نازاربايەۆ الەمدىك ءبىرىڭعاي ۆاليۋتا ازىرلەۋدى ۇسىندى

استانا. قازاقپارات - حالىقارالىق ەسەپتىك تولەم بىرلىگىن ەنگىزۋ ماسەلەسىن بايىپپەن قارايتىن ۋاقىت جەتتى.

بۇل تۋرالى بۇگىن X استانا ەكونوميكالىق فورۋمىنىڭ جالپى وتىرىسىندا ءسوز سويلەگەن ق ر پرەزيدەنتى نۇرسۇلتان نازاربايەۆ ايتتى، دەپ حابارلايدى قازاقپارات.

«الەمدىك قارجى ارحيتەكتۋراسىن تراسفورماتسيالاۋ قاجەتتىلىگى جەتىلدىرىلىپ وتىر. حالىقارالىق ەسەپتىك تولەم بىرلىگىن ەنگىزۋ ماسەلەسىن بايىپپەن قارايتىن ۋاقىت جەتتى. ول الەمدى ۆاليۋتالىق سوعىستاردان، الاياقتىقتان ارىلۋعا، ساۋدا قارىم-قاتىناستارىندا قاتەلىكتەردەن جالتارۋعا، نارىقتاعى قۇبىلمالىقتى تومەندەتۋگە مۇمكىندىك بەرەدى»، - دەدى قازاقستان پرەزيدەنتى.

ەلباسىنىڭ ايتۋىنشا، ۆاليۋتا قاراپايىم، ول پايدالانۋشىعا باعىنىشتى بولۋى ءتيىس. «بلوكچەين سىندى تەحنولوگيالاردىڭ دامۋىن، سيفرلاندىرىلۋدى ەسكەرە وتىرىپ، كريپتوۆاليۋتا تۇرىندەگى ەسەپتىك بىرلىكتى قۇرۋعا دا بولار ەدى»، - دەدى ەلباسى.

ق ر پرەزيدەنتىنىڭ پايىمىنشا، ول ابستراكتىلى سەنىمدى تىرەك ەتپەۋى ءتيىس. كەرىسىنشە، ناقتى اكتيۆتەردى قامتاماسىز ەتۋى قاجەت.

بۇل ۆاليۋتا بۇكىل الەمدەگى قولدانۋشىلار تاراپىنان قابىلدانۋى كەرەك. «سوندىقتان بۇل ىسكە تەك قانا G20 ەمەس ودان دا كوپ مەملەكەتتەر قاتىسۋى ءۇشىن ءبىز G- Global-دى ۇسىندىق»، - دەپ اتاپ ءوتتى مەملەكەت باسشىسى.

نۇرسۇلتان نازاربايەۆتىڭ ايتۋىنشا، جاھاندىق ۆاليۋتانى ورتالىق بانكتەردىڭ پۋلىن قۇرۋ جولىمەن، ماسەلەن، ب ۇ ۇ جانىنا ارنايى كوميتەت قۇرۋ ارقىلى ەنگىزۋگە بولادى. «بارلىق ەلدىڭ تەڭ قۇقىلى، ءادىل وكىلدىگى بولۋى ءتيىس. ارينە، ماسەلە قاراپايىم ەمەس. ءبىراق، بۇل پروبلەما جوعالمايدى. بىزگە ونى ايتىپ قانا قويماي شەشۋ دە قاجەت»، - دەپ ءتۇيدى ءسوزىن ق ر پرەزيدەنتى.

اۆتور: مارلان جيەمباي