قاراعاندىدا «تاريحتىڭ ءۇنسىز كۋاگەرلەرى» كورمەسى اشىلدى

استانا. قازاقپارات - بۇگىن وبلىستىق تاريحي- ولكەتانۋ مۇراجايىندا «قاراعاندى وبلىسىنىڭ مۇراجايلار اپتاسى» شاراسىنىڭ شەڭبەرىندە جەزقازعان تاريحي- ولكەتانۋ مۇراجايىنىڭ كورمەسى اشىلدى.

ەكسپوزيتسيا «تاريحتىڭ ءۇنسىز كۋاگەرلەرى» دەپ اتالادى. مۇندا مۇراجايدىڭ اشىلۋىنان باستاپ 1978- جىلدان بەرى جينالعان ەڭ قىمبات جادىگەرلەرى قويىلعان، دەپ حابارلايدى ءوڭىر اكىمدىگىنىڭ رەسمي سايتى.

كورمەدە  ۇلىتاۋ- جەزقازعان ايماعىنىڭ تاريحىمەن تانىسۋعا بولادى. جادىگەرلەرى بار ستەندتەر كەلەسى تاقىرىپتار بويىنشا بولىنگەن: «سارى ارقانىڭ كونە جولدارى»، «ەسكەرتكىشتەر - تاريحتىڭ ءۇنسىز كۋاگەرلەرى»، «ۋاقىت ۇندەستىگى». - ءبىزدىڭ مۇراجاي 1978- جىلى قۇرىلعان. بۇگىنگى كۇنى وندا 50 مىڭنان استام جادىگەر بار. ولاردىڭ ىشىندە سيرەك كەزدەسەتىن دۇنيەلەر دە تابىلادى. بۇل كورمەگە ءبىز 70 جادىگەر الىپ كەلدىك. ولاردىڭ بارلىعى - ءتۇپنۇسقا. بيىلعى جىلى بىزدە «تاريحتا ءوز اتىڭدى قالدىر» دەگەن اكسيا ءوتتى. ول اكسيا شەڭبەرىندە تايجان قالماعامبەتوۆتىڭ ۇرپاقتارى ءبىزدىڭ مۇراجايعا ونىڭ سىرنايىن قالدىرعان ەدى. ونى دا وسىندا الىپ كەلدىك، - دەيدى جەزقازعان تاريحي-ارحەولوگيالىق مۇراجايىنىڭ ديرەكتورى راۋشان قاپپاروۆا.

كورمەگە كەلۋشىلەر بىلعارىدان، قازاق حالقىنىڭ اعاش پەن مەتالدان جاسالعان ىدىستارىن، قىمىز ساقتاۋعا ارنالعان قۇمىرا، بيە ءسۇتىن قۇياتىن بىلعارى ىدىستى، كەسەلەرگە ارنالعان قۇتىلار، ەرلەردىڭ بەلدىكتەرى، ايەلدەردىڭ اشەكەيلەرىن كورە الادى. جەزقازعان تاريحي-ارحەولوگيالىق مۇراجايىنىڭ كورمەسى 17- شىلدەگە دەيىن جالعاسادى.