بۇل تۋرالى ەۆرازيا ءبىرىنشى ارناسى حابارلايدى.
جاڭا كاسىپتى تۋعان ابىسىندى- كەلىندەر باستاپ جاتىر. ەر ازاماتتار نە دەيدى؟ كوپتى كورگەن اجەلەر شە؟
كەلىندەردىڭ ءار كۇنى باسىنا ورامال تاعۋمەن باستالادى. تاپسىرىستى قابىلداعان سوڭ ولار ءۇي شارۋاسىن ءوزارا ءبولىسىپ الادى. ءبىرى شاڭ سۇرتەدى، ءبىرى ءۇي سىپىرادى، ەندى ءبىرى مىناداي داستارقاندى جايناتىپ تاستايدى.
بۇل - ءتورت ابىسىننىڭ بۇگىنگە جايعان داستارقانى. بارلىق تاعام قولدان جاسالعان. بۇدان وزگە ولار بوتەننىڭ ۇيىندە «وتپەن كىرىپ، كۇلمەن شىعۋعا» دايىن. ءوز ىستەرىنە ارلانبايدى دا. ويتكەنى، قوماقتى قارجى الادى.
«قاراجاتتىڭ تولەمى جاسالعان جۇمىسقا بايلانىستى. كەيدە تەك ءۇي جيناتادى. قوناق كۇتۋ. سوڭعى كەزدە تاپسىرىستا ۆارەنە جاساۋ جۇمىس كولەمىنە بايلانىستى 20 مىڭنان باستالادى» - كاسىپكەر اينۇر قالكەن.
ساعاتىنا 20 مىڭدىق كەلىندەر توي- دۋمانداردا ءبىر ەمەس تورتەۋى قاتار جۇرەدى. الدى ارتىڭىزعا ءتۇسىپ، كوڭىلىڭىزدى اۋلايدى. سوندىقتان قالتاسى قالىڭ وتباسىلار كەيدە التى كەلىننىڭ كەلۋىن تالاپ ەتەدى ەكەن. اسىرەسە، ەل الدىندا جۇرگەن ازاماتتاردىڭ «ەركە كەلىنشەكتەرى» «تىرناق استىنان كىر ىزدەپ» وتىرادى دەيدى.
« ءبىز ونداي سوزدەرگە رەنجىمەيمىز. ءوزىمىز ايەل بولعاندىقتان ايەلدىڭ مىنەزى سونداي بولىپ كەلەدى. ءبىز ونداي سىندى دۇرىس قابىلدايمىز. جۇمىس بولعان سوڭ سىنداردى دا قابىلداۋ كەرەك» - اقىلى كەلىن انار جارتىبايەۆا.
اقىلى كەلىندەردى بۇگىنگىنىڭ ەنەلەرى قولداپ وتىر. كەزىندە وزدەرى جاققان قازان وشاقتى ءوز پەرزەنتتەرى ۇستاماسا دەيدى. سوندىقتان بولار، جالدامالى كەلىنشەكتەردىڭ كومەگىنە اجەلەر جاعى مۇقتاج.
«ەگەر مەن ۇلكەن توي جاساپ جاتسام، قۇدالىق شاقىرىپ جاتسام ءبىر بولعان مەرەكەگە نەگە ايايمىن. كەلگەن قوناقتارىمنىڭ كوڭىلىنەن شىعىپ جاتسا» .
«جالداۋعا بولادى، جالدايمىز. ونداي ادامدار كەلەدى وزدەرى سۇرايدى. ءبىز كەلسەك بولا ما دەپ. وندايدا جالدايمىز ارينە» .
ال، ەر ازاماتتار جاعى «اقىلى كەلىندى» قۇپتامايدى. ۇيىمىزدەگى جەتەدى دەيدى. ونىڭ ۇستىنە، دامىعان زاماندا ايەل ادامدارىنا ءبارى وڭاي، تەك « ءبىر تەتىكتى باسۋ عانا قالدى» دەگەن پىكىردە. ونى دا وزگەنىڭ جۇبايى باسسا، ەركەكتىگىمىزدەن نە قالدى دەپ وتىر.
« ءۇيدى جيناپ بەرۋگە ما؟ ءوزىمىز جينايمىز. ايەلىم بار عوي. بىرەۋدىڭ ايەلىن نە قىلام؟ »
«كەلىنشەك بار، قىزىم بار، سولار كومەكتەسىپ تۇرادى. ال انداي اقشا تولەپ ۇستاۋعا جالداپ وتىرا المايمىن» .
ءتورت ابىسىندى كەلىننىڭ بۇل باستاماسىنا تەك بەيتانىس ەر ازاماتتار عانا ەمەس، ءوز جولداستارى دا اتىنان شوشىپ، قارسى بولىپتى. ءتىپتى تۋىستارى تۇبەگەيلى رۇقسات بەرمەگەن. ءبىراق، تابىس كىرگەن سوڭ اقىرى كونىپتى. ەندى ولار ورتالىقتى ۇلعايتۋدى كوزدەپ وتىر.