استانا وپەرا تەاترىنىڭ ءانشىسى اۆستريا ساحناسىندا ونەر كورسەتتى
قازاقستاندىق ءانشى تانىمال Graz Opera (اۆستريا) ساحناسىندا ونەر كورسەتتى، دەپ حابارلايدى تەاتردىڭ باسپا ءسوز قىزمەتى. سپەكتاكلدىڭ تۇساۋكەسەرى 6 -مامىر كۇنى ءوتتى، بۇدان كەيىن ءبىزدىڭ ۆوكاليست تاعى 11 سپەكتاكلدە ريم پروكونسۋلىنىڭ پارتياسىن ورىندادى، سوڭعى ونەر كورسەتۋى 23 -ماۋسىم كۇنى ءوتتى. - قويىلىمدى ءبىز ءبىر اي دايىندادىق، ماڭىزدى مۋزىكالىق ءارى رەجيسسەرلىك جۇمىس ءجۇرىپ جاتتى.
باس كەزىندە، مەن ءبىراز قوبالجىدىم، بۇل جاڭا ءارى كۇردەلى پارتيا قولىمنان كەلە مە دەپ تولقىدىم. ءبىر جاعىنان، بەلكانتو ستيلىن شىڭداپ جاتىرمىن دەگەن زور قۋانىشتى سەزىندىم، سەبەبى بۇل تاجىريبە ناتيجەسىن بەرىپ، باسقا دا سپەكتاكلدەرگە وڭ اسەر ەتەرى ءسوزسىز. كەيىن، قويىلىم ۇردىسىنە شابىتتانىپ، مۋزىكالىق اۋرادان اسەر الىپ، اتاقتى انشىلەرمەن جۇمىس جاساي وتىرىپ، ءوزىم دە اشىلا باستادىم، اكتەرلىك شەبەرلىگىمدى تانىتتىم، جاقسى ويىن مەن تەحنيكامدى كورسەتتىم. ارىپتەستەرىم مەنى وتە جوعارى باعالادى، - دەدى م. شوتابايەۆ. جالىندى قاۋىم دا قازاقستاندىق ءانشىنى قۋانا قارسى الدى، تىڭدارماندار ونى ساحنادان جىبەرمەي، «براۆو» دەپ ايقايلادى.
سپەكتاكلدەردەن كەيىن ءبىزدىڭ سوليستكە مۋزىكالىق سىنشىلار ماقالا ارناپ جاتتى. نەمىس تىلىندە شىعاتىن سونداي گازەتتەردىڭ بىرىندە ۆوكاليست ءوزى تۋرالى كەلەسى پىكىردى وقىدى: «قازاقستاندىق جاس ءانشى ءوزىنىڭ سىڭعىرلاعان كەڭ اۋقىمدى داۋسىن، يكەمدى تەحنيكاسىن پاش ەتتى» - دەپ جازدى Kronen Zeitung گازەتى.
ءسوزدىڭ رەتى كەلگەندە، ءانشى وتانىنىڭ داڭقىن شىعارىپ جۇرگەنىن ايتا كەتكەن ءجون: قاي جەردە ونەر كورسەتسە دە، بارلىق افيشالاردا ونىڭ ەسىمىمەن قاتار «استانا وپەرا» تەاترى، قازاقستان اتاۋى بىرگە جۇرەدى. - وتە كولەمدى جۇمىس اتقارىلدى - كۇنارا ءان شىرقادىم. ۆ. بەللينيدىڭ «نورما» وپەراسى - بەلكانتو ءستيلى ۇلگىسىندەگى شىڭداردىڭ ءبىرى ەكەنىن اتاپ وتكەن ءجون. سپەكتاكلدەر اراسىندا براتيسلاۆاعا بارىپ قايتتىم، ول جەردە پ. ي. چايكوۆسكييدىڭ «ەۆگەني ونەگين» وپەراسىنداعى لەنسكي پارتياسىن ورىندادىم. وسىدان ءوزىمنىڭ مانسابىمدى باستادىم، بۇل پارتيانى برازيليادا كورسەتتىم. كورەرمەندەر مەن باسشىلىققا ۇناعانى سونشالىق، مەنى كەلەسى ماۋسىمدا دج. ۆەرديدىڭ «تراۆياتا» وپەراسىنداعى الفرەد پارتياسىن ورىنداۋعا شاقىردى، - دەپ جوسپارىمەن ءبولىستى ءانشى.
ءۇش اي بويى مەدەت شوتابايەۆتى وتانىندا جانۇياسى مەن قازاقستاندىق تابىنۋشىلارى كۇتۋمەن بولدى، ال جاقىندا، 5 -شىلدە كۇنى بەيبىتشىلىك جانە كەلىسىم سارايى جانىندا ق ر مادەنيەت جانە سپورت مينيسترلىگى ۇسىنىپ وتىرعان ە. برۋسيلوۆسكييدىڭ «قىز جىبەك» وپەراسىنان سۇيىكتى ءانشىسىنىڭ داۋسىن ەستىپ، تامسانا الادى. بۇل وپەرادا مەدەت تولەگەننىڭ پارتياسىن ورىندايدى. تامىز ايىندا ءانشى اتاقتى ماەسترو پلاسيدو دومينگومەن بىرگە دج. ۆەرديدىڭ «تراۆياتا» سپەكتاكلىندە ونەر كورسەتۋگە دايىندالۋدا.