الماتى وبلىسىندا ءۇش ادام دارەتحانا شۇڭقىرىنا باتىپ كەتتى

تالدىقورعان. قازاقپارات - الماتى وبلىسىندا قايعىلى جاعداي ورىن الدى. ءبىر وتباسىنىڭ ءۇش ادامى دارەتحانا شۇڭقىرىنا ءتۇسىپ قازا تاپتى، دەپ حابارلايدى قازاقپارات ءتىلشىسى.

وقىس وقيعا قاراساي اۋدانىنىڭ قىرعاۋىلدى اۋىلىندا بولدى. ابايسىزدا 10 جاستاعى قىز دارەتحانا شۇڭقىرىنا ءتۇسىپ كەتكەن.

وعان كومەككە 1967-جىلعى مارات سادىقوۆ جانە 1993-جىلعى زاميرا باشيروۆا ۇمتىلعان. وكىنىشكە وراي ءۇش ادام بىردەي وقيعا ورنىندا قايتىس بولدى. اتالعان وقىس جاعدايدى وبلىستىق توتەنشە جاعدايلار دەپارتامەنتىندەگىلەر راستادى.

ناجىسكە باتىپ، قازا تاپقان ادامداردىڭ مۇردەلەرىن كورشىلەرى شىعارىپ العان. ال بەيرەسمي مالىمەت بويىنشا، 10 جاستاعى قىز بالا ۇيالى تەلەفونىن دارەتحاناعا ءتۇسىرىپ الىپ، ونى الىپ شىعۋعا ۇمتىلعانعا ۇقسايدى. جانتۇرشىگەرلىك جاعداي 6- ماۋسىم كۇنى ساعات كەشكى توعىزدار شاماسىندا بولدى.

اۆتور: سامال قابىشەۆا