ەكسپو اياسىنداعى اقتوبە كۇندەرىنە ارنالعان شارادا ديماش ءان ايتادى
قالا تۇرعىندارى مەن قوناقتارىن ءوڭىردىڭ ۇزدىك شىعارماشىلىق ۇجىمى دايىنداعان مادەني- ساۋىقتىرۋ باعدارلاماسى كۇتەدى. سول ءۇشىن استاناعا اقتوبە وبلىسىنان 600-دەن اسا ونەرپاز كەلەدى. مەرەكەلىك شاراعا اقتوبە وبلىسىنىڭ اكىمى بەردىبەك ساپاربايەۆ قاتىسادى.
بىرەگەي شوۋ باعدارلامانى 26 - ماۋسىم كۇنى كەشكە وتەتىن ەكسپو-2017 كورمەسىنىڭ اۋماعىنداعى امفيتەاتر ساحناسىندا «اقتوبە - قۇتتى مەكەن» گالا كونسەرتى اشادى. وعان ديماش قۇدايبەرگەنوۆ، سونىمەن قاتار قازاق ەستراداسىنىڭ جۇلدىزدارى مەن اقتوبە وبلىسىنىڭ شىعارماشىلىق ۇجىمدارى قاتىسادى.
استانالىقتار ءۇشىن باستى سىيلىقتاردىڭ ءبىرى - تانىمال اقتوبەلىك ديماش قۇدايبەرگەننىڭ Bastau Live show جەكە كونسەرتى بولماق. 27 - ماۋسىم كۇنى استانالىقتار مەن استانا قوناقتارى ەرەكشە داۋىس يەسىن تىڭداپ، ونىڭ شىعارماشىلىعىنا ءتانتى بولا الادى.
بەس كۇن بويى «قازانات» قالالىق يپپودرومىنداعى ەتنواۋىلدا بارلىق كەلۋشىلەر ءۇشىن «اقتوبە وبلىسىنىڭ قازىناسى» ۇلتتىق ەتنوگرافيكالىق دۇنيەلەر كورمەسى، ال استانا گالەرەياسىندا «اقتوبە مانۋفاكتۋرالارى» اتتى كارتينالار كورمەسى مەن اقتوبە وبلىسىنىڭ اسا كورنەكتى ارحيتەكتۋرالىق ەسكەرتكىشتەرىنىڭ فوتوكورمەسى جۇمىس جاسايتىن بولادى.
27 - ماۋسىم كۇنى ساعات 15:00-دە «قازانات» يپپودرومىنىڭ اۋماعىندا وبلىستىڭ شىعارماشىلىق ۇجىمدارىنىڭ قاتىسۋىمەن «ەل جۇرەگى استاناعا - ارايلى اقتوبەدەن» اتتى تەاترلاندىرىلعان ەتنو كونسەرتتىك باعدارلاماسى وتەدى. اتاپ ايتقاندا، ا. جۇبانوۆ اتىنداعى قازاق حالىقتىق اسپاپتارى وركەسترى ونەر كورسەتىپ، ت. احتانوۆ اتىنداعى وبلىستىق دراما تەاتر ارتىستەرىنىڭ ورىنداۋىندا «ايمان- شولپان» مۋزىكالىق سپەكتاكلى، «الاقاي» قۋىرشاق تەاترىنىڭ «جاينا، جادىرا، دوستار» اتتى شوۋ باعدارلاماسى قويىلادى دەپ جوسپارلانۋدا.
بۇدان وزگە، 28 - ماۋسىمدا ق ر قارۋلى كۇشتەرىنىڭ اسكەري- تاريحي مۇراجايىنىڭ قابىرعالارىندا «اقتوبە - تاريح تولقىنىندا» اتتى كىتاپ كورمەسى مەن «دۋلىعالى دالا پەرزەنتتەرى» وبلىستىق تاريحي- ولكەتانۋ مۇراجايىنىڭ كورمەسى اشىلادى.
كىشكەنتايلار ءۇشىن «بايتەرەك» مونۋمەنتىنىڭ الدىنداعى الاڭدا 28 - ماۋسىم كۇنى ساعات 15:00-دەن 17:00-گە دەيىن «بالالارعا بازارلىق» ويىن- ساۋىق باعدارلاماسى ۇيىمداستىرىلاتىن بولادى.
مادەني باعدارلاما اياسىندا ۇلتتىق سپورت ويىندارىن، تازى جانە توبەت تۇقىمدى يتتەردىڭ كورمەسىن، «قازاق كۇرەسى» مەن «توعىزقۇمالاقتان» اشىق تۋرنيرلەر جانە ت. ب. ۇيىمداستىرىلماق.
اقتوبە وبلىسىنىڭ كۇندەرى 30 - ماۋسىم كۇنى كەشكە استانا اكىمدىگىنىڭ الدىندا ميراس پەن قۇرالاي بەكجانوۆتار، نۇرلان ابدۋللين، اللابەرگەن جاقسىبايەۆ سىندى وزگە دە قازاق جۇلدىزدارىنىڭ قاتىسۋىمەن وتەتىن «ارايلى رۋح - استانا» قورىتىندى گالا كونسەرتىمەن اياقتالادى.
اۆتور: مارلان جيەمباي