قانداستارىمىز رەسەيدە قازاق ءتىلىنىڭ حالى مۇشكىل ەكەنىن ايتتى

 ماڭىزدى جيىنعا ەلباسىنىڭ ءوزى قاتىسىپ، شەتەلدەگى قانداستارىمىزدىڭ ماسەلەسىن شەشۋ ءۇشىن مەملەكەتتىك ورگاندارعا ارنايى تاپسىرما بەردى. قۇرىلتاي بارىسىندا Baq.kz ءتىلشىسى رەسەيدەگى قانداستارىمىزدى قانداي ماسەلەلەر تولعاندىراتىنىن زەرتتەپ كوردى.

«مەن ورىنبور وبلىسىندا دۇنيەگە كەلدىم. قازىرگى تاڭدا ماسكەۋ قالاسىندا تۇرامىن. وندا 10 مىڭ قازاق تۇرادى. مۇنداعى ەڭ وزەكتى ماسەلە - قانداستارىمىزدىڭ ءوز ءتىلىن ۇمىتۋى. مىسالى، بىزدە قازاق ءتىلىن ۇيرەتەتىن ساۋاتتى مۇعالىمدەر مەن ساباق وتكىزەتىن ءتيىستى ورىن جوق. قازاق تىلىندە باسىلىمدار جەتىسپەيدى. ءبىر وكىنىشتىسى ماسكەۋدە ءوسىپ كەلە جاتقان قازىرگى ۇرپاق قازاق ءتىلىن مۇلدەم بىلمەيدى. سونداي- اق، ولاردىڭ قازاق مادەنيەتىنەن حابارى جوق. ءبىراق شامامىز كەلگەنشە وسى ماسەلەنى ءوز كۇشىمىزبەن شەشۋدەمىز» ، - دەيدى ماسكەۋدەگى «مۇراگەر» قازاق مادەني بىرلەستەگىنىڭ وكىلى گۇلجانات حالمۇحامەدوۆا.

ال ومبى قالاسىنان كەلگەن تورعىن اشەنوۆا رەسەيدەگى قازاقتىلدى ب ا ق- تىڭ حالى مۇشكىل ەكەنىن ايتتى.

«مەن 4  جىلدان بەرى «ومبى قازاقتارى» دەگەن جاستار ۇيىمىن باسقارامىن. ومبى قالاسىندا 100 مىڭداي قازاق تۇرادى. ءبىز 2014 -جىلدان بەرى «ومبى قازاقتارى» دەگەن گازەت شىعارامىز. العاشىندا بىزدە 3 گازەت بولدى. قازىرگى تاڭدا ءبىر- اق باسىلىمدى شىعارىپ وتىرمىز. ونىڭ وزىندە ءبىرشاما قيىندىق بار. مىسالى، گازەتتىڭ باس رەداكتورى مەن جۋرناليستەر تەگىن جۇمىس ىستەيدى. گازەتىمىز العاش شىققان كەزدە قالا بيلىگى بىزگە ارنايى گرانت بەرىپ، 100 مىڭ رۋبل ءبولدى. ءبىراق ول گازەتتىڭ 5 ءنومىرىن شىعارۋعا عانا جەتتى. سوعان قاراماستان گازەتتى شىعارىپ كەلەمىز» ، - دەدى ول.

تورعىن اشەنوۆانىڭ ايتۋىنشا، اتالمىش گازەتتى شىعارۋ ءۇشىن جەرگىلىكتى قازاقتار ءوز تابىسىنىڭ ءبىر بولىگىن وسى باسىلىمعا جۇمسايدى ەكەن.

«گازەتتى شىعارۋ ءۇشىن ءوزىمىزدىڭ تاپقان اقشامىزدىڭ ءبىر بولىگىن باسىلىمعا بولەمىز. سونداي- اق، گازەتىمىزگە جازىلعان ءبىرشاما وقىرمانىمىز بار. ولاردان دا ازدا بولسا قارجى تۇسەدى. ءبىراق ءبىز گازەتتىڭ فورماتىن كىشىرەيتتىك. بۇرىن گازەتتىڭ تيراجى 2000-3000 بولسا، قازىر ول 300 گە دەيىن ازايدى» ، - دەدى ول.

وسى ماسەلەگە بايلانىستى رەسەيدە تۇرىپ جاتقان قانداسىمىز قازاقستانداعى ارىپتەستەرىنەن كومەك سۇرايدى.

«ءبىزدىڭ وبلىس قازاقستانمەن شەكتەسەدى عوي. سوندىقتان كوپتەگەن كەلىسىمگە قول قويىلعان. ناتيجەسىندە بىزدە ومبى مەملەكەتتىك ۋنيۆەرسيتەتىنىڭ جانىنان قازاق ءتىلىن وقىتاتىن ارنايى ورتالىق اشىلدى. ونى قازاقستان قارجىلاندىرادى. ءبىراق ب ا ق- قا ءتيىستى قولداۋ كورسەتىلمەيدى. سەبەبى، ول وتە قىمبات. ءبىز اقشا سۇرامايمىز. تەك بىزگە قازاقتىلدى جۋرناليستەر كومەك كورسەتسە ەكەن» ، - دەيدى تورعىن اشەنوۆا.

داۋرەن ەربولات

Baq.kz