اسىرەسە، قوعامدىق ورىنداردا كيىمىنە ساعىز جابىستىرىپ الىپ، ودان قالاي «قۇتىلۋدىڭ» جولىن تاپپاي جاتاتىندار كوپ كەزدەسەدى. ەندەشە، كيىمگە جابىسقان ساعىزدى تازالاۋدىڭ جولدارىن قاراستىرىپ كورەلىك.
جالپى، ساعىزدى كيىمنەن تازالاۋ ءۇشىن ول كيىمنىڭ ماتەريالىنا، ءتۇر-تۇسىنە، ساپاسىنا اسا ءمان بەرگەن ءجون. مىسالى، ءتۇسى وڭىپ كەتەتىن ماتالارعا ساعىز جابىسقان جاعدايدا اسەتون نەمەسە سپيرت، سونداي-اق ىستىق سۋدى دا قولدانباعان ءجون.
1. توڭازىتقىشقا سالۋ
ەڭ وڭاي، ءارى ءتيىمدى ءتاسىل ساعىز جابىسقان كيىمدى پوليەتيلەن قاپقا (پاكەت) سالىپ، توڭازىتقىشقا 1 ساعاتقا قويۋ. وسى ۋاقىت ىشىندە ساعىز قاتىپ، ءوزى ءتۇسىپ قالادى.
2. مۇز باسۋ
1- ءتاسىل كومەكتەسپەسە، ەگەر كيىم ۇلكەن، توڭازىتقىشقا سىيمايتىن بولسا، وندا ساعىز جابىسقان جەرگە مۇز قويىڭىز. ساعىز قاتقان ۋاقىتتا قاتتى شەتكامەن تازالاڭىز. كىلەم مەن توسەنىشتەرگە، پالتو مەن توڭعا ساعىز جابىسقاندا دا وسى ءتاسىلدى قولدانىڭىز.
3. ىستىق سۋ قۇيۋ
ول ءۇشىن جانىڭىزدا كومەكشىڭىز بولعانى دۇرىس. بىرەۋىڭىز ىستىق سۋدى ساعىز جابىسقان جەرگە قۇيىپ، ەكىنشىڭىز ونى دەرەۋ شەتكامەن تازالاپ تۇرۋلارىڭىز كەرەك. ول ءۇشىن ەسكى ءتىس شەتكاسىن پايدالانۋىڭىزعا بولادى. ەگەر كومەكشىڭىز بولماسا، ىدىسقا ىستىق سۋدى قۇيىپ، كيىمنىڭ ساعىز جابىسقان جەرىن سۋعا باتىرىپ سالىڭىز. سۋدان شىعارماي تۇرىپ، ساعىزدى ۇشكىر زاتپەن تازالاپ الىڭىز. ودان كەيىن كيىمدى قاتتى ىسقىلاپ جىبەرىڭىز. تازالانعان كيىمدى جۋىپ، جايىڭىز. ەگەر ساعىز تولىق تازالانباسا، پروتسەستى قايتالاڭىز.
4. ۇتىكتى قولدانىپ
ساعىز جابىسقان جەردىڭ ۇستىنەن دىمقىل داكە قويىپ، ۇستىنەن ۇتىكتەڭىز. ساعىزدى تازالاۋدىڭ بۇل ءادىسىنىڭ كەمشىلىگى كيىمگە جابىسقان ساعىزدى تازالاعانمەن، ودان داق قالۋى مۇمكىن. ال ونى داق تازارتاتىن ارنايى قۇرالدارمەن تازالاي الاسىزدار.
5. فەن (شاش كەپتىرگىش)
كيىمنىڭ ساعىز جابىسقان جەرىن شاش كەپتىرگىشپەن ءبىراز ۇرلەڭىز. سودان كەيىن ەسكى ءتىس شەتكاسىمەن ساعىزدى تازالاپ تاستاڭىز.
6. سىركەسۋى
دەنيم ماتەريالدارىنان ساعىزدى تازالاۋدىڭ ەڭ وڭاي ءتاسىلى - سىركەسۋىن قولدانۋ. ول ءۇشىن ازداعان سىركەسۋىن كىشكەنە قىزدىرىپ الىپ، وعان ەسكى ءتىس شەتكاسىن باتىرىپ، سىركەسۋى سۋىپ قالماي تۇرىپ، تەزىرەك ساعىزدى ءسۇرتىپ جىبەرىڭىز.