استاناداعى پالاۋ-پارتي: وزبەك، ۇيعىر مەن ازەربايجاننىڭ پالاۋى مىڭنان استام ادامعا تاراتىلدى - فوتو، كەسكىن

استانا. قازاقپارات - اتالعان شارا قازاقستان حالقى اسسامبلەياسىنىڭ ۇيىمداستىرۋىمەن ءوتتى، دەپ حابارلايدى قازاقپارات ءتىلشىسى.

«پالاۋ-party»  اكسياسى ەكسپو-2017 كورمەسىنە ارنالىپ وتىر. وعان وزبەك، ۇيعىر مەن ازەربايجاننىڭ مادەني ورتالىقتارى اتسالىسىپ، ءوز پالاۋلارىن دايىندادى. نەگىزگى ماقسات - استانا تۇرعىندارى مەن قوناقتارىنا پالاۋدىڭ ءتۇر- ءتۇرىن كورسەتۋ. سونداي- اق، ءبىز بارشا قازاقستاندىقتاردى الداعى استانا كۇنىمەن قۇتتىقتايمىز. بارلىعىمىز باۋىرلاس حالىقپىز. سوندىقتان وسى ىسپەتتى شارالار ءبىزدى جاقىنداستىرا تۇسەدى دەگەن سەنىمدەمىز»، - دەيدى استاناداعى وزبەك ەتنو- مادەني ورتالىعىنىڭ ءتوراعاسى شەرزوت پۋلاتوۆ.

ونىڭ ايتۋىنشا، بۇگىنگى اكسيا اياسىندا بەس بىردەي قازانعا پالاۋ ءپىسىرىلدى. ءاربىر قازاندا 200 ادامعا ارنالعان پورتسيا بولدى.

ايتا كەتكەن ءجون، «پالاۋ-party»  اكسياسىنا دەيىن ەتنواۋىلدىڭ ۇلكەن شاتىرىندا مەرەكەلىك كونسەرت ۇيىمداستىرىلدى. سول جەردە اسسامبلەياعا مۇشە باسقا دا ەتنو-مادەني ورتالىقتار ءوز ونەرلەرىن پاش ەتىپ، استانا كۇنىنە وراي ىزگى تىلەكتەرىن جەتكىزدى.

ماسەلەن، بۇلعارلار «شاقىرادى كوكتەم» ءانىن قازاق تىلىندە شىرقاپ، جينالعان جۇرتتىڭ كوڭىلىن ءبىر كوتەرىپ تاستادى.





شارا اياسىندا مەساناتتاردىڭ سىيلىقتارى دا تابىستالدى. وسى جولى الەۋمەتتىك جاعىنان از قامتىلعان 37 وتباسىعا ءبىر-ءبىر كىلەمنەن تاپسىرىلدى. كونسەرتتەن كەيىن حالىق دالاداعى «پالاۋ-party» - گە لاپ بەردى.

اۆتور: ارمان اسقاروۆ