ديماشتىڭ كونسەرتى: قازاقستان تۋرالى قىتايلىقتار قانداي پىكىر ايتتى
باسقا ەلدىڭ جانكۇيەرلەرىنىڭ ىشىندە قىتايلىقتار مەن رەسەيلىكتەردىڭ سانى باسىم بولعانى دا بەلگىلى. ال كونسەرتتىڭ ۇيىمداستىرىلۋ دەڭگەيىنە ءار ءتۇرلى پىكىرلەر ايتىلسا دا، شەتەلدىك تۋريستەردىڭ ديماشتىڭ ونەرىنە، قازاقستان، استانا جانە ەكسپو كورمەسىنە دەگەن ىقىلاسى ەرەكشە.
تومەندە «قازاقپارات» ح ا ا ديماشتىڭ كونسەرتىنە ارنايى كەلگەن قىتايلىق تۋريستەردىڭ قازاقستان جايلى پىكىرلەرىن ۇسىنادى.
ديماش كەلىسىم شارتقا وتىرعان BGTalent -黑金经纪 پروديۋسەرلىك ورتالىعىنىڭ نەگىزىن قالاۋشى ءارى باس ديرەكتورى نيە سينيۋان (聂心远) «باستاۋ» كونسەرتىنە ارنايى كەلدى. نيە مىرزا ءوزىنىڭ Weibo پاراقشاسىندا «كوركەم استانا، كەلەسى كەزدەسكەنشە»، «ەستەن كەتپەس كۇندەر، قوناقجاي حالىق» جانە «كەلەسى كەزدەسكەنشە، پەرىشتە داۋىستى ديماش، وتە كەرەمەت كەش»، - دەگەن پىكىرلەرمەن فوتولار جاريالادى.
قىتايدىڭ جۇلدىزى، ديماشتىڭ «Singer 2017» بايقاۋىنداعى باستى قارسىلاسى جانە «باستاۋ» ءان كەشىنىڭ قۇرمەتتى قوناعى لين چجيسيۋان «كەشە ديماش وتە جاقسى ونەر كورسەتتى. مەن وعان قاراپ وتىرىپ، ونى شىن جۇرەگىممەن ماقتان تۇتتىم»، - دەپ جازدى ءوزىنىڭ Weibo پاراقشاسىنا.
ال كونسەرتتى تاماشالاۋ ءۇشىن ارنايى قىتايدان كەلگەن جانكۇيەر بۇعان دەيىن قازاقستان تۋرالى بىلمەيتىندىگىن جانە بۇل كۇندە قازاقستان مەن ديماش قىتايلار ءۇشىن ءبىر ۇعىم بولىپ كەتكەنىن ايتتى. سونىمەن قاتار، استانا جانە الماتى قالاسىنىڭ، بۋراباي جانە شارىن شاتقالىنىڭ اسەم تابيعاتى قىتايلىقتارعا ەرەكشە اسەر قالدىرعان.
«ءبىز ديماش قۇدايبەرگەندى ەرەكشە قۇرمەتتەيمىز. ونىڭ جۇرگەن جەرىن كورۋ ءۇشىن قازاقستانداعى كونسەرتىنە ارنايى كەلدىك. ماعان استانا ەرەكشە ۇنادى. بۇندا بەيجىڭ قالاسىمەن سالىستىرعاندا اشىق اسپان، تازا اۋا. ازىق- تۇلىك ساپاسى جانە ۇلتتىق تاعامداردىڭ ءدامى ەرەكشە. كونسەرت وتە جوعارى دەڭگەيدە ءوتتى. ديماشتىڭ 2 ساعات دەمالماي ءان ايتقانىنا ىشتەي جۇرەگىم اۋىردى، ول قاتتى شارشاعان شىعار دەپ ويلايمىن. بۇگىن الماتىدان قىتايعا قايتامىز. قوناق ءۇيدىڭ قىزمەت كورسەتۋ ساپاسى وتە جوعارى دەڭگەيدە، ورتاسى جانە تابيعاتى تاماشا جەرگە ورنالاسقان. بۇل ساياحاتىم مەن ءۇشىن ەرەكشە بولدى»، - دەيدى ءانشىنىڭ فاناتى تان ميليڭ.
سونداي- اق، كەي قىتايلىق قوناقتار قازاقستاندا ۇيالى بايلانىس جەلىسىنىڭ ناشار ەكەنىنە شاعىمداندى. «G4 ينتەرنەتى دەپ كورسەتىپ تۇر، ايتسەدە G3 جىلدامدىعىندا جۇمىس ىستەيدى. استانادان الماتىعا بارار جولدا ءتىپتى G2 ينتەرنەتتە، بايلانىستا شىقپاي قالدى»، - دەپ جازدى ين يۋچەن اتتى جانكۇيەر weibo پاراقشاسىندا.
ايتا كەتەيىك، بۇعان دەيىن قازاقستاندا الەۋمەتتىك جەلىلەردە «باستاۋ» كونسەرتىنىڭ ۇيىمداستىرىلۋ دەڭگەيىنىڭ ديماشقا ساي ەمەس ەكەندىگى، انشىگە شەتەلگە بارىپ ءوزىن دامىتۋ كەرەك ەكەندىگى جايلى پىكىرلەر ايتىلعان بولاتىن.
اۆتور: مۇحتار قاليموللا ۇلى