نازارعا ۇسىنادى.
ءۇندىستاننىڭ جاڭادان سايلانعان پرەزيدەنتى ساياساتقا ەڭ العاش 1994-جىلى اياق باسقان. 1994-جىلدان 2006-جىلعا دەيىن ول ءۇندىستاندىق پارلامەنتتىڭ جوعارى پالاتاسىندا مۇشەلىكتە بولدى، ال 2015-2017-جىلدارى بيحار شتاتىنىڭ گۋبەرناتورى بولىپ قىزمەت ەتتى. رام ناتح كوۆيند ساياساتقا كەلمەي تۇرىپ، 16 جىل بويى دەلي سوتىندا، ودان سوڭ جوعارعى سوتتا زاڭگەر بولىپ قىزمەت ەتتى.
كوۆيند ءۇندىستاننىڭ ۋتتار پرادەش شتاتىندا دۇنيەگە كەلگەن. ول وتە كەدەي، كوپبالالى وتباسىنان شىققان. اكەسى شاعىن دۇكەن اشىپ سول تابىسىمەن بالالارىن باعىپتى. رام ناتح ءۇيىنىڭ ەڭ كەنجەسى. ونىڭ بەس اعاسى جانە ەكى اپكەسى بار. ول وتە لاس، قۇلاعالى تۇرعان لاشىقتا دۇنيە ەسىگىن اشىپتى. پرەزيدەنت اناسىنان نەبارى بەس جاسىندا ايىرىلعان. ول ساباننان جاسالعان باسپانالارى ورتەنگەندە كۇيىك شالىپ، قايتىس بولادى. كەيىن كوۆيند ول جەردى قاۋىمداستىققا سىيعا تارتىپتى.
باستاۋىش سىنىپتى بىتىرگەن سوڭ، رام ناتح كوۆيند وقۋىن كورشى اۋىلداعى مەكتەپتە جالعاستىرعان. التى شاقىرىم جەردە ورنالاسقان اۋىلعا وعان جاياۋ قاتىناۋعا تۋرا كەلگەن. كەيىن كانپۋر ۋنيۆەرسيتەتىنىڭ جانىنداعى كوللەدجدى كوممەرتسيا ماماندىعى بويىنشا ءتامامداعان.
پرەزيدەنت 1974-جىلى وتباسىن قۇردى. ءبىر ۇل، ءبىر قىزى بار.
كوۆيند - تومەنگى تاپتىڭ ىشىنەن ەل پرەزيدەنتى اتانعان ەكىنشى ادام. ونىڭ الدىندا، 1997-2002-جىلدار ارالىعىندا ءدال وسى كاستادان شىققان كوچەريل رامان نارايانان ەل باسقارعان بولاتىن.
يندۋيزم دىنىندە ەڭ تومەنگى كاستا وكىلدەرى ادەتتە ەڭ لاس، جاعىمسىز جۇمىستاردى اتقارادى. 1950-جىلى ءۇندىستاندا تاپتىق جۇيەدەن باس تارتتى. الايدا ءىس جۇزىندە قوعامدا ونىڭ لەبى ءالى ساقتالعان. كاستالىق سانا قازىرگى ءۇندىستاننىڭ باستى پروبلەمالارىنىڭ ءبىرى بولىپ قالا بەرەدى. ەلدە 200 ميلليوننان استام تومەنگى تاپ وكىلى بار. كوپتەگەن ساياساتكەرلەر مۇنداي تەڭسىزدىككە قارسى.