مادەنيەت سارايىندا «مەن قازاقپىن» مەگا- جوباسىنا قاتىساتىن قاراعاندىلىقتار ىرىكتەلدى

استانا. قازاقپارات - قاراعاندىنىڭ كەنشىلەر مادەنيەت سارايىندا «مەن قازاقپىن» حالىقارالىق مۋزىكالىق جوباسىنىڭ ىرىكتەۋ كەزەڭى ءوتتى.

وندا قاتىسۋشىلار تەرمە، كۇي جانە ءداستۇرلى ءان ايتۋدان باق سىناستى، دەپ حابارلايدى قازاقپارات وبلىس اكىمدىگىنىڭ باسپا ءسوز قىزمەتىنە سىلتەمە جاساپ.

قالالار مەن اۋدانداردان 5 تەرمەشى، 16 كۇيشى مەن 15 ءداستۇرلى ءانشى ونەر كورسەتتى.

ءادىل قازىلار قۇرامىنا ق ر ەڭبەگى سىڭىرگەن قايراتكەرى، تاتتىمبەت اتىنداعى اكادەميالىق وركەسترىنىڭ كونسەرتمەيستەرى پولاتحان ءتاشىموۆ، ق. بايجانوۆ اتىنداعى كونسەرتتىك بىرلەستىگىنىڭ جەتەكشى ءسوليسى، رەسپۋبليكالىق كونكۋرستاردىڭ لاۋرەاتى داۋرەنبەك اركەنوۆ جانە تانىمال اقىن، ايتىسكەر تولەگەن ءادىلوۆ سەكىلدى كورنەكتى مادەنيەت قايراتكەرلەرى ەندى.

شارانى «قازاقستان» ر ت ر ك باسشىسى ەرلان قارين تاماشالادى. ول بۇگىندە «مەن قازاقپىن» مەگا- جوباسىنا 428 ۇمىتكەر قاتىسىپ، ونىڭ 40-ى جەڭىمپاز اتانعانىن اتاپ ءوتتى. «قاراعاندىدا ءوتىپ جاتقان ىرىكتەۋ كەزەڭىندە جەڭىمپاز اتانعاندار حالىقارالىق مەگا- جوباعا جولداما الادى. «مەن قازاقپىن» جوباسى ۇلتتىق ونەر مەن مادەنيەتتى ناسيحاتتاۋعا باعىتتالعان جانە وسى جوباعا قاتىسۋشىلارعا ۇلكەن ساحناعا جول اشادى. جوبانىڭ ماقساتى - شالعاي اۋىلدار مەن ءتۇرلى اۋدانداردا ۇلتتىق ونەرگە بەرىلگەن جانداردى تاۋىپ، كوپشىلىككە تانىمال ەتۋ، ونەرگە جول اشۋ» - دەدى ەرلان قارين.

سونىمەن، «تەرمە ونەرى» نوميناتسياسى بويىنشا نۇرمۇحاممەد بايسۇعىروۆ (شاحتينسك ق. ) جەڭىمپاز اتانسا، «ءداستۇرلى ءانشى» نوميناتسياسىندا ءانۋار ادامبايەۆ (اباي ق. ) جەڭىسكە جەتتى، «كۇيشى» اتالىمىندا بالقان سماعۇلوۆ (قاراعاندى ق. ) ۇزدىك دەپ تانىلدى. بۇل ونەرپازدار رەسپۋبليكالىق بايقاۋدا وبلىس نامىسىن قورعايتىن بولادى.

ايتا كەتەيىك، «مەن قازاقپىن» حالىقارالىق مۋزىكالىق جوباسى ەلىمىزدە العاش رەت وتكىزىلۋدە. جوباعا ەلىمىزدىڭ ءار ايماعى مەن رەسەي، ق ح ر، مونعوليا مەن التايدان قاتىسۋشىلار قاتىسادى. ىرىكتەۋ كەزەڭى شىلدە ايىندا اياقتالىپ، قىركۇيەك ايىنان باستاپ «قازاقستان» ۇلتتىق ارناسىنىڭ ەفيرىنەن كورسەتىلە باستايدى. اقتىق كەزەڭى تاۋەلسىزدىك كۇنى قارساڭىندا، جەلتوقساندا وتەدى. اتالمىش جوبا ۇلتتىق مۋزىكانى ناسيحاتتاۋعا جانە دامىتۋعا، تەرمەنى، كۇيدى ورىندايتىن جاڭا تالانتتاردى ىزدەۋگە باعىتتالعان.

جوبانى ۇيىمداستىرۋشىلار - «قازاقستان» ۇلتتىق تەلەراديوكورپوراتسياسى، قاراعاندى وبلىسىنىڭ مادەنيەت، مۇراعاتتار جانە قۇجاتتاما باسقارماسى، وبلىستىق ىشكى ساياسات باسقارماسى.