ءدىني سالاداعى زاڭناماعا ەنگىزىلەتىن وزگەرىستەردى قاراۋ ءۇشىن ارنايى جۇمىس توبى قۇرىلدى
«مەملەكەتتىك- كونفەسسيالىق جانە كونفەسسياارالىق قارىم- قاتىناستى جەتىلدىرۋ بويىنشا رەسمي كوزقاراستاردىڭ جۇيەسىن انىقتاۋ ماقساتىندا مينيسترلىك «ءدىن سالاسىنداعى مەملەكەتتىك ساياساتتىڭ 2017-2020 -جىلدارعا ارنالعان تۇجىرىمداماسىن» ازىرلەدى. تۇجىرىمداما ءدىن سالاسىنداعى مەملەكەتتىك ساياساتتىڭ ارى قاراي دامۋىن، قۇقىقتىق ءنورماتيۆتى اكتىلەر جۇيەسىن، ءدىن سالاسىن رەتتەۋ بويىنشا الەۋمەتتىك- ەكونوميكالىق، ساياسي جانە باسقارۋ شارالاردى جەتىلدىرۋدى كوزدەيدى»، - دەلىنگەن حابارلامادا.
سونىمەن قاتار، مينيستەرلىك «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ءدىني قىزمەت جانە ءدىني بىرلەستىكتەر ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ازىرلەۋدى باستادى.
قازىرگى تاڭدا زاڭ جوباسى ازىرلەنۋ ۇستىندە. جوبانى جاساقتاۋعا ەكسپەرتتەر، عىلىمي قاۋىمداستىقتىڭ، مەملەكەتتىك ورگانداردىڭ جانە ۇكىمەتتىك ەمەس ۇيىمداردىڭ وكىلدەرى تارتىلعان. ارنايى جۇمىس توبى قۇرىلدى.
زاڭ جوباسىندا «قۇدايعا قۇلشىلىق ەتۋ»، «ءدىني ادەبيەت»، «ءدىني راديكاليزم»، «دەسترۋكتيۆتى ءدىني اعىم» جانە ت. ب. ۇعىمداردىڭ انىقتاماسى ناقتىلانادى. تەرميندەردى ناقتىلاۋ بىركەلكى ءتۇسىنۋ مەن ءنورماتيۆتى تاجىريبەدە بىرەگەي قولدانۋدى قامتاماسىز ەتەدى. بۇل سوڭعى كەزدەرى كەيبىر تۇلعالاردىڭ تەرروريزم مەن ەكسترەميزمگە ۇندەۋ بولماسا دا، ماعىناسى جاعىنان ءدىني دوگمالاردى راديكالدى تۇرعىدان ۇعىناتىن ءىس-ارەكەت پەن سوزدەردى پايدالانۋىمەن تۇسىندىرىلەدى. سونىمەن قاتار، زاڭ جوباسى شەتەلدە ءدىني ءبىلىم الۋدى رەتتەۋدى كوزدەيدى.
قازىر قازاقستاندىقتاردىڭ شەتەلدە ءدىني ءبىلىم الۋىنا شەكتەۋ قويۋ تۋرالى ەكسپەرتتەردىڭ ۇسىنىسى قاراستىرىلىپ جاتىر. دەگەنمەن، رەسمي تىركەلگەن ءدىني بىرلەستىكتەردىڭ جولداماسى بولعان جاعدايدا، شەتەلدە ءدىني ءبىلىم الۋ مۇمكىندىگنە شەكتەۋ قويىلمايدى.
جوبادا دىنگە دەگەن كوزقاراسىنا قاراماستان بارلىق ازاماتتاردىڭ قۇقىقتارىن قورعايتىن نورمالار ناقتىلاناتىن بولادى. ونىڭ ىشىندە، دىنگە قاتىستى ازاماتتاردىڭ سەزىمدەرىن قاساقانا قورلاۋعا، كەمسىتۋگە جول بەرمەۋ ماسەلەسى قاراستىرىلادى.
قازىرگى تاڭدا مينيسترلىككە دەسترۋكتيۆتى ءدىني اعىمداردىڭ وكىلدەرى تاراپىنان حالىقتىڭ ءدىندار جانە بەلگىلى ءبىر ءدىندى ۇستانبايتىن بولىگىن سەنبەۋشىلىككە ايىپتاۋ، سەزىمدەرىن قورلاۋ مەن بەلگىلى ءبىر دىنگە قاتىستىلىعىنا وراي كەمسىتۋ فاكتىلەرى بويىنشا ازاماتتاردان وتىنىشتەر تۇسۋدە.
تاعى ءبىر وزگەرىس رەتىندە كامەلەتكە تولماعان جاسوسپىرىمدەردى ءدىني قىزمەتكە زاڭسىز تارتۋ كوزدەلەدى. بۇدان بولەك ءدىني بىرلەستىكتەردىڭ قارجىلىق اشىقتىعىن قامتاماسىز ەتۋ، ءدىني ادەبيەتتى تاراتۋ بويىنشا جاۋاپكەرشىلىكتى ارتتىرۋ، قوعامدىق ورىنداردا ادامنىڭ ءتۇرىن تانۋعا كەدەرگى كەلتىرەتىن كيىمدەرگە زاڭمەن تىيىم سالۋ، جانە ت. ب. وزگەرىستەردى ەنگىزۋ قاراستىرىلۋدا.
بۇل وزگەرىستەردىڭ بارلىعى قوعام تاراپىنان (ەكسپەرتتەر، ءدىني بىرلەستىكتەردىڭ، ۇكىمەتتىك ەمەس ۇيىمداردىڭ وكىلدەرى، ازاماتتار) كەلىپ تۇسكەنىن اتاپ ءوتۋ كەرەك. «قازىرگى تاڭدا زاڭ جوباسى ازىرلەۋ ۇستىندە. وزگەرىستەر مۇقيات زەرتتەلىپ، جوباعا ەنگىزىلگەننەن كەيىن كەڭ تالقىلاۋعا شاعىرالاتىن بولادى»، - دەلىنگەن حابارلامادا.