سەن سويلەپ، بىزگە مۇمكىندىك بەرمەگەندىكتەن ساعان حات جازۋدى ۇيعاردىم. «كوپ سويلەيسىز!» دەسەم، مەنىمەن ارا قاتىناسىڭىزدى ۇزەتىنىڭىز انىق. دەگەنمەن وزگەنىڭ ويى مەن پىكىرىنە قۇلاق اسپاستان سويلەي بەرۋ - ادەپسىزدىك. كوپ ءسوز - ادامنىڭ وزىنە دەگەن سەنىمسىزدىگىنىڭ بەلگىسى. ءسىز قوبالجيسىز، ال سويلەۋ - ءسىزدىڭ بۇنى جاسىرۋ ءۇشىن قولداناتىن قارۋىڭىز. اينالاڭىزداعى تانىستارىڭىزدىڭ بارلىعى ءسىزدى تىڭداپ وتىرعانداي كەيىپ تانىتادى. ءتىپتى، كەيدە اڭگىمەڭىز قىزىق دەگەندەي باستارىن يزەپ قويادى. بۇل - ولاردىڭ سىزگە دەگەن سىيلاستىعى. ءبىراق ءسىز تىنىشتالىپ، ءوز جۇمىسىڭىزبەن بۇل جەردى بوساتقان بويدا ءسىزدىڭ ارتىڭىزدا «اۋزى ءبىر جابىلمادى» دەپ شاعىم ايتارى انىق. كوپ سويلەيمىن دەپ قادىرىڭىزدى جوعالتىپ الاسىز. ۇنسىزدىك سىزگە جاراسادى دەپ تە ايتا المايمىن. ءبىراق ورىندى سويلەسەڭىز، سىزگە دەگەن قۇرمەتتىڭ ارتا تۇسەرى ءسوزسىز. ءسىز جاقسى ادامسىز، اقىلدىسىز، جايدارلىسىز ءارى تەرەڭنەن ويلايسىز. ەڭ وكىنىشتىسى سول - ءبىر سويلەسەڭىز ءسىزدى توقتاتۋ مۇمكىن ەمەس.
ءسىز جاساعان ءار باعالى تىرلىكتى كوپ ءسوزىڭىز شايىپ كەتەدى. تۇك تە قالمايدى. وسىلايشا تانىستارىڭىزعا ءىستىڭ ادامى ەمەس، ءسوزدىڭ ادامى رەتىندە اسەر قالدىراسىز. ءسىزدىڭ ويىڭىزداعى ارپالىستىڭ ەشكىمگە كەرەكگى جوق ەكەنىن ەسىڭىزدەن شىعارىپ الاسىز. سىزبەن الەم تۋرالى سويلەسۋگە بولادى. تابيعاتتى جىرلاۋعا بولادى. ءبىراق ءسىز ۇساق اڭگىمەلەردى ۇناتاسىز، اسىرەسە، ءوزىڭىز جايلى ءجيى ايتاسىز. بۇنىڭ ءبارى جالىقتىرادى. «نەگە مەنەن ادامدار تەز جالىعادى؟ » دەپ سۇراعانىڭىز ەسىڭىزدە مە؟ مىنە، جاۋابى. ءسىزدىڭ بويىڭىزدا ناقتىلىق جوق. جۇمباقتىلىق جوق. تىم اشىقتىعىڭىز ءسىزدى زەرتەتەيمىن دەگەن ادامداردىڭ كوڭىلىنە كىربىڭ تۇسىرەدى. ايتىڭىزشى، اشىق جاتقان تاتتىدەن گورى، سىرتىنا ەشكىم تيمەگەن، قوراپتاعى ءتاتتى الدەقايدا تارتىمدى ەمەس پە؟ وتىنەمىن، ءوزىڭىزدى سىيلاڭىز.
Massaget.kz