قازاق كۇرەسىنەن «قازاقستان بارىسىنا» بالۋانداردى ىرىكتەۋ وزگەرۋى مۇمكىن

استانا. قازاقپارات - «قازاقستان بارىسىنا» قاتىساتىن بالۋاندار رەيتينگ بويىنشا ىرىكتەلۋى مۇمكىن، دەپ حابارلايدى قازاقپارات ءتىلشىسى.

بۇل تۋرالى بۇگىن قازاق كۇرەسىنەن «قازاقستان بارىسى» VII رەسپۋبليكالىق تۋرنيرىنە وراي استانادا وتكەن باسپا ءسوز ءماسليحاتىندا «قازاقستان بارىسى» قازاق كۇرەسىن دامىتۋ قورىنىڭ ءتوراعاسى ارمان شورايەۆ ءمالىم ەتتى.

«بولاشاقتا بالۋاندار رەيتينگ بويىنشا قاتىسۋى مۇمكىن. قازىر كەيبىر وبلىستاردا قازاق كۇرەسى قاتتى دامىپ كەلە جاتسا، كەي وڭىرلەردە جاعداي ءماز ەمەس. ولار «قازاقستان بارىسىنا» جىل سايىن قاتىسقانىمەن، ەشقانداي ناتيجە كورسەتىپ جاتقان جوق. سول ءۇشىن بالۋانداردىڭ رەيتينگىنە قاراي تالداۋ جاساۋعا كوشۋىمىز مۇمكىن»، - دەدى ول.

سونىمەن قاتار ارمان شورايەۆ «قازاقستان بارىسىنا» قازىلىق ەتەتىن تورەشىلەر جارىس الدىندا قورعا اقشا تولەيتىنىن ءمالىم ەتتى. «قازاقستان بارىسىندا» 6 تورەشى قىزمەت ەتەدى. ولار جارىسقا دەيىن «قازاقستان بارىسى» قازاق كۇرەسىن دامىتۋ قورىنا 200 مىڭ تەڭگە كولەمىندە قارجى وتكىزەدى. ەگەر تورەشى ءادىل قازىلىق جاساسا، ادىلدىگى ءۇشىن ءوزى بەرگەن اقشاعا 300 مىڭ كولەمىندە سىياقى قوسىپ الادى. ال بىرەۋگە بۇيرەگى بۇرىلىپ، بارماق-باستى ارەكەتتەرگە بارسا، اقشاسى قوردىڭ ەسەبىنە وتەدى. سونىمەن بىرگە ءتيىستى جازاعا تارتىلادى»، - دەدى ا. شورايەۆ.

ەستەرىڭىزگە سالا كەتەيىك، جەتىنشى رەت وتكەلى جاتقان «قازاقستان بارىسى» رەسپۋبليكالىق ءتۋرنيرى شىلدەنىڭ 2 ءسى كۇنى «بارىس-ارەنا» سارايىندا وتەدى. وندا ەلىمىزدىڭ 14 وبلىسى مەن استانا جانە الماتى قالالارىنان ەڭ مىقتى دەگەن 34 بالۋان باق سىنايدى.

اۆتور: كۇنسۇلتان وتارباي