قازاقستان پرەزيدەنتى وتاندىق ديپلوماتيانىڭ شيرەك عاسىرداعى جەتىستىكتەرىن اتادى
بۇگىن اقوردادا ەلىمىزدە تىركەلگەن ديپلوماتيالىق ميسسيالار مەن حالىقارالىق ۇيىمدار وكىلدىكتەرىنىڭ باسشىلارىمەن ءداستۇرلى كەزدەسۋى بارىسىندا قازاقستان پرەزيدەنتى نۇرسۇلتان نازاربايەۆ وسىلاي دەدى، دەپ حابارلايدى قازاقپارات.
كەزدەسۋ بارىسىندا قازاقستان پرەزيدەنتى شيرەك عاسىردا وتاندىق سىرتقى ساياسات قالىپتاسىپ، ەلدىڭ يگىلىگى ءۇشىن جۇمىس ىستەپ جاتقاندىعىن باسا ايتتى.
«بىرىنشىدەن، ءبىز ءوزىمىزدىڭ ۇلتتىق تاۋەلسىزدىگىمىز بەن اۋماقتىق تۇتاستىعىمىزدى قورعاپ قالدىق. بۇل جولدا ديپلوماتتاردىڭ ىستەگەن جۇمىسى از ەمەس. قاۋىپسىزدىك كەپىلدىكتەرىن الىپ، توڭىرەگىمىزدە تاتۋ كورشىلىك بەلدەۋىن قۇردىق. ەكىنشىدەن، قازىرگى تاڭدا استانا حالىقارالىق انتيادرولىق قوزعالىستىڭ باسشىسى بولىپ تانىلىپ وتىر جانە ستراتەگيالىق تۇراقتىلىق پەن ادىلەتتى الەمدى قامتاماسىز ەتۋگە ءوز ۇلەسىن قوسىپ وتىرعان مەملەكەت. ۇشىنشىدەن، قازاقستان اۋماقتىق ەكونوميكالىق ينتەگراتسيا، كووپەراتسيانىڭ اۋقىمدى جوبالارىنىڭ باستاماشىسى. بۇكىل دۇنيەجۇزىلىك قاۋىمداستىق بۇل شارۋامىزدى قولداپ وتىرعانىن بىلەسىزدەر»، - دەدى نۇرسۇلتان نازاربايەۆ.
قازاقستان پرەزيدەنتىنىڭ ايتۋىنشا، تاۋەلسىز قازاقستان جۇرگىزىپ كەلە جاتقان كوپۆەكتورلى ساياسات، حالىقارالىق باستامالارى الەمگە كەڭ تانىلىپ، قولداۋعا يە بولدى.
«ەلىمىزدىڭ دارەجەسى كوتەرىلدى. قازاقستاننىڭ دۇنيەجۇزىندەگى بەيبىتشىلىك پەن ىنتىماقتاستىققا قوساتىن ۇلەسى جىلدان جىلعا ارتىپ كەلە جاتىر. بۇل وتە ۇلكەن ەڭبەكتىڭ ارقاسى. سونىڭ ىشىندە ءبىزدىڭ ديپلوماتتاردىڭ دا جاساعان جۇمىسى ەرەن»، - دەدى ەلباسى.