قازاقستان مەن ا ق ش جاھاندىق قاۋىپسىزدىككە وراسان ۇلەس قوسىپ وتىر - ءابدىقالىقوۆا
كونفەرەنسياعا سونداي-اق ق ر- داعى ا ق ش ەلشىسى د. كرول، پرەزيدەنت اكىمشىلىگى قۇرىلىمدىق بولىمشەلەرىنىڭ، مەملەكەتتىك ورگانداردىڭ باسشىلارى، ديپلوماتيالىق قىزمەت ارداگەرلەرى، حالىقارالىق ۇيىمدار مەن شەتەلدىك ديپلوماتيالىق كورپۋستىڭ، قوعامدىق ۇيىمداردىڭ، عىلىمي-زەرتتەۋ مەكەمەلەرى مەن وقۋ ورىندارىنىڭ وكىلدەرى قاتىستى.
مەملەكەتتىك حاتشى ءوزىنىڭ قۇتتىقتاۋ سوزىندە قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازاربايەۆتىڭ سىندارلى سىرتقى ساياساتى قازاقستاندىق مەملەكەتتىلىكتىڭ نىعايۋىنا، ەلدىڭ ەكونوميكالىق الەۋەتىن ءتيىمدى پايدالانۋعا، ەلىمىز ءۇشىن قاۋىپسىزدىكتىڭ الداعى ونداعان جىلدارعا مەجەلەنگەن جۇيەلى قۇرىلىمى مەن كەپىلدىگىن قالىپتاستىرۋعا قولايلى جاعداي جاساۋدى قامتاماسىز ەتكەنىن ايتتى.
ول سونىمەن قاتار، وتكەن شيرەك عاسىر ىشىندە ءبىزدىڭ ىنتىماقتاستىعىمىز ءوزارا سەنىمگە، قولداۋعا جانە ۇلتتىق مۇددەلەرگە قۇرمەتپەن قاراۋعا نەگىزدەلگەن ستراتەگيالىق سەرىكتەستىك سيپاتىنداعى كەمەل قارىم-قاتىناس دەڭگەيىنە جەتكەنىن اتاپ ءوتتى.
گۇلشارا ءابدىقالىقوۆا حالىقارالىق بەيبىتشىلىك پەن جاھاندىق قاۋىپسىزدىكتى نىعايتۋ ىسىنە قازاقستان مەن ا ق ش- تىڭ بىرلەسە وتىرىپ وراسان ۇلەس قوسقانىنا توقتالدى. جاھاندىق ورنىقتى دامۋ ءۇشىن جاڭا تەحنولوگيالاردى دامىتۋعا بىرلەسە ۇمتىلعان الەمنىڭ 115 ەلى اتسالىسىپ، «بولاشاقتىڭ ەنەرگياسى» تاقىرىبىمەن ءوتىپ جاتقان ەكسپو-2017 كورمەسى - جاھاندىق تۇيتكىلدەردى شەشۋ جولىنداعى جاراسىمدى ىنتىماقتاستىق رۋحىنىڭ جارقىن كورىنىسى بولىپ تابىلادى.
كونفەرەنسيا اياسىندا حالىقارالىق قاۋىپسىزدىك، سونداي-اق بەيبىتشىلىكتى ساقتاۋ، ساۋدا-ەكونوميكالىق جانە مادەني-گۋمانيتارلىق ىنتىماقتاستىقتى ىلگەرىلەتۋ سالالارىنداعى قازاقستان مەن ا ق ش- تىڭ ءوزارا ىقپالداستىعىنا ارنالعان ءۇش وتىرىس ءوتتى.