ماسەلە ونىڭ ولگەنىندە ەمەس، ءومىر بويىنا ساراڭدىقتان سان سوققانىندا بولىپ تۇر. ءتىپتى وسى ادەت ونى گيننەستىڭ رەكوردتار كىتابىنا ەسىمىن ەنگىزدى.
ولەر الدىندا گەنريەتتانىڭ بايلىعى 4 ميلليارد دوللار بولعان. سەگىز مىڭ گەكتاردان استام جەرى بار، تەمىر جولمەن بايلانىستى كوپتەگەن اكسيالاردىڭ يەسى نەگە جومارت بولماعانى تۇسىنىكسىز، دەپ جازادى ايقىن گازەتى.
گەنريەتتا 1834 -جىلى اجەپتاۋىر داۋلەتى بار وتباسىندا ومىرگە كەلگەن. ولاردىڭ نەگىزگى تابىس كوزى كيت مايى بولعان. قىزدى نەگىزىنەن اتاسى گيدەون حوۋلەند تاربيەلەيدى.
اتاسىنىڭ كوزى ناشار كورە باستاعان تۇستا جەتى جاسار گەتتي قاريانىڭ تىزەسىنە وتىرىپ الىپ، گازەتتەگى جاڭالىقتاردى وقىپ بەرەتىن بولعان. ونى قارجى جاڭالىقتارى جانە ءتۇرلى اكسيالار مەن وبليگاتسيالار قاتتى قىزىقتىرعان. وسىنىڭ اسەرى بولار 13 جاسىندا وتباسىلىق بۋحالتەر بولىپ شىعا كەلەدى. بويجەتكەننىڭ ۇقىپتىلىعى مەن ساراڭدىعى بىردەن كوزگە تۇسەدى. ۇستىنە كيگەن كيىمدەرىنەن دە ونىڭ ارتىق اقشا جۇمساۋدان اۋلاق جۇرەتىندىگى بايقالاتىن. گەتتي اناسى ولگەننەن كەيىن ءتىپتى شىعايبايعا اينالادى. قوناق كۇتۋدى ازايتادى، ۇيدەگى بىلتە شامدى كوپ جاقپايدى، قولدانىلعان مايلىق قاعازدى تاستاي سالماي، ونى دىمقىل كۇيىندە ۇتىكتەپ قايتا پايدالاناتىن بولعان.
1865 -جىلى اكەسى دۇنيەدەن وتكەندە، قىزىنىڭ اتىندا 7,5 ميلليون دوللار قاراجات قالادى. وسى تۇستا بولاشاق كۇيەۋى ەدۆارد گرينمەن تانىسادى. بىرنەشە ءتىل بىلەتىن جىگىت جارتى الەمدى شارلاپ شىققان جيھانكەز. ءتىپتى فيليپپيندەر ارالىندا 18 جىل تۇراقتاپ قالىپ، ساۋدانىڭ سان ءتۇرىن مەڭگەرەدى.
ەدۆاردقا تۇرمىسقا شىققان گەنريەتتا قۇداي قوسقان قوساعىمەن كەلىسىمشارت جاساسىپ، بار بايلىعىنان ءبىر تيىن دا بەرمەيتىندىگىنە ۋادە الادى. ەدۆارد قارىزعا باتقاندا دا كومەكتەسپەي، كەرىسىنشە ۇيىنەن قۋىپ جىبەرەدى. ەسەسىنە بيرجا بروكەرلەرى گەتتي گريندى اسىعا كۇتەتىن. ول كومپانيا اكسيالارىن ساتىپ العان سوڭ، ىلە-شالا باعا شارىقتاي جونەلەتىن.
كۇيەۋىنەن قالعان ەكى بالا اناسىنىڭ اسا ساراڭدىعىنان كوپ زارداپ شەگەدى. گريننىڭ باسىندا باسپانا بولماعان، ارزان قوناقۇيلەردى جالداپ تۇرعان. ازىق-تۇلىك پەن ءدارى-دارمەككە دە قارجىسىن ۇنەمدەپ جۇمساعان. تۇراتىن ءۇيىنىڭ مۇرجاسىن تازالاۋعا ماماندار شاقىرماعان، كىر جۋۋ ورىندارىنىڭ قىزمەتىن پايدالانباعان. بالالارىن گازەت ساتۋعا جۇمساپ، جاستاي اقشا تابۋعا يتەرمەلەيدى. دۇكەننەن ءبىر زات الۋ ءۇشىن ساعاتتاپ تۇرىپ ساۋدالاسقان. وسى قىلىعى ءۇشىن دە ساتۋشىلار ونى جەك كورەتىن.
گەنريەتتانىڭ ساراڭدىعىنان بالاسى اياعىنان ايىرىلعانى دا شىندىق. نەد وزىنە اپەرگەن شاناسىمەن ايازدى كۇندەردىڭ بىرىندە سىرعاناق تەۋىپ ءجۇرىپ اياعىن سىندىرىپ الادى. اناسى ونى كەدەيلەرگە ارنالعان اۋرۋحاناعا اپارادى. ونى تانيتىن دارىگەرلەر بالاسىن ەمدەۋدەن بىردەن باس تارتادى. ەسەسىنە گەتتي ۇلىن ءۇي جاعدايىندا ەمدەۋگە كىرىسەدى. نەد بىرنەشە جىل ازاپتى اۋرۋدى باسىنان وتكەرىپ، اقىرى اياعىن كەستىرىپ تىنادى.
قارتايعاندا دا قورقىنىش پەن ۇرەي قۇشاعىندا ءومىر سۇرگەن گەتتي ۇنەمى جانىنان قارۋىن تاستاماعان. ول جاڭادان پايدا بولعان كولىك سەكىلدى قۇرالداردىڭ بارلىعىنان باس تارتىپ، تەك اقشا جيناۋدىڭ قۇلىنا اينالادى. بىردە ونىڭ توسىننان تۇسىرىلگەن سۋرەتى گازەتكە دە باسىلىپ كەتەدى.
81 جاسىندا جۇرەك تالماسىنان كوز جۇمعان گەتتيدىڭ ەكى ۇلى 4 ميلليارد دوللارعا مۇراگەر بولىپ شىعا كەلەدى. نەد ەسىمدى ۇلى قاراجاتىنىڭ ءبىر بولىگىن كولىك جاساۋ مەن تەحنولوگيالىق جاڭالىقتار اشۋعا جۇمسايدى. ونىڭ اناسىنان ايىرماشىلىعى ساراڭدىقتى سۋقانى سۇيمەگەن.
جولداسبەك دۋاناباي