كارىپبەك كۇيىكوۆ جولداردى جوندەتۋ ءۇشىن كارتينالارىن اۋكسيونعا قويدى

قاراعاندى. قازاقپارات - سۋرەتشى، اتوم حالىقارالىق جوباسىنىڭ قۇرمەتتى ەلشىسى، سەمەي يادرولىق پوليگونىنىڭ ەكولوگياعا كەرى اسەرى سالدارىنان مۇگەدەك بولىپ تۋىلعان كارىپبەك كۇيىكوۆ تۋعان جەرىندەگى جولداردى جوندەتۋ ءۇشىن ءوز كارتينالارىن اۋكسيونعا شىعاردى، دەپ حابارلايدى «قازاقپارات» ح ا ا ءتىلشىسى.

كارىپبەك كۇيىكوۆ تۋعان جەرى قارقارالى اۋدانى ەگىندىبۇلاق اۋىلىنداعى كولىك ينفراقۇرىلىمىن جاقسارتۋعا ءوز ۇلەسىن قوسۋدى شەشكەن. «مەن قاراعاندى وبلىسى قارقارالى اۋدانى ەگىندىبۇلاق اۋىلىنىڭ تۋماسىمىن. 18 -تامىز كۇنى قازاقستان قازىبەك ءبيدىڭ 350 جىلدىعىن اتاپ وتەدى. سالتاناتتى شارالار تۋعان ولكەم - ەگىندىبۇلاق اۋدانىنان باستالادى. ءبىراق وندا شەشىمدى شۇعىل قاجەت ەتەتىن پروبلەمالار باستان اسىپ جاتىر»، - دەيدى كارىپبەك كۇيىكوۆ.

قىس مەزگىلىندە ەگىندىبۇلاققا جەتۋ قيىن - جولدى قار بوراپ قالادى. ونى ەشكىم تازالامايتىندىقتان اۋىل تۇرعىندارى اپتالاپ جولعا شىعا المايدى. ال جازدا بۇزىلعان جولمەن ءجۇرۋ مۇمكىن ەمەس.



«جالپى، ەگىندىبۇلاقتا كۇن كەشۋگە جانە اۋىلدى گۇلدەندىرۋگە ەشبىر رەسۋرس جوق. كولىك جوق، اۋىل زامان اعىمىنان قالىپ قويعان. قاراعاندى- ەگىندىبۇلاق تراسساسى كوكتەمگى سۋ تاسقىنى سالدارىنان جىل سايىن بۇزىلا تۇسۋدە. ال ونى جوندەۋگە قارجى دا، مۇمكىندىك تە جوق. جالعىز جولمەن ادامدار ۇلكەن قاۋىپپەن ءجۇرىپ وتەدى (...) ەگىندىبۇلاق اۋىلىنىڭ تۋماسى رەتىندە باسىنان بەينەت كەتپەگەن اۋدانىمىز تۇرعىندارى اتىنان ينفراقۇرىلىمنىڭ دامۋىنا ءوز ۇلەسىمدى قوسسام با دەيمىن»، - دەيدى سۋرەتشى.

قارقارالى اۋدانىنىڭ اكىمدىگى ارنايى شوت اشىپ، جينالعان قاراجاتتى جولداردى جوندەۋگە جۇمساۋدى كوزدەپ وتىر. «مەن دە بۇل اكسياعا قاتىساتىنىمدى حابارلادىم. تۋعان اۋىلىمنىڭ وركەندەۋى ءۇشىن كارتينالاردى ساتۋدان تۇسكەن اقشانى وسى ماقساتتارعا بەرەمىن»، - دەپ اتاپ ءوتتى ول.

كارىپبەك كۇيىكوۆ - ق ر پرەزيدەنتى نۇرسۇلتان نازاربايەۆتىڭ باستاماسىمەن قۇرىلعان اتوم حالىقارالىق جوباسىنىڭ قۇرمەتتى ەلشىسى، «نەۆادا- سەمەي» انتيادرولىق قوزعالىسىنىڭ بەلسەندى مۇشەسى.

اۆتور: ميرا تولەندى قىزى