تاريحي فوتو: جامبىلدىڭ نەمەرەسى مەن شاكارىمنىڭ بالاسى
وسىدان 35 جىل بۇرىن تۇسىرىلگەن بۇل فوتونىڭ اۆتورى ءوز كەيىپكەرلەرىنىڭ تاريحي تۇلعالاردىڭ ۇرپاقتارى بولىپ تابىلاتىنىن 10 جىل وتكەن سوڭ عانا بىلگەن ەكەن.
وقيعانىڭ ءمان- جايىن تولىق جەتكىزۋ ءۇشىن، گازەت سايتىندا جاريالانعان ماقالانى سول قالپىندا ۇسىنعاندى ءجون كورىپ وتىرمىز.
وسىدان 35 جىل بۇرىن تۇسىرىلگەن بۇل سۋرەتتەن كەيىن دە ءبىر ءداۋىر ءوتىپتى. بوياماسىز فوتودا جامبىلدىڭ اقىندىق ونەرى دارىعان نەمەرەسى ءالىمقۇل مەن شاكارىم اقىننىڭ بالاسى احات وتىر. اسىلدان قالعان ۇرپاقتار دا تەگىنە تەڭەلىپ، تالاي ءىس تىندىرىپ كەتكەنىن تاريح بىلەدى.
ال قايتالانباس عاجايىپ ءساتتى فوتوشەجىرەمىزگە سىيعا تارتقان بايىرعى قىزىلوردالىق فوتوتىلشى بولات وماراليەۆ: «1982 - جىلى تۇرماعانبەت اقىننىڭ 100 جىلدىق مەرەيتويىنا قازاقتىڭ بەتكە ۇستار بارشا زيالىلارى جينالدى. تۇرماعانبەت ىزتىلەۋوۆتىڭ عاسىرلىق تويىندا ەكى كىسى ەلەۋسىزدەۋ جەردە وتىر ەكەن. بولمىستارى بولەك ادامداردى سۋرەتكە ءتۇسىرىپ الدىم. ولاردىڭ وتىرىسى ماعان بولەكشە كورىندى. كىمدەردىڭ ۇرپاعى ەكەنىن 10 جىلدان كەيىن عانا ءبىلدىم» ، دەيدى.
«كەيىن مەنىڭ بىلگەنىم، ءالىمقۇل - جامبىلدىڭ ورتانشى ۇلى توققۇلدىڭ بالاسى ەكەن. 1927 -جىلى ءالىمقۇلدىڭ التى ايلىعىندا توققۇل قايتىس بولادى دا، ول اكەدەن جەتىم قالعان. سودان جامبىلدىڭ ءىنىسى ساتىش باۋىرىنا سالىپ وسىرگەن كورىنەدى. جاسىنان جامبىل اتاسىنىڭ جانىندا ءجۇرىپ، ءتالىم- تاربيە الادى. اتاسىنىڭ تالاي جىرىن جاتقا ايتىپ ەرجەتەدى» ، دەپ فوتوتىلشى سۋرەتكە ىلەسپە جولدار جازىپتى.
جىر الىبى جامبىلدىڭ نەمەرەسى، قازاقستاننىڭ حالىق اقىنى، قازاقستان رەسپۋبليكاسىنىڭ ەڭبەك سىڭىرگەن مادەنيەت قايراتكەرى، «قۇرمەت بەلگىسى» وردەنىنىڭ يەگەرى، الماتى وبلىسىنىڭ جانە جامبىل اۋدانىنىڭ قۇرمەتتى ازاماتى ءالىمقۇل جامبىلوۆ 2015 -جىلدىڭ 14 - قاراشاسىندا 88 جاسىندا دۇنيەدەن وزعانى بارشامىزعا ايان. جامبىلدىڭ جالعاسىنداي بولعان ءالىمقۇل اتامىز قازاقتىڭ اقپا- توكپە اقىندىق ءداستۇرىن قايماعىن بۇزباي جالعاستىرۋشىلاردىڭ ءبىرى بولعانىنا ءتىرى كۇنىندە كۋا بولدىق.
ال احات شاكارىم ۇلى 1900 -جىلى دۇنيەگە كەلىپ، 84 جاسىندا قايتىس بولدى. بۇل سۋرەتكە تۇسكەندە احات اقساقال 82 جاستا ەكەن. زامانىندا شاكارىمنىڭ بارلىق بالالارى، نەمەرەلەرى قاماۋعا الىنىپ، جازىقسىز جاپا شەگەدى. تۇرمەدەگى اۋىر ازاپ، قورلىققا شىداماعان گافۋر، بايازيت وزىنە ءوزى قول جۇمساپ قايتىس بولادى. قابىش تاياق پەن اشتىقتىڭ ازابىنان شىڭعىستاۋ مەن ەكى ورتادا جولدا ولەدى. زيات قىتايعا ءوتىپ كەتكەنمەن قۇرىعى ۇزىن قياناتشىلداردان قۇتىلا الماي، قايعىلى قازاعا ۇشىرايدى. تۇرمەدە جاتقان احات اكەسىنىڭ قازا بولعانىن ەستىپ، ءبىر ۋىس توپىراق سالا الماي قايعىنىڭ ۋىن ىشەدى.
اسىلدىڭ تۇياعى 1958 -جىلى 29 - قازاندا شاكارىم اقىن اقتالعاندا 30 جىل قۇدىقتا جاتىپ قالعان اكەسىنىڭ سۇيەگىن قازىپ، تۇگەندەپ جيناپ، قايتا ارۋلاپ ۇلى ۇستازى ابايدىڭ زيراتىنىڭ جانىنا جەرلەيدى.
ورايى كەلىپ تۇرعاندا شاكارىمنىڭ انشىلىك مۇراسىنىڭ جينالىپ، زەرتتەلۋىنە كوپ ەڭبەك سىڭىرگەن ءوز بالاسى احات قۇدايبەردييەۆ بولعانىن ايتۋ پارىز. ەرەن جۇمىستىڭ ارقاسىندا شاكارىمنىڭ اندەرى 1989 -جىلى «امانات» اتتى مۋزىكالىق- ەتنوگرافيالىق جيناق بولىپ جارىققا شىقتى. بۇل باسىلىم شاكارىم اندەرىنىڭ عىلىمي- زەرتتەلۋىنە جول اشتى.
مىنە، ءبىر سۋرەتتە ەكى الىپ تۇلعانىڭ تۇياعىنىڭ ءىزى وسىنداي.
ايناش ەسالي، «ەگەمەن قازاقستان»
سۋرەتتى تۇسىرگەن بولات وماراليەۆ