ديماش قۇدايبەرگەن «تۇنگى ستۋديادا» جانكۇيەرىنە «تۋعان كۇن» ءانىن ايتىپ بەردى
«تۇنگى ستۋديا» باعدارلاماسىندا ديماشتىڭ ا ق ش، گەرمانيا جانە قىتاي ەلدەرىنەن كەلگەن جانكۇيەرلەرى كوپ بولدى. سونداي- اق، ديماش جانكۇيەرلەرىنىڭ سۇراقتارىنا جاۋاپ بەرىپ، قازاقستاندىق جانكۇيەردىڭ ءوتىنىشى بويىنشا اجەسىنىڭ تۋعان كۇنىنە «تۋعان كۇن» ءانىن شىرقاپ بەردى.
«ديماش ستان» اعىلشىن ءتىلدى جانكۇيەرلەر توبىنىڭ مۇشەسى ديماشتىڭ الەمگە بىرلىك پەن بەيبىتشىلىك سىيلاعانىن ايتا كەلىپ، 50-دەن استام جانكۇيەرلەر اتىنان كۇي تاسپاسىن سىيعا تارتتى.
باعدارلاما بارىسىندا ءانشى «Singer» جوباسى اياسىندا قىتاي تىلىنەن قيىندىقتار بولعانى جانە باسقا ەلدەگى تىڭدارماندارىنىڭ كوبەيۋىنە بايلانىستى ءتىلدى ۇيرەنۋ ماڭىزدى ەكەنىن ايتتى. «بۇل جوبادان العان اسەرىمدى سوزبەن ايتىپ جەتكىزۋ وتە قيىن. سەبەبى ءاربىر تۋر، ءاربىر كونسەرت مەن ءۇشىن وتە ماڭىزدى كۇندەرگە اينالدى. سول سەبەپتەن قاتتى دايىندالدىم، قوبالجىعانىمدى دا جاسىرمايمىن. كۇللى قازاقتىڭ اتىنان ونەر كورسەتۋ مەن ءۇشىن وڭايعا سوققان جوق. ونىڭ ۇستىنە، شەتەلدەن جاڭا تىڭدارماندار تاۋىپ جاتتىم، ولاردىڭ دا كوڭىلىنەن شىعۋعا تۋرا كەلدى. ءاربىر ءانشىنىڭ باقىتى - وسىنداي جانكۇيەرلەر. سىزدەردىڭ مەنى ۇدايى قولداپ، دەمەپ جۇرگەندەرىڭىز ءۇشىن ۇلكەن راحمەت ايتقىم كەلەدى»، - دەدى ديماش.
اۆتور: مۇحتار قاليموللا ۇلى