پرەزيدەنت تۋدى قالاي تاڭداعانىن ەسكە الدى

استانا. قازاقپارات - بۇگىن ق ر پرەزيدەنتى نۇرسۇلتان نازاربايەۆ ەلىمىزدەگى ەڭ ۇلكەن تۋدىڭ تۇبىندە وتكەن مەرەكەلىك شاراعا قاتىسىپ، وسى مەملەكەتتىك ءرامىزدىڭ تاريحىن ايتىپ بەردى، دەپ حابارلايدى قازاقپارات ءتىلشىسى.

«وسىدان 25 جىل بۇرىن تۋدىڭ بىرنەشە ۇلگىسىن الىپ كەلگەندە مەن ءبىر ءتۇستى جولاق ەمەس، اسپان ءتۇستى كوك تۋدى قالادىم. ول - ەلگە دۇرىس جول دەگەن ءسوز، ءبارىمىز ءبىرمىز، ءبىر ءتۇستىمىز، ءبىر ويدامىز، ءبىر جۇرەكتەمىز، ءبىر وتانىمىز بار. كوك بايراعىمىز 25 جىلدىڭ ىشىندە ەلىمىزدىڭ الدىندا جەلبىرەپ كەلەدى. وسى تۋدىڭ ارقاسىندا قازاقستاندى الەمگە تانىتتىق. ءبىزدىڭ كوك تۋىمىز بىرىككەن ۇلتتار ۇيىمىنىڭ 190 مەملەكەتىنىڭ اراسىندا تۇر. ءبىزدىڭ كوك تۋىمىز شانحاي ىنتىماقتاستىق ۇيىمى باس قوسقاندا كوتەرىلەدى. ءبىزدىڭ كوك تۋىمىز ەۋرازيالىق ەكونوميكالىق وداق وكىلدەرى كەزدەسكەندە كوتەرىلەدى. ءبىزدىڭ كوك تۋىمىز سپورتشىلارىمىز بەن ونەرپازدارىمىز جەڭگەن كەزدە جەلبىرەيدى، ءانۇرانىمىز شىرقالادى»، - دەيدى نۇرسۇلتان نازاربايەۆ.

پرەزيدەنتتىڭ ايتۋىنشا، تۋ، ءانۇران مەن ەلتاڭبا - اجىراماس ۇعىمدار ءارى ۇلى دالانىڭ كەڭدىگىن كورسەتەدى. قىراننىڭ قالىقتاعانى سول كەڭدىكتى كورسەتسە كەرەك. «ءانۇراننىڭ ءسوزىن تىڭداساڭىزدار، «بىرلىگى جاراسقان ەلىم بار» دەگەن ءسوز «كوك تۋدىڭ استىندا» دەگەندى بىلىدىرەدى. سوندىقتان كوك تۋدى قۇرمەتتەۋ، كوك تۋعا باس يۋ تاۋەلسىزدىكتى قۇرمەتتەۋمەن بىردەي بولىپ سانالادى. قازاقتىڭ تۋى جەلبىرەي بەرسىن! باقىتىمىز وزا بەرسىن! وسى تۋدىڭ استىندا ءبىزدىڭ قابىلداعان بارلىق باعدارلامالارىمىز ورىندالاتىن بولسىن!»، - دەپ اتاپ كورسەتتى نۇرسۇلتان ءابىش ۇلى.

اۆتور: ارمان اسقاروۆ