باتىس قازاقستاندىق ءانشى «سلاۆيان بازارى» فەستيۆالىندە ەكىنشى ورىنعا يە بولدى

ورال. قازاقپارات - باتىس قازاقستاندىق جاس ءانشى ەرجان ماكسيم بەلارۋس ەلىنىڭ ۆيتەبسك قالاسىندا وتكەن حالىقارالىق «سلاۆيان بازارى» فەستيۆالىنىڭ بالالار بايقاۋىندا ەكىنشى ورىنعا يە بولدى، دەپ حابارلايدى «قازاقپارات» ءتىلشىسى.

ەرجاننىڭ ۇستازى، ع. قۇرمانعاليەۆ اتىنداعى باتىس قازاقستان وبلىستىق فيلارمونياسىنىڭ سوليسى داريا باقىتوۆانىڭ ءمالىم ەتكەنىندەي، ايتۋلى ونەر دوداسىنا الەمنىڭ 21 ەلىنەن ۇزدىكتەر قاتىسىپ، باق سىنادى.

سولاردىڭ ىشىندە قازاقستان نامىسىن قورعاعان ەرجان ماكسيمنىڭ جۇلدەلى ورىنعا ىلىگۋى - ۇلكەن جەتىستىك. بۇل - ونىڭ تابيعي تالانتى مەن ەڭبەگىنىڭ، اتا-اناسى ەربول مەن گۇلميرانىڭ ۇزدىكسىز قولداۋىنىڭ ناتيجەسى.

ايتا كەتەيىك، بۇل - ەرجان ماكسيمنىڭ حالىقارالىق بايقاۋداعى كەزەكتى جەڭىسى. ول جەتى جاسىندا ماسكەۋدە وتكەن «بەگۋشايا پو ۆولنام» فەستيۆالىنىڭ، سودان كەيىن وتكەن جىلى جازدا الماتىدا حالىقارالىق «بوزتورعاي» بالالار شىعارماشىلىعى بايقاۋىنىڭ، قىركۇيەكتە گرۋزيانىڭ باتۋمي قالاسىندا «دەلفين فەست» بايقاۋىنىڭ باس جۇلدەسىن يەلەنگەن بولاتىن.

ال 2016 -جىلعى جەلتوقساندا توعىز جاسار ەرجان ماكسيم ريگادا وتكەن جاس ورىنداۋشىلاردىڭ بەسىنشى «Riga Symphony 2016» حالىقارالىق فەستيۆالىندە ءۇش دۇركىن جۇلدەگەر اتاندى. وندا ورالدىق جاس دارىن اۆتورلىق ءان مەن الەمدىك حيتتەن ءبىرىنشى، حالىقتىق اننەن ەكىنشى ورىندى يەلەنىپ، ءۇش بىردەي مەدالعا قول جەتكىزگەن ەدى. ال بيىلعى مامىردا يتاليانىڭ سان- رەمو قالاسىندا وتكەن جاس ورىنداۋشىلاردىڭ حالىقارالىق فەستيۆالىندە ءبىرىنشى ورىنعا يە بولدى.

اۆتور: ەلجان ەرالى