تۇركىستاندا قىمىز بەن قىمىران ۇنتاعىن شىعاراتىن زاۋىت ىسكە قوسىلادى
قازىر نىساننىڭ قۇرىلىسى قىزۋ ءجۇرىپ جاتىر. قارجىلاي قولداۋدى قىتاي تاراپى بىلدىرۋدە، دەپ حابارلايدى قازاقپارات ح ا ا ءتىلشىسى.
قىتايلىقتاردىڭ ەنشىسىندەگى كومپانيا كاسىپكەرلىككە قولايلى ايماق رەتىندە تۇركىستان قالاسى تاڭداعان. سەبەبى قاسيەتتى مەكەندە تۇيەنىڭ كوپ وسىرىلەدى. كاسىپكەرلەر شيكىزاتتى تۇركىستان مەن وعان جاقىن وتىرار اۋدانىنان، قىزىلوردا وبلىسىنان الۋعا بولادى دەپ وتىر. ازىرگە جەرگىلىكتى شارۋالارمەن كەلىسسوزدەر جۇرگىزۋدە ەكەن.
مۇنداعى مامانداردىڭ سوزىنشە ۇنتاقتالعان قىمىز بەن قىمىراننىڭ ساقتالۋ مەرزىمى 2 جىلعا دەيىن سوزىلادى. زاۋىت باسشىلىعى ءبىر تاۋلىكتە مىڭ تونناعا دەيىن ءونىم ءوندىرۋدى جوسپارلاپ وتىر. تىڭ جاڭالىق ەڭ الدىمەن تۇركىستاندىق شارۋالار ءۇشىن قولايلى بولماق.
«تۇركىستان قالاسى اكىمدىگىمەن بىزگە 10 گەكتار جەر ءبولىندى. وسى جىلى قاڭتار ايىندا قۇرىلىس جۇمىستارى باستالعان. قازىر بۇل جۇمىستار قارقىندى تۇردە جۇرگىزىلۋدە. زاۋىت سالىنىپ بىتكەندە وسى جەردە تاۋلىگىنە 100 تونناداي قىمىز بەن قىمىراننان ۇنتاق دايىندالاتىن بولادى»، - دەيدى كومپانيانىڭ باسقارۋشى ديرەكتورى جازيرا وزات قىزى.
جالپى سەرىكتەستىكتىڭ جوسپارى اۋقىمدى. تەك ۇنتاقتالعان قىمىز بەن قىمىران ءوندىرىپ قانا قويماي، ۇلتتىق سۋسىنداردى سوڭعى پروتسەسكە دەيىن وڭدەمەك. ءسويتىپ، كوسمەتيكالىق ونىمدەر مەن تۇرمىستىق حيميالىق سۇيىقتىقتار شىعارۋدى جوسپارلاپ قويعان. قازىر ينۆەستورلارعا جەرگىلىكتى بيلىك تاراپىنان مەيلىنشە قولداۋ كورسەتۋدە ەكەن. كاسىپورىن ىسكە قوسىلسا، ءبىر مەزەتتە 160 جەرگىلىكتى ازامات جۇمىسپەن قامتىلادى دەپ كۇتىلۋدە.
اۆتور: اينۇر اقبايەۆا