رەجيسسەر ديماش قۇدايبەرگەننىڭ كونسەرتىنە قالاي دايىندالعانىن ايتىپ بەردى
«قازاقپارات» اگەنتتىگىنىڭ ءتىلشىسى «باستاۋ» دەپ اتالعان قايتالانباس شوۋدىڭ دايىندىعى تۋراسىندا رەجيسسەر اننا وبويانسكايامەن اڭگىمە ءوربىتتى.
- فونتاندار كونسەرتتىڭ كوركىن ەرەكشە كەلتىرگەنى ءسوزسىز. بۇل تاڭداۋ قالايشا ويلارىڭىزعا كەلدى؟
- شوۋ ۇيىمداستىرۋدا مۇمكىندىگىمىز ازداۋ بولعاندىقتان، فونتانداردى قوسۋ تۋرالى يدەيا ويىمىزعا كەلدى. جابىق عيماراتتا پيروتەحنيكالىق زاتتاردى قولدانۋعا تىيىم سالىنعان. ال وتشاشۋلار ساحنالىق ءسان- سالتاناتتىڭ ەرەكشە ءبولىمى ەكەنىن بىلەسىز. ءبىز جارىقپەن جانە بۋمەن عانا جوعارى دارەجەدەگى كونتسەرتتى وتكىزۋ قيىنعا سوعاتىنىن ەسكەرىپ، كورەرمەندەردى تامساندىرا الاتىنداي امال قاراستىردىق. وسىلايشا، تاڭداۋ فونتاندارعا ءتۇستى. وتشاشۋدى قولدانا الماعان ەكەنبىز، ەندەشە شەشىمدى سۋدان ىزدەپ تاپتىق. فونتاندار ساحناعا وسىلاي ورناتىلدى.
- ءبىر ءانىن ورىنداۋ بارىسىندا ديماش جەردەن بيىك كوتەرىلىپ كەتتى. بۇنى ۇيىمداستىرۋ قيىنعا سوقتى ما؟ انشىگە ارنايى كۋرستان وتۋگە تۋرا كەلدى مە؟
- ارينە، تاس- ءتۇيىن دايىندىق تالاپ ەتىلدى. وسى تۇستا ءبىز كاسىبي كاسكادەرلىق كوماندانى كومەككە شاقىردىق. ولار - الماتىلىق كاسكادەرلار، ءبىراق بۇكىل الەمگە تانىمال، گولليۆۋدتا ونەر كورسەتكەن. شوۋدا ونەر كورسەتىپ، كينوعا دا ءتۇسىپ جۇرگەن ارتىستەر ءۇشىن اسپانعا اۋەلەۋدى ۇيرەتۋ اسا قيىن شارۋا بولمادى. ولار ديماش ءۇشىن ارنايى شەبەرلىك ساباقتارىن وتكىزىپ، ءبىراز دايارلادى. البەتتە، كەيبىر نومىرلەردى ورىنداۋ ءۇشىن فيزيكالىق جانە تەحنيكالىق كۇش- قۋاتتى سالۋعا تۋرا كەلەدى. ساحنادا ءبارى دە وپ- وڭاي كورىنگەنىمەن، ءبىر ساتتىك نومىرلەردىڭ ارتىندا تولاعاي ەڭبەك تۇر. ۇشىپ ءجۇرىپ كۇشىڭدى سارقۋ، بۇعان قوسا ءان سالۋ - وڭاي ەمەس. ارينە، ديماش ءبىزدىڭ جاراپ تۇر: «ەڭ بيىك تىرەۋگە ۇشىپ شىعىپ، ەڭ جوعارعى نوتانى الامىن» دەپ ازىلدەيدى. ءبىراق، بۇلايشا ونەر كورسەتۋ قاراپايىم تاپسىرمالاردىڭ ءبىرى ەمەس ەكەنىن بىلەمىز. كورەرمەندەر تەك تروستى كورگەن بولار، ال شىن مانىندە، كوستيۋم ىشىندە ۇستاپ تۇراتىن تىرەۋىش، ونىڭ ىشىنە كاسكادەرلىق كورسەت بار ەدى. ول ديافراگمانى قاتتى قىسىپ تۇردى. بارلىق ۆوكاليستەر ديافراگمامەن ءان شىرقايتىنى بەلگىلى. سوندىقتان، ديماشقا جۇكتەلگەن تاپسىرما تىم كۇردەلى بولدى. ءبىراق، مەنىڭشە، ول كوپشىلىك كۇتكەن ۇدەدەن شىعا ءبىلدى.
- ساحنادا ەكى ۇلكەن ۆەرتيكالدى ەكران ورناتىلدى. كەيبىر كورەرمەندەرگە سول ەكراندا دۋەت كەزىندە تەك ءبىر ءانشىنىڭ عانا كورىنىپ تۇرعانى ۇناماي قالعان سەكىلدى...
- ءارتىستى ساحنادا ەرەكشە كورسەتۋ ءۇشىن ەكرانداردىڭ مۇنداي فورماتى ارنايى تاڭدالىپ الىنعان. ءداستۇرلى گوريزونتالدى ەكراندى تاڭداپ الساق، ءبىز تەك انشىلەردىڭ باسى مەن كەۋدە تۇسىن عانا تاماشالايتىن بولامىز. ال بۇل جاعدايدا ءانشىنىڭ بۇكىل تۇرپاتى كورىنىپ تۇردى. ەشقانداي كولدەنەڭ دۇنيە كورسەتىلگەن جوق، بوس كەڭىستىك كادردان تىس قالدى. دۋەت بويىنشا كەلىسپەيتىن ءۋاجىم بار: ءبىز بۇل باعىتتا جۇمىس جۇرگىزدىك. دۋەت كەزىندە ارتىستەر كەزەك- كەزەك ءان ايتتى. دەمەك، ديماش ءان سالعاندا كامەرا سونى تۇسىرسە، كريستينا ورباكايتە ءان شىرقاعاندا نازار وعان قاراي اۋدى. مۇمكىن، ولار ءبىر ۋاقىتتا كادردا بولماعان شىعار، ءبىراق ولاردىڭ بىرلەسكەن بەينەجازباسىن تەلەنۇسقادان كورۋگە بولادى. تەلەنۇسقا كونسەرتتىڭ وزىنەن كەم تۇسپەۋى كەرەك. ءبىزدىڭ كومانداعا بەرگەن مىڭداعان كورەرمەن مەن الەۋمەتتىك جەلى قولدانۋشىلارىنىڭ العىستارىنا قاراپ، ءبارى ويداعىداي ءوتتى دەگەن ويدامىز.
- ءان ءماتىنى جازىلعان تيترلى ەكراندار قالايدا ارتتا قالىپ قويدى دا، كورەرمەندەر ءۇشىن ءماتىندى وقۋ ىڭعايسىز بولعانداي.. .
- مەن تۇسىنەمىن. بۇل ستاديوننىڭ بىردەن- ءبىر ستاتسيونارلى ەكرانى ەدى. ونى ءبىز ورناتقان جوقپىز. بارلىق ەكران كونتەنت شوۋعا بەيىمدەلگەندىكتەن، تەك ستاديوننىڭ ەكرانى عانا بوسادى. سول سەبەپتى، كورەرمەندەر ءۇشىن كاراوكە سوندا ورناتىلدى.
- كونسەرتتى ۇيىمداستىرۋ قانشالىقتى قيىنعا ءتۇستى؟
- ءيا، جۇمىس تىم اۋقىمدى بولدى. بارلىعىن دا الەمدىك دارەجەدە وتكىزۋ تۋرالى تالاپ قويىلدى. دەسە دە، كوماندا قۇرامىنداعىلاردىڭ بارلىعىنىڭ ديماشقا ىقىلاسى ەرەكشە بولعاندىقتان، ەكىنشىدەن ديماشتان ەرەكشە ەنەرگەتيكا ەسىپ تۇرعاندىقتان، ايتارلىقتاي قيىن بولمادى. دايىندىق پروتسەسىن جۇرگىزۋ: العاشقى باسپالداعىنان سوڭىنا دەيىن جەتكىزۋ، باعدارلامانى زەرتتەپ باستاعاننان- اق ءار ءنومىردى ويلاستىرۋ، دايىندىق ساتىلارى، قيىن تريۋكتاردى جاساعان كاسىبي كاسكادەرلاردىڭ ۇشۋى مەن قۇلاۋى - قيىنعا سوقپادى. بارلىعى دا ورتاق ىسكە جۇدىرىقتاي جۇمىلدى. پروتسەسكە قاتىسۋشىلاردىڭ ءبارى دە - ديماشتان باستاپ تەحنيكاعا دەيىن بارىن دا، جانىن دا سالدى. شارشاڭقىلىق پەن ۇيقىنىڭ قىسقانىنا قاراماستان جۇمىس جۇرگىزۋدىڭ ءوزى عانيبەت دەرلىكتەي كەرەمەت اتموسفەرا قۇرىلدى.
- ديماشتىڭ كونسەرتى باس- اياعى 4 ساعاتقا سوزىلدى. شارانى سونشا ۋاقىتقا سوزۋ جوسپاردا بار ما ەدى؟
- ديماشتىڭ جەكە كونسەرتى 2,5 ساعاتقا سوزىلدى. بۇل كونسەرتتىڭ باسىم بولىگى ەدى. شارانى الدىن الا «قىزدىرىپ الۋ» ارينە، الەمدىك شوۋ- بيزنس تاجىريبەسىندە بار قۇبىلىس. سان جەتپەيتىن كورەرمەندەر ءبىر ۋاقىتتا ءبىر زالعا سىيىپ كەتە المايدى. ستاديوندى لىق تولتىرۋ ءۇشىن قاجەتتى ۋاقىت كەرەك. سوندىقتان، ديماشتى بىردەن شىعارماي، ۋاقىتتا ازداپ سوزا تۇرۋ ارقىلى، بىرىنشىدەن، ستاديوندى تولتىرىپ الساق، ەكىنشىدەن كوپشىلىكتىڭ تەزىرەك ديماشتى كورگىسى كەلەتىن قۇشتارلىعىن كۇشەيتە بىلدىك دەگەن ويدامىن.
- سۇحباتتاسقانىڭىزعا راحمەت!