وسى سالانى جەتىك مەڭگەرگەن اعا ينسپەكتور- كينولوگ عابيت ءجۇسىپوۆ «قازاقپارات» تىلشىسىنە جۇمىسىنىڭ قىر- سىرىن ايتىپ بەردى.
اقتوبە وبلىستىق ىشكى ىستەر دەپارتامەنتىندەگى كينولوگيا قىزمەتى قىلمىستىڭ الدىن الۋدى جۇزەگە اسىرادى. يتتەردىڭ كومەگىمەن جارىلعىش زات، ەسىرتكى، قارۋ ىزدەلەدى. ياعني، كينولوگ پەن ءيت بىرلەسە جۇمىس ىستەيدى. قوعامدىق ءتارتىپ پەن اسا قاۋىپتى ايماقتا ىزدەۋ، ءتىنتۋ جۇرگىزەتىن يتتەرمەن جۇمىستى جەتىك مەڭگەرگەن عابيت ءجۇسىپوۆ بۇل جانۋاردىڭ ءتىلىن اۋىل بالاسى جاقسى تۇسىنەتىنىن جەتكىزدى.
«اۋىل بالاسى يتپەن قاتار ءجۇرىپ، جۇگىرىپ وسەدى. ءار ۇيدە ءيت بولادى. كەيىن اسكەرگە بارعان سوڭ كينولوگيا سالاسىنا ءوزىمدى بەيىمدەپ، ۇزاق جىلدىق ەڭبەك ءوتىلى بار مامانداردان تاجىريبە جينادىم. وتان الدىنداعى بورىشىمدى وتەپ، قايتا ورالعان سوڭ وسى سالانى جالعاستىرۋدى ءجون كورىپ، الماتىدا وقىدىم، 2011 -جىلى جۇمىسقا ورنالاستىم. قىزمەتكە ورنالاسقان سوڭ تەوريا مەن تاجىريبەنى ۇشتاستىرىپ، ادامنىڭ دوسى - ءيتتىڭ ءتىلىن ۇيرەندىم. قاراپايىم يتكە كوپ تالاپ قويا المايسىڭ، ال ارنايى يتتەر ادامنان دا ارتىق جۇمىس ىستەۋى كەرەك. ولار ينسپەكتورلاردىڭ قورعانى، ءبىز بىلمەيتىن زاتتاردى سەزىپ، تاۋىپ الادى. وسى قاسيەتىن وياتىپ، دامىتىپ، ناقتى سىناقتا، قىزمەتتە تابىستى جۇمىس ىستەۋىمىز كەرەك. مەن ءۇش اي وقىدىم. سول ارالىقتا ءۇش كەزەڭدى مەڭگەردىم. العاشقىدا ادام مەن يت اراسىندا بايلانىس ورناپ، ەكىنشى ساتىدا ءيتتىڭ جۇمىسى كوبەيدى. ماسەلەن، وعان كولىككە ءمىنىپ- ءتۇسۋ، كولىك ءىشىن ءتىنتۋ، سەزىكتى زاتتى تابۋ جۇكتەلدى. ءبىز جانۋارعا بۇيرىق بەرۋشى عانا ەمەسپىز، ءبىز ولارعا العاشقى مەديتسينالىق كومەك تە كورسەتەمىز»، - دەدى كينولوگ عابيت ءجۇسىپوۆ.
كينولوگ قىزمەتىن مەڭگەرۋدى قالاعان ادام يتپەن بىرگە جاتتىعادى. سول ءۇش ايدا ول ءوزىن عانا ەمەس، ءيتتى دە جۇمىسقا دايىندايدى.
«الدىمەن بەلگيالىق فيليامەن جاتتىعۋ جۇرگىزدىم. ءۇش اي ءبىلىم الىپ، كينولوگيا قىزمەتىنىڭ قىر- سىرىن ۇيرەنگەنىممەن، ءيتتى جەكە ۇيرەتۋ كەزىندە ويدا بولدىم. ءبىراق بۇل ءىس مەنىڭ قولىمنان كەلدى. قازىر فيليامەن 6 جىل بىرگەمىز. ول جۇمىستاعى بارلىق تاپسىرمانى مۇلتىكسىز ورىندايدى»، - دەدى كينولوگ.
اعا ينسپەكتور ادال دوسىن، قىزمەتتەسىن ەركەلەتەدى، الدايدى. ولار ءبىر- ءبىرىنىڭ كوڭىل كۇيىن سەزىنەدى. «ءيتتى جاقسى كورمەسە، جان- دۇنيەسى مەن تابيعاتىن تۇسىنبەسە، ولارمەن جۇمىس ىستەۋ قيىن. كۇشىك كەزىندە ولاردىڭ مىنەزىن ابدەن زەرتتەپ الۋ قاجەت. ءيتتى وسى ماماندىققا ۇيرەتۋ - جاس بالانى تاربيەلەۋمەن بىردەي. ءيتتى دە الدايسىڭ، ەركەلەتەسىڭ، ءتىپتى ۇرىسىپ الاسىڭ. كۇشىك كەزىندە ەشتەڭە بىلمەيدى، جاتتىعۋلار كەزىندە ولاردىڭ ەرەكشە قاسيەتتەرى اشىلادى. ءيتتى كۇتىپ- باپتاۋ، تاماعىن بەرۋ دە ءبىزدىڭ مىندەتىمىز. جانۋار قومقورلىقتى قاجەت ەتەدى. ءيتتى ءتۇسىنىپ، قامقور بولساڭ، جاقسىلىعىڭدى ۇمىتىلمايدى، ەسەلەپ قايتارادى. ولاردىڭ ادامدارعا دەگەن ادالدىعى مەن سەنىمدىلىگىندە شەك جوق»، - دەدى عابيت ءجۇسىپوۆ.
ايتا كەتەيىك، اقتوبە وبلىستىق ىشكى ىستەر دەپارتامەنتىنىڭ كينولوگيا قىزمەتىندە 10-نان استام كينولوگ بار. ولار ۇنەمى بىلىكتىلىگىن ارتتىرىپ، ارنايى سەمينارلارعا قاتىسىپ وتىرادى.
اۆتور: التىناي ساعىندىقوۆا