ديماشتىڭ استانادا وتەتىن شوۋ- كونسەرتى نەسىمەن ەرەكشەلەنبەك؟ - فوتو

استانا. قازاقپارات - مامانداردىڭ ايتۋىنشا، ءدال وسىنداي شىعارماشىلىق كەشتى بۇرىن-سوڭدى ەلىمىزدە بىردە ءبىر ءانشى ۇيىمداستىرىپ كورمەپتى.

ساحنادا جارق- جۇرق ەتكەن جارىقتاردان بولەك، شوۋعا كورىك بەرەتىن، ۇشاتىن ەكراندار مەن ارنايى سارقىرامالار دا ورناتىلماق.

بۇل تۋرالى 31-ارنانىڭ «جۇلدىزدار جارقىرايدى» باعدارلاماسىندا ايتىلدى.

«ديماش تاۋلىگىنە 14-15 ساعات جۇمىس ىستەپ جاتىر. ساحنادا حورەوگرافتار، حورەوگرافيالىق توپتار، رەجيسسەرلار، مۋزىكانتتار بارلىعى تىنىمسىز ەڭبەك ەتۋدە»، - دەيدى ديماشتىڭ اكەسى قانات ايتبايەۆ.

كوپشىلىك ۇزاق كۇتكەن ۇمىتىلماس كەشكە نەبارى 3-اق كۇن قالدى. ديماش كونسەرتكە قىزۋ دايىندالۋدا. ساحنادا ەركىن ءجۇرىپ-تۇرۋىن، ءبيىن جانە ايتاتىن اندەرىن پىسىقتاپ جاتىر.

ديماش بۇل كەشتە جاندى داۋىستا ءان ايتىپ قانا قويماي، اكتەرلىك شەبەرلىگىن دە تانىتپاق.

ول رەسەي ءانشىسى كريستينا ورباكايتەمەن بىرگە «وپيات مەتەل» ءانىن ورىنداپ، «يرونيا سۋدبى» كينوسىنداعى قوس عاشىقتىڭ ءرولىن سومدايتىن بولادى.