شەتەلدەگى قازاق بالالارى اقتوبەگە جينالىپ، «قازاقستان - اتا جۇرتىم، قاسيەتىم - انا ءتىلىم!» اتتى ⅩⅣ حالىقارالىق وليمپياداعا قاتىستى. اتاجۇرتتى كورگەن ءار بالانىڭ قازىرگى ارمانى - وتانعا ورالۋ. ولار قازاقستانعا كوشىپ كەلۋدىڭ جولدارىن ىزدەپ ءجۇر. كەيبىرى ءبىلىم الىپ، تۇراقتى قونىستانۋدى ويعا العان. يراندا تۇراتىن موحامماد تاني قازاق ءتىلىنىڭ اتادان بالاعا ميراس بولىپ، ۇرپاقتان ۇرپاققا امانات ەتىپ، تارالعانىن ايتىپ بەردى. «يراندا قازاقشا مەكتەپ جوق. ءبىز ءتىلدى اتا- انامىزدان ۇيرەنەمىز. يرانداعى قازاقتار انا ءتىلىن اتادان بالاعا ميراس ەتىپ قالدىرىپ، ۇيرەتىپ كەلەدى. سوڭعى جىلدارى ءتىلىمىز ۇمىتىلىپ بارادى، سوزدەرىمىزدىڭ اراسىندا پارسى تىلىندە ايتىلىپ جاتادى. يرانداعى بالاباقشادا پارسى ءتىلى، مەكتەپتە پارسى ءتىلى، وقۋ ورنى دا مەملەكەتتىك تىلدە ءبىلىم الامىز. قازاق مەكتەبى اشىلسا قۋانار ەدىك. قازاق بالالارى انا ءتىلىن ءبىلىپ، بويعا ءسىڭىرىپ ءوسۋدى ارماندايدى» ، - دەيدى موحامماد تاني.
پارسى جانە اعىلشىن تىلدەرىن جەتىك مەڭگەرگەن قازاق بالاسى ەندى قازاقشا جازۋدى ۇيرەنبەك. ول ينتەرنەتتىڭ ەمەس، كىتاپتىڭ كومەگىنە جۇگىنگەن. ءوز- وزىنە سەنىمدى موحامماد ءبىر جىلدا جازۋدى مەڭگەرىپ، كەلەسى ساپارىندا ءوز قانداستارىمەن تەڭ دارەجەدە تىلدەسۋدى جوسپارلاپ قويعان. «قازاقستانعا كوشكىمىز كەلەدى. يراندا اتا- انامىز جۇمىس ىستەپ، ەڭبەك ەتىپ جاتىر. زەينەتكە شىققان سوڭ ەلگە ورالساق دەپ وتىر. يرانداعى قازاقتار ءبىر- ءبىرىن تانيدى، جاقىن ارالاسادى، ءبىر جەرگە قونىستانعان. ءۇش قالادا قازىر 5 مىڭ قازاق بار. بىزدە قازاقتىڭ سالت- ءداستۇرى ساقتالعان. ورازا ايت كەزىندە ءبىر- بىرىمىزگە قوناققا بارىپ، تويلايمىز. بەس ۋاقىت نامازدى ەر بالالار 12 جاستان باستاپ ۇيرەنىپ، وقيدى. ال قىزدار 9 جاسىندا باستايدى. تويىمىزدىڭ داستارحانىنا ۇلتتىق تاعامدار قويىلىپ، تۇساۋكەسەر، سۇندەت توي، ۇيلەنۋ تويى، بەتاشار سالىمىز ساقتالعان. ال بوس ۋاقىتىمدا باسكەتبول، ۆولەيبول، تەننيس وينايمىن. ۇزدىكتەردىڭ قاتارىندامىن، ۇنەمى جەڭىسكە جەتىپ ءجۇرمىن. بولاشاقتا سپورتشى بولۋدى ارماندايمىن» ، - دەدى ول.
ال وزبەكستاندا تۇراتىن ەربولات كامالوۆ بولاشاقتا فيلولوگ بولۋدى ارماندايدى. 18 جاستاعى جىگىت وزبەكستاندا كولىك جوندەۋدىڭ قىر- سىرىن مەڭگەرىپ ءجۇر. ءارى اسابا. جەتى ونەردىڭ يەسى ولەڭ شىعارىپ، ۇستاز بولۋدى ارماندايدى. «اقتوبە تۋرالى اقپاراتتى ينتەرنەت ارقىلى ىزدەپ، تانىستىم. اقتوبە كەلگەن سوڭ قوبدا اۋدانىندا بولىپ، كەڭەس وداعىنىڭ باتىرى ءاليا مولداعۇلوۆانىڭ تۋعان جەرىنە باردىم. قانداستارىمىزبەن كەزدەسىپ، مەيىرىمىن كوردىم. اقتوبەگە كەلىپ، تانىسقان سوڭ ولارعا باۋىر باستىپ قالدىم. قازاقتا «قانى تارتادى» دەگەن ءسوز بار. اتاجۇرتقا كەلىپ، ءوز ەلىمدى كورگەنىم مەن ءۇشىن باعا جەتپەس باقىت. ءاربىر قازاق وتانىنا ورالۋى كەرەك. مەن قازاقستانعا كەلىپ، وقىپ، ەل يگىلىگى ءۇشىن جۇمىس ىستەگىم كەلەدى» ، - دەدى ەربولات كامالوۆ.
وزبەكستاندا تۇراتىن قانداسىمىز مەكتەپتى قازاق تىلىندە وقىعان. ال كوللەدجدە كولىك جوندەۋشى ماماندىعىن وزبەك تىلىندە مەڭگەرىپ ءجۇر. قازاق تىلىنە جەتىك قانداسىمىز وزبەك تىلىنە كەلگەندە كەيدە ءمۇدىرىپ قالادى.
«وتباسىممەن كوشىپ كەلسەم دەگەن ارمانىم بار. ول ءۇشىن مەن قازاقستانعا تەگىن وقۋعا ءتۇسىپ، ءبىلىم الۋىم كەرەك. سول كەزدە اتا- انام كەلىپ، ءبارىمىز اتاجۇرتپەن قاۋىشار ەدىك» ، - دەدى ول.
ايتا كەتەيىك، ءبىلىم جانە عىلىم مينيسترلىگى «دارىن» رەسپۋبليكالىق ورتالىعىمەن بىرلەسە اقتوبە وبلىسىندا وليمپيادا وتكىزدى. ءبىلىم جارىسىنا قىتايدا، موڭعوليادا، وزبەكستاندا، يران مەن رەسەيدە تۇرىپ جاتقان قازاق بالالارى قاتىستى. وليمپيادا ناتيجەسى بويىنشا 10 جەڭىمپاز تەگىن وقۋعا گرانت ۇتىپ الدى. ولار قازاقستاننىڭ 10 جوعارى وقۋ ورنىندا ءبىلىم الادى.
اۆتور: التىناي ساعىندىقوۆا