گۇلشارا ءابدىقالىقوۆا بەلارۋستە «سلاۆيان بازارى» فەستيۆالىنىڭ اشىلۋىنا قاتىستى

استانا. قازاقپارات - قازاقستاننىڭ مەملەكەتتىك حاتشىسى گۇلشارا ءابدىقالىقوۆا بەلارۋس رەسپۋبليكاسىنا جۇمىس ساپارىمەن باردى، دەپ حابارلايدى قازاقپارات اقوردانىڭ باسپا ءسوز قىزمەتىنە سىلتەمە جاساپ.

12-14 -شىلدە كۇندەرى بولعان ساپار اياسىندا گۇلشارا ءابدىقالىقوۆا بەلارۋس پرەزيدەنتى اكىمشىلىگىنىڭ باسشىسى ن. كوچانوۆامەن كەزدەستى. كەزدەسۋدە ءوڭىرارالىق دەڭگەيدەگى جانە ساۋدا- ەكونوميكالىق، مادەني- گۋمانيتارلىق سالالارداعى ەكىجاقتى ءوزارا ءىس- قيمىل ماسەلەلەرى تالقىلاندى.

مەملەكەتتىك حاتشى قازاقستان مەن بەلارۋس اراسىنداعى تاۋار اينالىمى 2017 -جىلعى قاڭتار- ءساۋىر ايلارىندا 160,4 ميلليون دوللار بولعانىن جانە ونىڭ 2016 -جىلدىڭ ءتيىستى كەزەڭىمەن سالىستىرعاندا شامامەن v عا وسكەنىن اتاپ ءوتتى. گۇلشارا ءابدىقالىقوۆا بەلارۋس تاراپىنا استاناداعى حالىقارالىق «ەكسپو-2017» مامانداندىرىلعان كورمەسىنە بەلسەنە اتسالىسىپ جاتقانى ءۇشىن ريزاشىلىق ءبىلدىردى.

ن. كوچانوۆا مارتەبەلى مەيمانعا ساپارمەن كەلىپ، «ەكسپو-2017» كورمەسى اياسىندا وتەتىن «ايەلدەر بولاشاق ەنەرگياسى ءۇشىن» اتتى حالىقارالىق ايەلدەر فورۋمىنا شاقىرعانى ءۇشىن العىس ايتتى. ساپار اياسىندا مەملەكەتتىك حاتشى گۇلشارا ءابدىقالىقوۆا ەلدەر مەن قۇرلىقتاردى بىرىكتىرەتىن ءىرى مادەني فورۋم - «سلاۆيان بازارى» حالىقارالىق ونەر فەستيۆالىنىڭ اشىلۋىنا قاتىستى.

«سلاۆيان بازارى» فەستيۆالى 1992 -جىلعى شىلدە ايىندا قۇرىلدى. حالىقارالىق فەستيۆال رەسەي فەدەراتسياسى مەن بەلارۋس رەسپۋبليكاسىنىڭ گۋمانيتارلىق ىنتىماقتاستىعىن ىسكە اسىرۋعا، كوركەم مادەنيەت پەن ونەردى جانداندىرۋعا جانە ونىڭ دامۋىنا سەپتىگىن تيگىزەتىن ۇزاقمەرزىمدى مادەني جوبا بولىپ سانالادى. قازاقستان بۇل ءىس-شاراعا بەلسەنە اتسالىسىپ، جۇلدەلى ورىندارعا يە بولىپ كەلەدى. 2015 -جىلى اتالعان حالىقارالىق كونكۋرستىڭ باس جۇلدەسىن ديماش قۇدايبەرگەن جەڭىپ الدى.