قالتادان اقشا شىعارماي قالاي ساداقا بەرۋگە بولادى؟

استانا. قازاقپارات - كەيدە قانشا جاقسىلىق جاساعىمىز كەلسە دە، قالتامىزدان اقشا شىعارىپ، وزگەلەرگە ساداقا بەرۋگە مۇمكىندىك تۋماي جاتادى.

مۇنداي جاعدايدا نە ىستەۋگە بولادى؟ قالتامىزدى جۇقارتپاي- اق جاقسىلىق جاساپ، ساۋاپ تابۋدىڭ جولدارى بار ما؟

بۇل تۋرالى ummet.kz حابارلايدى.

شىندىعىندا، ساۋاپ تاپقىسى كەلگەن ادام ءۇشىن يگىلىككە اپاراتىن جول وتە كوپ. ەندەشە، نازار سالىڭىز. اللا تاعالا قۇراندا: «قايىردان نە ىستەسەڭدەر دە، كۇدىكسىز اللا ونى بىلەدى»، «سوندا كىم زاتتىڭ ەڭ كىشكەنتاي بولشەگىنىڭ سالماعىنداي جاقسىلىق ىستەگەن بولسا، ول ونى كورەدى» - دەيدى. ال ادامنىڭ جۇزىنە جىميىپ قاراۋ دا - ساداقا.

پايعامبارىمىز: «ەش ۋاقىتتا شاريعاتتىڭ رۇقسات ەتكەنىن ەلەمەۋشى بولما، كەرەك دەسەڭ، ول باۋىرىڭدى كۇلىمدەپ قارسى الۋ تۇرعىسىنان بولسا دا»، - دەپ كۇلىمدەۋدىڭ دە ومىردە ءوز ماڭىزى بار ەكەنىن ايتىپ كەتكەن.

قالتاڭىزدان قاراجات شىعارماي ساداقا بەرەم دەسەڭىز، بار بولعانى مىنا امالدى جاساڭىز.

جولدان كەدەرگىنى الىپ تاستاۋ دا ساداقانىڭ تۇرىنە جاتادى. وزگەلەرگە كەدەرگى كەلتىرەتىن ارتىق زاتتى الىپ تاستاۋ دا - ساۋابى مول يگى ءىس. سەبەبى، پايعامبارىمىز «مەن ءجانناتتا، وسى دۇنيەدە مۇسىلمانداردىڭ جۇرۋىنە كەدەرگى جاساعاندىعى ءۇشىن، كەسىپ تاستاعان اعاشىنىڭ كولەڭكەسىندە راحاتتانىپ جاتقان ادامدى كوردىم»، - دەگەن.

ۇنەمى جاقسى سويلەۋگە تىرىسىڭىز. جاقسى ءسوز سويلەۋ - ساداقا. ءوزىنىڭ شىنشىلدىعىمەن تانىلعان ءابۋ باكىر (ر. ا) ءجيى-ءجيى ءتىلىن قولىمەن ۇستاپ تارتادى ەكەن. حازىرەتى ومار (ر. ا) مۇنىڭ سىرىن سۇراعاندا: «بۇل - ماعان قاۋىپ توندىرەدى» دەپ جاۋاپ بەرەتىن كورىنەدى. شىندىعىندا، ءالي يبن ءابۋ تاليب ايتقانداي، «جۇرەك تازا بولعاندا عانا تىلدەن ادەمى ءسوز شىعادى». ال ءسىز كۇندەلىكتى سويلەگەن سوزدەرىڭىز ارقىلى دا ساۋاپ، نە كۇنا ارقالاي الاسىز. ماسەلەن، بىرەۋگە كومپليمەنت ايتۋ. كومپليمەنت (قوشەمەت، ماراپات) - ادام كوڭىلىنە قۋانىش سىيلايتىن، مارقايتاتىن ءسوز. ونى ءتىپتى موتيۆاتسياعا دا(ىنتالاندىرۋعا) اينالدىرۋعا بولادى. ويتكەنى، ءوزى تۋرالى جاقسى پىكىردى ەستىگەن ادام ودان دا جاقسى بولۋعا تىرىسادى. بۇل، اسىرەسە، ەرلى- زايىپتىلارعا اسا قاجەت ادىستەردىڭ ءبىرى.

اللانى ۇنەمى ەسكە الىپ ءجۇرۋ. اللا ەلشىسى: «كۇن شىققان ءار كۇنى ءارقايسىسىڭ دەنەلەرىڭدە نەشە بۋىن بولسا، سونشا ساداقا بەرۋگە تيىستىسىڭدەر. ءاربىر ايتىلعان «سۋبحانا- للاھ»ساداقا بولىپ تابىلادى جانە، «ءالحامدۋ لي- للاھ» ساداقا بولىپ تابىلادى جانە ءار ءبىر ايتىلعان «ءلا ءيلاھا يلا- للاھ» ساداقا بولىپ تابىلادى جانە ءاربىر ايتىلعان «اللاھۋ اكبار» ساداقا جانە جاقسىلىققا شاقىرۋ ساداقا بولىپ تابىلادى، جاماندىقتان تىيۋ ساداقا، ءبىراق وسىنىڭ ءبارىن تاڭەرتىڭگىلىك وقىعان ەكى باس ءناپىل ناماز (دۋحا) اۋىستىرا الادى»، - دەگەن (مۋسليم).

ءاربىر ءتىرى نارسەگە جاسالعان جاقسىلىقتا ساۋاپ بار! «بىردە ءوزىنىڭ جولىمەن كەلە جاتقان ادام قاتتى شولدەي باستايدى. ول ءبىر قۇدىق تاۋىپ، وندا ءتۇسىپ ءشولىن قاندىرىپ شىققاندا، شولدەگەننەن لاي توپىراقتى جەپ جاتقان ءبىر ءيتتى كورەدى. وسىنى كورگەن ول وزىنە- ءوزى: «بۇل يت مەن شولدەگەندەي قاتتى شولدەپ جاتىر»، - دەيدى دە، قايتادان قۇدىققا ءتۇسىپ اياق كيىمىنە سۋ تولتىرىپ، ونى تىسىمەن تىستەپ سىرتقا كوتەرىلگەنشە تىسىنەن تۇسىرمەيدى. سوسىن سىرتقا شىعىسىمەن ءيتتىڭ ءشولىن قاندىرىپ سۋ بەرەدى. وسى امالى ءۇشىن اللا ول ادامنىڭ بۇكىل كۇنالارىن كەشىرىپ العىسىن بىلدىرەدى». مۇنى ەستىگەن ادامدار: «ءيا اللانىڭ ەلشىسى، بىزگە حايۋاندار ءۇشىن دە ساۋاپ بەرىلە مە؟»، - دەپ سۇرايدى. سوندا پايعامبارىمىز: «ساۋاپ بارلىق ءتىرى جان ءۇشىن بەرىلەدى»، - دەپ جاۋاپ بەرگەن (بۇحاري، مۋسليم).