استانا اۋەجايىنا ەلباسىنىڭ اتىن بەرۋ ورىندى - عاريفوللا ەسىم
بۇل پىكىردى استانا حالىقارالىق اۋەجايىنا ەلباسى نۇرسۇلتان نازاربايەۆتىڭ ەسىمىنىڭ بەرىلۋىنە بايلانىستى قوعام قايراتكەرى، عالىم عاريفوللا ەسىم ءبىلدىردى، دەپ حابارلايدى قازاقپارات.
«ەلىمىز تاۋەلسىزدىك العاننان بەرى حالىقارالىق دەڭگەيدەگى سامميتتەر، فورۋمدار، ورمەلەر سەكىلدى كوپتەگەن ءىس- شارالاردى وتكىزۋدە. ءوز باسىم ەلىمىزدىڭ باس شاھارى، قىرانداي اسپانعا شارىقتاپ تۇرعان استانانىڭ تورىندە ورنالاسقان ەلوردا اۋەجايىن ەلباسىمىز ن. ءا. نازاربايەۆتىڭ اتىمەن اتاۋعا كەلىسەمىن. مۇنداي اتاۋ تەك بىزدە ەمەس الەمنىڭ الدىڭعى قاتارلى ەلدەرىندە دە بار. مىسالىعا تۇركيانىڭ تۇڭعىش پرەزيدەنتى بولعان مۇستافا كەمال اتاتۇرىكتىڭ اتى بەرىلگەن ستامبۇل قالاسىنداعى الەمدەگى ۇلكەن اۋەجايلاردىڭ ءبىرىن اتاۋعا بولادى. بۇدان باسقا امەريكا قۇراما شتاتتارىنىڭ 35- پرەزيدەنتى دجون فيتسدجەرالد كەننەديدى اتاپ كورسەتۋگە بولادى. سول سەبەپتى استانا قالاسىنىڭ اۋەجايىن ەلباسىنىڭ اتىنا وزگەرتۋ دۇرىس دەپ سانايمىن»، - دەيدى عالىم.