قانات يسلام: برەندون كۋككە قارسى دايىندىقتى باستاپ كەتتىم

استانا. قازاقپارات - بەلگىلى قازاقستاندىق بوكسشى قانات يسلام الداعى جەكپە-جەگىنە بايلانىستى دايىندىعى تۋرالى ايتىپ بەردى، دەپ حابارلادى قازاقپارات ءتىلشىسى.

«استانادا الدىدا وتەتىن جەكپە-جەگىمدە كانادالىق بوكسشى برەندون كۋكپەن جۇدىرىقتاساتىن بولدىم. قارسىلاستىڭ وسالى بولمايدى. سوندىقتان دايىندىقتى بارىنشا كۇشەيتۋگە بەت بۇردىم. قازىرگى تاڭدا ايقاسقا دايىندىقتى باستاپ كەتتىم. ءساتىن سالسا، الاتاۋ بوكتەرىندە تامىزدىڭ ورتاسىنا دەيىن جاتتىعۋىمدى جالعاستىرامىن. ارى قاراي سوڭعى دايىندىقتى ەلوردا تورىندە وتكىزەمىن. بۇل ەل ەسىندە قالاتىن قىزىقتى كەزدەسۋ بولادى دەگەن ۇمىتتەمىن»، - دەپ اتاپ ءوتتى قانات يسلام.

ەستەرىڭىزگە سالا كەتەيىك، وسىعان دەيىن وتانداسىمىزدىڭ استانادا كىممەن جۇدىرىقتاساتىنى تۋرالى ايتقان بولاتىنبىز.

قانات يسلام 9- قىركۇيەكتە كانادالىق برەندون كۋكپەن جۇدىرىقتاسادى. 31 جاستاعى قارسىلاسى بۇگىنگە دەيىن كاسىپقوي بوكستا 18 جەكپە-جەك وتكىزىپ، بارلىعىندا جەڭىسكە جەتكەن. ونىڭ 11-ىندە جەكپە-جەكتى ۋاقىتىنان بۇرىن اياقتاعان. سوڭعى جەكپە-جەگىن ول وتانداسى ستيۆەن باتلەرگە قارسى وتكىزىپ، ۋاقىتىنان بۇرىن جەڭگەن.

ال قانات يسلام كاسىپقوي بوكستا 24 رەت ايقاسقا شىعىپ، بارلىعىندا جەڭىسكە قول جەتكىزدى. ونىڭ 19 ى مەرزىمىنەن بۇرىن اياقتالعان.

اۆتور: كۇنسۇلتان وتارباي