ءومىر مەن ءولىم ءبىر- بىرىنە قاراما- قارسى ۇعىم دەپ قاراۋعا بولمايدى. سەبەبى ءومىر تىرشىلىكتىڭ باسى ەمەس، سوڭى. ءولىم سوڭى ەمەس، قايتا باسى بولۋى دا عاجاپ ەمەس. ەكەۋىنە ەگىز ۇعىم دەپ قاراعان ءجون. ادام ومىرگە كەلەدى. بۇل دۇنيەگە كەلۋى. ۋاقىتى جەتكەن كەزدە بۇ دۇنيەدەن كەتەدى. ءبىراق كەتكەن جاعى قاراڭعى تۇنەك نە ماڭگىلىك الەم. بۇل جاعى ەشكىمگە انىق ەمەس، جۇمباق ءارى ۇرەي. ءومىر مەن ءولىم اراسىندا ادامزات ءۇشىن تاعى ءبىر ءومىر بار. ول ماحاببات دەپ اتاپ وتتىك. اقيقاتىندا بۇل سولاي. ابايدىڭ «ماحابباتسىز دۇنيە بوس» دەگەنىن ەسكە ءتۇسىرىڭىز. نە ءۇشىن ماحاببات؟ نەگە ماحاببات بولماسا ءومىردىڭ ءمانى بولمايدى، دۇنيە نەگە بوس كەڭىستىك بولىپ قالادى؟
ماحاببات - ناعىز تىرشىلىكتىڭ باستاۋى. ماحاببات بولماسا ادام دۇنيەگە كەلمەس ەدى. ماحاببات بولماسا جەر بەتىندە زۇلىمدىق پاتشاسى ماڭگىلىك بيلىگىن جۇرگىزەر ەدى. ماحاببات بار بولعان سوڭ، دۇنيە ءوز تەپە- تەڭدىگىن ساقتاپ تۇر. ال «ماحاببات» دەگەن ءسوزدىڭ ءبىر جاقتى عانا ماعىناسى بار دەسەڭىز، قاتەلەسەسىز.. . سەبەبى ماحاببات تىرشىلىكتەگى كەز كەلگەن جاراتىلىستىڭ جان دۇنيەسىندە ساۋلەلەنگەن قۇبىلىس. ول - جۇرەكتە. ول - سانادا. ول - قاسىڭدا.
ماحاببات - ماڭگى جاستىقتىڭ كەپىلى. ەگەر ادام ءومىر ءسۇرۋ ءۇشىن عانا جارالعان دەسەك، تاعى دا باسقا جولعا ءتۇسىپ كەتەمىز. سەبەبى ادام ومىرگە ماحابباتتى ىزدەپ كەلدى. ول جەتى تۇيسىككە باعىنبايتىن سەگىزىنشى ەرەكشەلىكتى ىزدەپ كەلدى. بۇل - سەزىم. بۇل - ماحاببات. ءدال وسى قۇبىلىس ارقىلى ادام ءومىر مەن ءولىم اراسىندا ەڭ باقىتتى، ەڭ ءتاتتى كۇندەرىن وتكىزەدى. ال ول الەمنەن شىعىپ كەتكەندەر جارىعى جوق تۇنەكپەن ارپالىسىپ وتەدى. انانىڭ بالاسىنا، بالانىڭ اناسىنا، قوس عاشىقتىڭ ءبىر- بىرىنە دەگەن سەزىمى، جان- جانۋارعا دەگەن، تىرشىلىككە دەگەن، تابيعاتقا، اينالاعا، ادامعا، ەڭ اقىرى جانى جوق سۇلۋ مۇسىنگە دە ماحاببات بار. ادام ءار نارسەگە ماحابباتپەن قاراي بىلسە، ول ءومىر ءسۇرىپ ءجۇر. ول ءومىر مەن ءولىم ورتاسىنداعى ءومىردى ءسۇرىپ ءجۇر. ءومىردىڭ ءوزىن عانا ءسۇرۋ سوقپاعى كوپ جولعا ءتۇسۋ.
ءولىمدى ويلاي بەرۋ ءتۇڭىلۋ. ال سوندا ەكى كەڭىستىكتىڭ ورتاسىندا جارالعان ادام بالاسىنىڭ باقىتى ءۇشىن كىم كۇرەسپەك؟ ونىڭ جاقسى ءومىر سۇرۋگە قۇقى بار. ءدال وسى قۇبىلىستاردى ويلاي كەلىپ، ادام ءۇشىن ەڭ كەرەك ءومىر - ماحاببات دەگەن توقتامعا كەلەمىز. ءسىز ماحاببات ارقىلى بارىنە قول جەتكىزە الاسىز. « ءسۇيۋ، سۇيىسپەنشىلىك، ادالدىق، پاكتىك، جاقسى كورۋ، ۇناتۋ، باۋىر باسۋ، سەزىنۋ، رومانتيكالىق شەگىنىس جاساۋ، ليريكانىڭ شارابىنا ماس بولۋ، قۇشاقتاۋ، ايالاۋ.. .» قاراڭىزشى، قانداي جاعىمدى ءارى ءتاتتى سوزدەر. بۇل سوزدەر، بۇل ارەكەتتەر ادامدى ومىرگە كەلىپ، ءولىپ كەتكەنگە دەيىنگى ارالىقتاعى باقىتتى ءومىرىنىڭ نەگىزى.
ءسوزدىڭ سوڭىن ورالحان بوكەيدىڭ مىنا ءبىر سوزىمەن اياقتاۋدى ءجون كوردىم: «ماحاببات - زور سانالىلىقتىڭ، بىلگىر- بىلىمدىلىكتىڭ، اسقان اقىل- ويدىڭ جەمىسى ەمەس، ول - تەك جەردە عانا ءومىر سۇرەتىن، بىرتە- بىرتە ارحايزمگە اينالاتىن، تۋۋى بار، ءوسىپ- ءونۋى جوق كوزگە كورىنبەي ماڭگى جاسايتىن بەينەسى بەلگىسىز دارا ۇعىم».
Massaget.kz