اقىن ايتىستاعى ءادىلقازىلاردىڭ جەرشىلدىگى مەن رۋشىلدىعىن اشكەرەلەدى
«ءبىراز جىل بۇرىن سەمەيدە جاستاردىڭ رەسپۋبليكالىق ايتىسى ءوتتى. ءبىز قازىلار القاسىندامىز. وڭتۇستىك وڭىردەن ءبىر جاس اقىن ەرەكشە كوزىمە ءتۇستى. فينالدا سول بالا مەنىڭ سەمەيلىك اقىن ىنىممەن ايتىستى. ءبىزدىڭ بالا ءجونسىز كەتتى. «كەشە كەلىپسىڭ، ماعان نەگە كەلىپ امانداسپادىڭ؟» دەدى، قوناق بالا «الىستان التى جاسار بالا كەلسە...» دەپ جاۋاپ بەرىپ ەدى، بىزدىكى «شاڭىراققا قارا» دەدى.
قوناق اقىن «باقا دا باتپاعىندا باتىر» دەدى. سولاي، سولاي بىزدىكى سوڭىنا دەيىن قاتە سويلەدى. اناۋ وڭتۇستىكتەن كەلگەن اقىننىڭ ءسوزى تاپ-تۇيناقتاي. كوركەم، ماعىنالى. ەكى اقىنعا ۇپاي بەرەتىن ءسات تە كەلدى»، - دەپ جازادى ول جەلىدەگى پاراقشاسىندا.
قازىدا وتىرعاندار مەنەن وزگە سەمەيدەگى ءبىر ۋنيۆەرسيتەتتىڭ پرورەكتورى، ەگەمەننىڭ مەنشىكتى ءتىلشىسى، ءمۇيىزى قاراعايداي فيلولوگ عالىم جانە ءتوراعا مەنىڭ تىنىشتىقبەك ابدىكاكىم ۇلى اعام. الدىمەن قوناق اقىننىڭ ۇپايى سۇرالدى. ءبارىمىز ون قويامىز عوي دەپ الاڭسىزبىن.
ءبىر كەزدە عالىم اعامىز 9، قالعانىمىز 10 كوتەردىك. ەندىگى گاپ «عالىم اعام جەرلەس اقىنىمىزعا نە كوتەرەر ەكەن» دەپ وتىرمىن. نە دە بولسا ءوزىم ۇپاي بەرۋگە اسىقپايىن دەپ شەشتىم. جەرلەس اقىنىمىزدىڭ ۇپايى سۇرالعان كەزدە قاراسام، ءبارى 10، الگى عالىم اعامىز دا 10 كوتەرىپ جاتىر. قازىلاردىڭ ويى بەلگىلى، جۇلدە اۋىلدا قالۋ كەرەك.
لايىقسىز بولسا دا الىپ قالۋىمىز كەرەك. سودان «اپ-بالەم، قازىر كورسەتەم» دەدىم دە ءوز اقىنىمىزعا 8 كوتەرە قويدىم. سەبەبى 10 دەگەن ۇپايعا تارتپاي تۇر، 9 كوتەرسەم ەكى اقىننىڭ ۇپايى تەڭ بولادى دا ءتوراعانىڭ ءبىر ۇپايىمەن ءبارىبىر ادىلەتسىزدىك جاساعالى تۇر.
وڭتۇستىكتەن كەلگەن اقىندى تانىمايمىن. ءبىرىنشى كورۋىم، ءبىراق قياناتقا قياتىن بالا ەمەس، مىقتى، سۋىرىپ سالما اقىن.
قازىلار القاسى اقىلداسۋعا پرورەكتوردىڭ كابينەتىنە جينالدىق.
اعالارىم «سەن نەگە 8 قوياسىڭ» دەپ ماعان باس سالدى. مەن دە ءۋاجىمدى ايتىپ بولمايمىن، «ادىلەتسىزدىك جاساماڭىزدار، بالا ابايدىڭ ەلى قياناتشىل ەكەن دەپ كەتپەسىن» دەدىم. داۋ قىزىپ جاتىر.
ەگەمەندەگى اعام ءبىر كەزدە «ءتوراعا تىنىشتىقبەك قوي، ول ءبارىبىر ءوز ۇسىنىسىن وتكىزەدى» دەدى سەنىكى بولمايدى ءبارىبىر دەگەن سىڭايدا.
وسى كەزدە مانادان تەرەزەنىڭ الدىندا شىلىمىن شەگىپ ويلانىپ، اقساقالدار مەن اقىن قىزدىڭ داۋىن سىرتتاي ءۇنسىز باقىلاپ تۇرعان تىنىشتىقبەك اعام «اسەم اپاي دۇرىس ايتادى!» دەدى. وسىمەن داۋ اياقتالىپ باس بايگەنى سىر ەلىنەن كەلگەن اقىنعا بايلادىق.
قازىر ويلاپ قاراسام وتە دۇرىس جاساپپىن. ءبىزدىڭ بالا ءارتۇرلى سەبەپتەرمەن ايتىستىڭ اۋىلىنان الىس كەتتى. تاي كەزىنەن تۇلپار شىعار ەكەنى تانىلعان قىزىلوردالىق اقىن قازىر ءجۇرسىننىڭ جۇيرىكتەرىنىڭ ساپىندا. رۋىنىڭ دا، ءجۇزىنىڭ دە كىم ەكەنىن بىلمەيمىن. مەنىڭ ءبىر بىلەتىنىم ول وتە مىقتى اقىن. كەشە شاي ءىشىپ وتىرىپ سول جاعداي ەسكە ءتۇستى...
ايتپاقشى، اقىنداردى ماراپاتتاپ بولعان كەزدە حالىق اراسىندا وتىرعان ۋنيۆەرسيتەتتىڭ مۇعالىمدەرى كەلىپ «اسەم، جۇلدەنى ەرجانعا بەرگەندەرىڭ دۇرىس بولدى. ايتپەسە شۋ شىعارامىز دەپ دايىندالىپ وتىر ەدىك» دەدى.
جەلى قولدانۋشىلارى ونىڭ شەشىمىن دۇرىس دەپ باعالاپ، ادىلەتتى بولعانىنا العىسىن ايتتى.