قازاق ادەبيەتىنە تۇرىك وقىرماندارىنىڭ قىزىعۋشىلىعى زور - دجەميلە كىنادجى
اكادەميا قىزمەتكەرلەرىمەن وتكەن باسقوسۋدا ادەبيەتشىلەر قازاق-تۇرىك ادەبي بايلانىسى، اۋدارما ماسەلەسى توڭىرەگىندە جان- جاقتى اڭگىمەلەدى. ءبىراز جىلدار بويى قازاق ادەبيەتىن زەرتتەپ جۇرگەن دج. كىنادجى حانىم ج. ايماۋىتوۆ، س. مۇقانوۆ، م. اۋەزوۆ، ءا. كەكىلبايەۆ، م. ماعاۋىن سەكىلدى كورنەكتى جازۋشىلاردىڭ 16 رومانىن زەرتتەپ، تۇرىك تىلىندە مونوگرافيالىق ەڭبەك جاريالاعان ەكەن. س. سەيفۋلليننىڭ «كوكشەتاۋ» پوەماسى مەن ع. مۇسىرەپوۆتىڭ «ۇلپان» رومانىن تۇرىك تىلىنە اۋدارىپ، كىتاپ ەتىپ باسىپ شىعارعان عالىمنىڭ ايتۋىنشا، تۇرىك وقىرماندارىنىڭ قازاق ادەبيەتىنە دەگەن قىزىعۋشىلىعى ەرەن.
اسىرەسە، كۇرەسكەر قازاق ايەلىنىڭ وبرازى سومدالعان «ۇلپان» تۇركيالىق وقىرمان تاراپىنان زور ىقىلاسقا يە بولعان شىعارما دەيدى. ال، قازاقستان تاۋەلسىزدىگىنىڭ 25 جىلدىعىنا وراي 25 قازاق قالامگەرىنىڭ شىعارمالارىن تۇرىك تىلىنە اۋدارىپ باسقان جازۋشى م. وتاربايەۆ اۋدارما ماسەلەسىنىڭ قىر-سىرى جونىندە ءوز ويلارى مەن تاجىريبەسىمەن ءبولىستى.
قازاق- تۇرىك ادەبيەتىنىڭ ۇقساستىعى مەن ايىرماشىلىقتارى، زەرتتەلۋى جونىندە دە پايىمدى پىكىرلەرىن ورتاعا سالدى. جازۋشى- اۋدارماشى م. وتاربايەۆ بۇگىندە تانىمال تۇرىك اقىنى ءجۇنىس امىرەنىڭ شىعارمالارىن قازاقشاعا اۋدارۋدا ەكەن. تاياۋدا قازاق وقىرماندارىنا كىتاپ كۇيىندە ۇسىنامىز دەدى. ايتا كەتەرلىگى، بۇل كەزدەسۋ ەكسپو-2017 كورمەسىنە وراي يۋنەسكو جانە يسەسكو قامقورلىعىمەن استانادا ءوتىپ جاتقان «وقۋ الەمىندەگى وقىرمان ۇلت» حالىقارالىق كىتاپحانا سيمپوزيۋمى اياسىندا ۇيىمداستىرىلدى.