اق جاۋلىقتى اجەلەر جازعى لاگەردەگى بالالارعا شي توقىپ، ديىرمەن تارتۋدى ۇيرەتتى
«ۇلى دالا قازىناسى»، «باقىتتى وتباسى - باقىتتى بالالىق شاق» پارتيالىق جوبالارى اياسىندا «ۇلتتىق قۇندىلىقتارىمىزدى ۇلگى ەتەيىك» تاقىرىبىنداعى بۇكىل رەسپۋبليكالىق اكسيا ءوتتى، دەپ حابارلادى قازاقپارات.
شارانىڭ نەگىزگى ماقساتى - بالالاردىڭ جازعى دەمالىسىن ءتيىمدى ۇيىمداستىرۋ، مادەنيەتىمىزدىڭ بىردەن- ءبىر بولشەگى - ۇلتتىق سالت- ءداستۇر، ادەت- عۇرىپ تۋراسىندا وي ءبولىسۋ، ەر جانە قىز بالالار تاربيەسىندەگى اتا- انانىڭ ءرولى، جاستارعا ۇلتتىق قۇندىلىقتاردىڭ ەڭ ماڭىزدىسى - ۇلتتىق مادەنيەت پەن سالت- ءداستۇر، ادەت- عۇرىپتاردىڭ ءمان- ماعىناسىن ۇعىندىرىپ، كەڭىنەن ناسيحاتتاۋ.
اكسيانى «نۇر وتان» پارتياسى جالاعاش اۋداندىق فيليالى ءتوراعاسىنىڭ ءبىرىنشى ورىنباسارى ق. مۇستافايەۆا اشىپ، بۇگىنگى كۇننىڭ ماڭىزدى ماسەلەلەرىنىڭ ءبىرى - جاس ۇرپاقتى ۇلتتىق يگىلىكتەر مەن ادامي قۇندىلىقتار، رۋحاني مادەني مۇرالار ساباقتاستىعىن ساقتاي وتىرىپ تاربيەلەۋ كەرەكتىگىن باسا ايتتى.
ءىس- شارا بارىسىندا ۇلتتىق ناقىشتاعى سپورتتىق ويىنداردان جارىستار (اسىق اتۋ، بەس اسىق، لاڭگى تەبۋ)، «ەتنو اۋىل» كورمەسى، «ءداستۇر مەن ءدىن ساباقتاستىعى» تاقىرىبىنداعى «دوڭگەلەك ۇستەل» ءوتتى. ال ەڭبەك، اقارىق اۋىلدارىنان كەلگەن «اسىل اجەلەر»، «باتىر انالار» ءانسامبلىنىڭ اق جاۋلىقتى اجەلەرى جازعى تىنىعۋ لاگەرىندەگى قىز بالالارعا كۇبى شايقاۋ، كەلى ءتۇيۋ، ديىرمەن تارتۋ، شي توقۋ، قۇرت جايۋدى كورسەتىپ، جاستاردىڭ ۇلتتىق قۇندىلىقتارعا بەيىم دە بەرىك بولىپ وسۋىنە سەپ بولار جاقسى باستاما كوتەردى.
اۆتور: ەلۋباي اۋەزوۆ