جەتىسۋدىڭ جادىگەرلەرى - ەلوردا تورىندە

تالدىقورعان. قازاقپارات - جەتىسۋ جەرىندەگى ەسىك قورعانىنان تابىلعان التىن ادامنىڭ كوشىرمەسى، جامبىل جابايەۆتىڭ دومبىراسى مەن تۇرمىستا قولدانعان بۇيىمدارى، بالپىق ءبيدىڭ ۇرىستا كيگەن دۋلىعاسى استانا تورىندەگى قازاقستان قارۋلى كۇشتەرىنىڭ اسكەري- تاريحي مۋزەيىندە كەلۋشىلەر نازارىنا ۇسىنىلۋدا.

الماتى وبلىسىنىڭ مادەنيەت كۇندەرى اياسىندا ءوڭىر مۇراجايلارىنان بارلىعى 231 ەكسپونات پەن كوركەمسۋرەت گالەرەياسىنان 30 عا جۋىق كارتينا اكەلىنگەن، دەپ حابارلايدى قازاقپارات ءتىلشىسى. م. تىنىشپايەۆ اتىنداعى وبلىستىق تاريحي- ولكەتانۋ مۋزەيى ديرەكتورىنىڭ ورىنباسارى كۇلاش يسابەكوۆانىڭ ايتۋىنشا، كورمەگە تالدىقورعانداعى ولكەتانۋ مۋزەيىنىڭ، كەربۇلاق اۋدانىنداعى شوقان ۋاليحانوۆتىڭ «التىنەمەل» مەموريالدىق مۋزەيىنىڭ، ەڭبەكشى قازاق اۋدانىنداعى «ەسىك» مەملەكەتتىك تاريحي مادەني قورىق مۋزەيىنىڭ ەكسپوناتتارى قويىلعان. ال تالدىقورعانداعى كوركەم سۋرەت گالەرەياسى مەن جاركەنت قالاسىنداعى ءابىلحان قاستەيەۆتىڭ كوركەمسۋرەت گالەرەياسىنان اكەلىنگەن اكۆارەلمەن، مايلى بوياۋمەن قاعازعا، كەنەپكە، اعاشقا سالىنعان سۋرەتتەر استانالىقتار مەن قالا قوناقتارىنىڭ قىزىعۋشىلىعىن تۋعىزۋدا.

كەلۋشىلەرگە ەكسكۋرسوۆودتار قازاق، ورىس، اعىلشىن تىلدەرىندە جادىگەرلەر مەن ولاردىڭ تاريحى تۋرالى كەڭىنەن اڭگىمەلەيدى. ماسەلەن، بالپىق ءبيدىڭ XVIII عاسىردا قالماقتارمەن سوعىس كەزىندە كيگەن دۋلىعاسىن ۇرپاقتان ۇرپاققا كوزدىڭ قاراشىعىنداي ساقتاپ كەلگەن جولامان اۋىلىندا تۇراتىن تىكەلەي ۇرپاعى 1980 -جىلدارى مۇراجايعا اكەلىپ تاپسىرعان.

ال جىر الىبى جامبىلدىڭ مۋلينە جىبىمەن توقىعان پورترەتىن 1930 -جىلدارى وزبەكستاننىڭ ون التى جاسار سۋرەتشىسى اقىنعا سىيعا تارتقان.

ايتا كەتسەك، «استانا ەكسپو-2017» حالىقارالىق كورمەسىنە وراي ءوتىپ جاتقان الماتى وبلىسىنىڭ مادەنيەت كۇندەرىنىڭ اياسىندا ۇيىمداستىرىلعان تاريحى سىرعا تۇنعان جادىگەرلەر مەن كورنەكتى كارتينالار كورمەسى الداعى تامىز ايىنىڭ 7 سىنە دەيىن جالعاساتىن بولادى.