ورمەكشى ادامنىڭ حيكايالارى قازاقشا جالعاستى
«ورمەكشى ادام. ۇيگە ورالۋ» - قازاق تىلىندە دۋبلياج جاسالعان 21- فيلم بولسا، ورمەكشى ادام سۋپەر قاھارماننىڭ شىتىرمان وقيعالارى جايلى قازاق تىلىندەگى 3- فيلم. فيلم ۇلكەن ەكرانعا استانانىڭ تۋعان كۇنىندە ورىس جانە قازاق تىلدەرىندە شىعادى.
"وسى ۋاقىتقا دەيىن ورمەكشى ادام تۋرالى 5 كينو تۇسىرىلگەن ەكەن. ءتۇسىرىلىم بارىسىندا تەك قانا كاسىبي ارتىستەر شاقىرىلدى. ەڭ باستى كەيىپكەرلەردىڭ سانى 6-7. جالپى ەپيزودتاردى قوسقاندا 40-45 ادام دىبىستادى. شامامەن 1 اي ۋاقىت كەتتى. بۇل ۇلكەن ءوندىرىس ەڭ الدىمەن شەتەلدەن ارنايى ماتەريال العىزامىز. ونىڭ قۇجاتتارىن رەتتەۋ بار. قازاق ءتىلى باي بولعاندىقتان اۋدارمادا ەش قيىندىق تۋعان جوق"، - دەدى دۋبلياج رەجيسسەرى شاح-مۇرات وردابايەۆ.
«ورمەكشى ادام. ۇيگە ورالۋ» پيتەر پاركەردىڭ كەك الۋشى بولۋى ءۇشىن قانداي جولدى ءجۇرىپ وتكەنى جايلى باياندايدى. جاڭا فيلمدە پيتەر پاركەر MARVEL كينەماتوگرافيالىق الەمىنىڭ باسقا كەيىپكەرلەرىمەن ءوز تەرريتورياسىندا العاش رەت كەزدەسەدى. قازاق دۋبلياجىنىڭ رەجيسسەرى مەن ءماتىن سالۋشىسى شاح-مۇرات وردابايەۆ بولدى.
باس كەيىپكەرلەردىڭ داۋىستارىن زاڭعار ابەنوۆ (پيتەر پاركەر)، اسىلبەك قاپايەۆ (ەدريان تۋمس - قۇزعىن)، سايا توقمانعاليەۆا (ورمەكشى ادامنىڭ كوستيۋمى)، نۇركەن وتەۋلوۆ (توني ستارك)، شاح- مۇرات وردابايەۆ (نەد)، مەي (اينۇر بەرمۇحامبەتوۆا) جانە باسقا دا اكتەرلەر دىبىستادى. دۋبلياجعا بارلىعى 24 اكتەر قاتىستى. 2011 -جىلدان بەرى 20 كينوكارتينا قازاق تىلىنە اۋدارىلدى.
وسى ۋاقىت ارالىعىندا 150 تەحنيكالىق جانە شىعارماشىلىق مامان، ونىڭ ىشىندە 4 رەجيسسەر، 158 اكتەر، 11 مۋزىكالىق جەتەكشى، اۋدارماشىلار Disney ستۋدياسىنىڭ ستاندارتىنا ساي جۇمىس ىستەپ ۇيرەندى. ەڭ العاشقى بولىپ ۋيل ءسميتتىڭ «قارا كيىمدىلەر-3» فيلمىنىڭ جۇلدىزدارى، دجونني دەپتىڭ «جالعىز رەيندجەرى»، ا. ءدجوليدىڭ «مالەفيسەنتاسى» قازاقشا سويلەدى. كوبىنە بالالارعا ارنالعان الەمدىك شەديەۆرلەر «كولىكتەر»، «باتىل جۇرەك»، «موانا»، «كۇلبيكە»، «مونسترلار ۋنيۆەرسيتەتى»، «اليسا»، «دجۋنگلي كىتابى»، «مالەفيسەنتا»، «ورمەكشى- ادام» قازاقشا دۋبلياجدالدى.
دينارا ءشايجۇنىسوۆانىڭ ايتۋىنشا، جوبانىڭ ارقاسىندا گولليۆۋد جۇلدىزدارى دجونني دەپتىڭ (بەرىك ايتجانوۆ)، اندجەلينا دجوليدىڭ (گۇلناز اۋەسباي)، ۋيل سميتتىڭ (ازامات قاناپيا) داۋىستارىن دىبىستاۋعا 6 جىلعا ەكسكليۋزيۆتى قۇقىعى بار.
سونداي- اق، Disney كومپانياسىنىڭ داۋىس بازاسىندا قازاقستاندىق 100 اكتەردىڭ داۋسى ساقتاۋلى. 2017 -جىلدان بەرى Disney ستۋدياسىندا دىبىستالىپ كەلە جاتقان قازاق ءتىلدى فيلمدەردە Apple TV Itunes Movies رەسمي قوسىمشاسىنىڭ ۆيدەوحوستينگىندە جازىلعان قازاق تىلىندە دىبىستىق قوسىمشا قويىلعان.
اۆتور: گۇلميرا عوسمان-ءالي