قىتاي جۋرناليستەرى وڭتۇستىك قازاقستان وبلىسىنا قىزىعىپ وتىر
سوندىقتان جوسپاردان تىس ساياحات جاساۋدى ءجون دەپ شەشكەن، دەپ حابارلايدى قازاقپارات ح ا ا ءتىلشىسى.
3 كىسىلىك دەلەگاتسيانى قىتايدىڭ ورتالىق ССТV تەلەارناسىنىڭ باس پروديۋسەرى جوۋ حۋڭ باستاپ كەلدى. بۇل ازامات استاناعا دەيىن شاڭحاي مەن ميلاندا وتكەن ەكسپو- عا ارنايى حابار دايىنداعان. بۇل جولى قازاقستانداعى ەكسپو- نىڭ ءوتۋىن باقىلاۋعا ارنايى ات باسىن بۇرىپتى. كۇنگەيگە كەلگەن قوناقتاردى وبلىستىق تۋريزم باسقارماسىنىڭ باسشىسى باتىرحان قۇرمانسەيىت كۇتىپ الدى. باسقارما باسشىسى قىتايلىقتاردى تۋريستىك الەۋەتى زور ايماقتارعا ساياحات جاساۋعا شاقىردى. ال، وڭتۇستىككە كەلگەن قوناقتار ءوڭىرىمىزدىڭ تۋريستىك الەۋەتى عانا ەمەس، ەكونوميكالىق دامۋى جونىندە دە بىلگىسى كەلەتىنىن جەتكىزدى.
ايتا كەتەيىك، جوۋ حۋڭ ەڭبەك ەتەتىن ايگىلى ССТV تەلەارناسى الەمنىڭ 121 ەلىنەن حابار تاراتادى. 1,5 ميلليارد قىتاي ەلى بۇل ارنانى تۇگەل كورەدى. سوندىقتان قوناقتار قازاقستان جايلى دەرەكتى فيلم ءتۇسىرۋدى كوزدەپ وتىر.
«بيىل قىتاي مەن قازاقستان اراسىنداعى دوستىققا 25 جىل تولىپ وتىر. سوندىقتان بۇل جىلدى «قازاقستان مەن قىتايدىڭ تۋريزم جىلى» دەپ ايتۋعا بولادى. وسى ءساتتى پايدالانا وتىرىپ، ءبىز قازاقستاندى بۇدان ارى قاراي تانۋعا كەلىپ وتىرمىز. ارينە، ونىڭ ىشىندە شىمكەنتتىڭ الار ورنى ەرەكشە»، - دەدى ССТV تەلەارناسىنىڭ باس پروديۋسەرى جوۋ حۋڭ.
قىتايلىقتار تاراپىنان تۇسىرىلەتىن تۋىندىلار كورشى ەلدىڭ ازاماتتارى ءۇشىن قازاق ەلىن تانىپ، بىلۋگە مۇمكىندىك بەرمەك. ءارى كورەرمەندەر تاراپىنان تەگىن جارناماعا قىزىعۋشىلىق مولايسا، وڭتۇستىككە قىتايلىق تۋريستەر كوبىرەك كەلۋى مۇمكىن.
اۆتور: اينۇر اقبايەۆا