بەلسەندىلەردىڭ ۇسىنىسى بويىنشا، جانۋارلارعا ارنالعان اۋماقتى قورشاپ، ءۇي جانۋارلارعا سپورتتىق قيمىلداردى ۇيرەتەتىن سەكسيانى ۇيىمداستىرۋعا بولادى.
«استانادا يتتەردىڭ سانى جىلدان - جىلعا وسۋدە. سوعان بايلانىستى، يتتەر مەن مىسىقتاردى اسىراۋ ەرەجەلەرى جاسالدى جانە بۇل ەرەجەلەردى ساقتاۋ كەرەك. دەگەنمەن، ارنايى ەرەجەلەر شىعارىلسا دا، يتتەردى سەرۋەندەۋگە شىعاراتىن جانە ارنايى قيمىلداردى ۇيرەتەتىن الاڭدار جوق. ەگەر مۇنداي ورىندار بولىنبەيتىن بولسا، ماماندار بۇل يتتەردى ۇيرەتىپ، قوعامعا بەيىمدەي المايدى. ال ەگەر وسى اتالعان الاڭدار ۇيىمداستىرىلاتىن بولسا، وندا ءۇي جانۋارلارىن سپورتتىق سەكسيالار اشۋعا بولار ەدى»، - دەدى قازاقستاننىڭ كينولوگتار كەڭەسىنىڭ وكىلى الەكساندر بەلونەنكو.
ونىڭ ايتۋىنشا، بۇگىنگى كۇنى استانا قالاسىنىڭ ءيت وسىرۋشىلەر كلۋبىندا رەسمي تۇردە 1,5 مىڭ ءيت تىركەلگەنى. الايدا تىركەلمەگەن ءۇي جانۋارلارىنىڭ سانى دا كوپ. ءۇي جانۋارلارىنا ارنالعان ەرەجەدە «قالانىڭ ىشىندە يتتەردى قىسقا قارعىباۋعا بايلاپ، تۇمىلدىرىق كيگىزىپ سەرۋەندەتۋ كەرەك» دەپ انىق جازىلعان. سەرۋەندەۋ كەزىندە، جانۋار يەسى ءيتىنىڭ ارتىن جيناپ، مال دارىگەرلىك كۋالىگىن وزىمەن الىپ ءجۇرۋ كەرەك. ءۇي جانۋارلارىمەن بالالار الاڭىندا، سپورتتىق الاڭداردا، مەكتەپكى دەيىنگى بالالار اۋماعىندا، تىيىم سالىنعان جەرلەردە سەرۋەندەۋگە بولمايدى. يتتەردى قارعىباۋسىز جانە تۇمىلدىرىقسىز تەك قورشالعان جەرلەردە، ءۇي جانۋارلارىن ۇيرەتۋگە ارنالعان ورىنداردا سەرۋەندەتۋگە بولادى. الايدا، قالادا ءالى كۇنگە دەيىن جانۋارلارعا ارنالعان جەردى بولمەگەندىكتەن، جانۋار يەسىنە ايىپپۇل سالماي، ءبىرىنشى ۋاقىتتا ەسكەرتۋ عانا بەرىلەدى.
«استانالىقتاردىڭ وزدەرى بۇل ىسكە ءوز ۇلەسىن قوسۋعا دايىن. ەندى تەك جەردى ءبولىپ، وعان ءيت اسىراۋشىلاردىڭ قارجىسىن سالۋ عانا قالدى»، - دەدى ا. بەلونەنكو.
ونىڭ ايتۋىنشا، بۇرىن قالادا يتتەردى سەرۋەندەتۋگە ارنالعان جەر بولعان، الايدا كەيىنىرەك ول قىزمەتىن توقتاتىپ، ورنىنا تۇرعىن ۇيلەر سالىنىپ كەتكەن.
«استانا باسقا قالالارعا ۇلگى بولۋى ءتيىس. مىسالى، قاراعاندى قالاسىندا ءدال ورتالىق ساياباقتىڭ ورتاسىندا يتتەرگەن ارنالعان ورىن بار ەكەن. ول جەر قورشالعان جانە تولىقتاي قاۋىپسىز. ءبىز اقشا سۇراپ تۇرعان جوقپىز. بىزگە تەك جەر عانا كەرەك جانە ول جەردى مۇمكىندىگىنشە قورشاۋ كەرەك. ال ونى قالىپتاستىرۋ جۇمىستارىنىڭ بارلىعىن كلۋبتار ءوز موينىنا الادى»، - دەدى قازاقستاننىڭ كينولوگتار كەڭەسىنىڭ وكىلى الەكساندر بەلونەنكو.