«بۇل قۇجاتتار وسى كۇيىندە العاش رەت كورسەتىلىپ وتىر، سەبەبى ولاردىڭ باسىم بولىگى ايرىقشا قۇندى مارتەبەسىنە يە بولعان ەدى. كەڭەستىك كەزەڭدە بۇل قۇجاتتار زەرتتەۋشىلەردىڭ قولىنا تيە بەرمەيتىن. قازىرگى كەزدە كورمەدە كورسەتىلگەن تۇلعالار جايىنداعى مالىمەتتەر قازاق حالقى تاريحى ءۇشىن ماڭىزدى ەكەنىن تۇسىنە وتىرىپ، ەندى قۇجاتتار زەرتتەۋشىلەر ءۇشىن اشىلۋدا. ءبىزدىڭ ارحيۆتە كەنەسارى حان تۋرالى بار مالىمەتتەردىڭ ءبىر بولىگىن سكانەردەن وتكىزدىك. قۇجاتتار از ەمەس، سەبەبى ونىڭ قولباسشىلىعىمەن قازاق حالقىنىڭ تاۋەلسىزدىگى ءۇشىن كۇرەس ۇزاق ۋاقىتقا جالعاستى. ءبىز وسى دەرەكتەردەن ەڭ قىزىقتىلارىن ىرىكتەپ الدىق»، - دەدى ومبى وبلىسى تاريحي ارحيۆىندەگى ازاماتتىق سوعىستى زەرتتەۋ ورتالىعىنىڭ جەتەكشىسى گالينا بورودينا.
ونىڭ سوزىنە قاراعاندا، ارحيۆتە كازاك وتريادتارىمەن قاقتىعىستار تۋرالى اقپاراتتار ساقتالۋدا. بەلگىلى بولعانداي، اتالعان قۇجاتتاردىڭ كوشىرمەلەرى زەرتتەۋشىلەرگە قولجەتىمدى بولۋ ءۇشىن استانا قالاسىنىڭ مەملەكەتتىك مۇراعاتىنا تاپسىرىلادى. جالپى، استاناعا ءارقايسىسى 10-15 پاراقتى قامتيتىن 40 قۇجات جەتكىزىلدى. وندا ومبى جانە اقمولا وبلىستارىنىڭ تاريحى جايىندا قۇندى مالىمەتتەر جيناقتالعان. ومبى وبلىسى ارحيۆىندە جالپى ەكى ميلليوننان استام ماتەريال ساقتاۋلى. سونىمەن قاتار كورمەدە شوقان ءۋاليحانوۆتىڭ اجەسى ايعانىم حانىم تۋرالى قۇجاتتار بار. بۇدان بولەك، 19 - عاسىرداعى اقمولا وبلىسىنىڭ كارتاسى مەن وزگە دە قۇندى مالىمەتتەردى قامتيتىن ماتەريالدار كوپشىلىك نازارىنا ۇسىنىلعان.
اۆتور: رۋسلان عابباسوۆ