ەلباسى ەۋروپا قايتا قۇرۋ جانە دامۋ بانكىنىڭ پرەزيدەنتىمەن كەزدەستى

استانا. قازاقپارات - قازاقستان پرەزيدەنتى ەۋروپا قايتا قۇرۋ جانە دامۋ بانكىنىڭ پرەزيدەنتى سۋما چاكرابارتيمەن كەزدەستى، دەپ حابارلايدى اقوردانىڭ باسپا ءسوز قىزمەتى.

كەزدەسۋ شەتەلدىك ينۆەستورلار كەڭەسىنىڭ پلەنارلىق وتىرىسى باستالار الدىندا ءوتتى.

كەلىسسوز بارىسىندا تاراپتار ينۆەستيتسيالىق ىنتىماقتاستىقتىڭ ودان ارعى پەرسپەكتيۆاسىن جانە بىرلەسكەن جوبالاردى ىسكە اسىرۋ ماسەلەسىن تالقىلادى.

مەملەكەت باسشىسى بۇگىندە بانك تاراپىنان قازاقستانداعى ينفراقۇرىلىمدىق جوبالارعا، شاعىن جانە ورتا بيزنەس سالاسىنا اۋقىمدى ينۆەستيتسيا سالىنعانىن، سونداي-اق ەكونوميكالىق ءوزارا قارىم-قاتىناستى ودان ءارى دامىتۋ قاجەتتىگىن اتاپ ءوتتى.

س. چاكرابارتي نۇرسۇلتان نازاربايەۆقا جۇمىس كەستەسىنىڭ تىعىزدىعىنا قاراماستان، كەزدەسۋگە مۇمكىندىك جاساعانى ءۇشىن العىس ايتتى.

«سىزدەر استانا ەكونوميكالىق فورۋمىن وتكىزدىڭىزدەر. بۇگىن شەتەلدىك ينۆەستورلار كەڭەسى وتۋدە. تاياۋدا ەكسپو كورمەسىنىڭ اشىلۋ ءراسىمى ءوتتى. بۇل ءىس-شارا قازاقستاننىڭ حالىقارالىق ارەناداعى ابىرويىن ايتارلىقتاي ارتتىرادى جانە ەلدەرىڭىزدىڭ الەۋەتىن تولىق تانىتادى»، - دەدى ەۋروپا قايتا قۇرۋ جانە دامۋ بانكىنىڭ پرەزيدەنتى.

سونىمەن قاتار، تاراپتار كەڭەيتىلگەن ارىپتەستىك تۋرالى كەلىسىم اياسىنداعى ىنتىماقتاستىقتىڭ بارىسى جونىندە پىكىر الماستى.

كەلىسىم ناتيجەسىندە 2016-جىلدىڭ قورىتىندىسى بويىنشا ينۆەستيتسيا كولەمى 1,1 ميلليارد ا ق ش دوللارىنا جەتتى. كەزدەسۋ سوڭىندا ەنەرگەتيكا ءمينيسترى ق. بوزىمبايەۆ قازاقستان پرەزيدەنتىن «بولاشاقتىڭ ەنەرگياسى» ماكەتى تۋرالى بەينەماتەريالمەن تانىستىردى.