ب ۇ ۇ باس حاتشىسى: ارال اپاتى - ادامزاتتىڭ جاۋاپسىزدىعىنىڭ دالەلى

استانا. قازاقپارات - سەنبى كۇنى وزبەكستانعا كەلگەن ب ۇ ۇ باس حاتشىسى انتونيۋ گۋتەرريش ارال اپاتىن «بارلىعىمىزعا بەرىلگەن ەسكەرتۋ» دەپ اتاپ، جەردى ادامزاتتىڭ بۇلدىرگەنىنىڭ دالەلى ەكەندىگىن ايتتى.

«ارال تەڭىزىنىڭ جويىلۋى كليماتتىڭ وزگەرۋىنەن ەمەس، ادامداردىڭ سۋ رەسۋرستارىن دۇرىس پايدالانباۋىنان بولدى»، - دەدى كولەمى بويىنشا ءبىر كەزدەرى ءتورتىنشى ورىندا بولعان جابىق تەڭىزدىڭ ۇستىنەن تىكۇشاقپەن ۇشىپ وتكەن ب ۇ ۇ باسشىسى.

انتونينۋ گۋتەرريش قازىر «كەمەلەر زيراتىنا» اينالعان بۇرىنعى پورتتار قالاسى مويناقتا بولدى. «ارال قاسىرەتى - ءبىزدىڭ زامانىمىزداعى ءىرى ەكولوگيالىق اپات بولۋى مۇمكىن»، دەدى ب ۇ ۇ باسشىسى.

كليمات بويىنشا پاريج كەلىسىمىن ورىنداۋداعى الەمدىك قوعامداستىقتى جۇزەگە اسىرۋ جانە وسىعان ۇقساس اپاتتاردىڭ قايتالانباسى ءۇشىن بۇل بارىمىزگە ساباق بولۋى كەرەك. وزبەكستانعا ساپارىندا انتونيۋ گۋتەرريش سامارقاندا پرەزيدەنت شاۆكات ميرزيەيەۆپەن كەلىسسوزدەر جۇرگىزدى.

ەسكە سالا كەتسەك، عاسىر جوباسى اتانعان «سىرداريا وزەنىنىڭ ارناسىن رەتتەۋ جانە ارال تەڭىزىنىڭ سولتۇستىك بولىگىن ساقتاۋ» جوباسىنىڭ ناتيجەسىندە قازاقستانداعى سولتۇستىك ارال تەڭىزىنىڭ سۋى تولىپ كەلەدى. تەڭىزىندە كوكارال سۋ توسپاسى، ايتەك سۋ قۇرىلىسى كەشەنى جانە سىرداريا وزەنىندەگى قورعانىس بوگەتتەرى سالىندى. ءسويتىپ تەڭىزدەگى بالىق قورى مولايىپ، از جىل ىشىندە تەڭىز ارال قالاسىنا 17 شاقىرىمعا دەيىن جاقىندادى.

بۇعان قوسا، سىرداريا وزەنىنەن تەڭىزگە قۇيىلاتىن سۋ كولەمى كوبەيىپ، وڭىردەگى كوپتەگەن بيولوگيالىق تۇرلەر قالپىنا كەلە باستادى. ال، سوڭعى 3 جىلدا بالىق اۋلاۋ كولەمى 1,16 مىڭ تونناعا نەمەسە 15 پروتسەنتكە ءوستى.