ەلباسى ب ۇ ۇ- نىڭ باس حاتشىسى انتونيۋ گۋتەرريشپەن كەزدەستى
مەملەكەت باسشىسى ب ۇ ۇ باس حاتشىسىنا شانحاي ىنتىماقتاستىق ۇيىمىنا مۇشە مەملەكەتتەر باسشىلارىنىڭ كەڭەسىنە قاتىسقانى ءۇشىن شىنايى ريزاشىلىعىن ءبىلدىردى.
«شانحاي ىنتىماقتاستىق ۇيىمىنىڭ تاريحىندا ب ۇ ۇ باس حاتشىسى ونىڭ جۇمىسىنا ءبىرىنشى رەت قاتىسۋدا. ءسىزدىڭ وسى شاراعا كەلۋىڭىز ۇيىم ءۇشىن تاريحي ءسات - ش ى ۇ- عا ءۇندىستان مەن پاكىستاننىڭ قابىلدانۋىمەن تۇسپا-تۇس كەلىپ وتىر. سول ارقىلى بۇل ۇيىم ايماقتىق دەڭگەيمەن شەكتەلمەي، ەلەۋلى ساياسي كۇشكە اينالۋدا، - دەدى نۇرسۇلتان نازاربايەۆ.
مەملەكەت باسشىسى ب ۇ ۇ قىزمەتىنىڭ قاعيداتتارى مەن ونىڭ بارلىق باستامالارىن قازاقستان ءاردايىم قولداپ كەلگەنىن اتاپ ءوتتى.
«ءوزىڭىز بىلەتىندەي، قازاقستان انتيادرولىق قوزعالىستىڭ كوشباسشىسى سانالادى جانە ب ۇ ۇ تاراپىنان 29- تامىز - يادرولىق سىناقتارعا قارسى حالىقارالىق ءىس-قيمىل كۇنى بولىپ جاريالاندى. مەن قازاقستان تاراپىنان يادرولىق قارۋسىز الەم جانە جاھاندىق قاۋىپسىزدىك ءۇشىن بەرىلەتىن سىيلىق تاعايىندادىم. يوردانيا كورولى II ابداللا وسى حالىقارالىق سىيلىقتىڭ ءبىرىنشى لاۋرەاتى اتاندى، - دەدى قازاقستان پرەزيدەنتى.
ب ۇ ۇ باس حاتشىسى نۇرسۇلتان نازاربايەۆتى شانحاي ىنتىماقتاستىق ۇيىمىنىڭ سامميتىن وتكىزۋىمەن قۇتتىقتاپ، وعان ءۇندىستان مەن پاكىستاننىڭ مۇشە بولىپ قابىلدانۋىن اتاپ ءوتتى.
«مەن وسى سامميتكە شانحاي ىنتىماقتاستىق ۇيىمىنىڭ بىرتە-بىرتە بۇكىل الەمدەگى ىقپالداستىق ورتالىعىنا اينالا باستاعانىن جەتە سەزىنىپ كەلدىم. بۇل ۇيىم، مەنىڭ ويىمشا، بۇگىنگى الەمدىك قۇرىلىمنىڭ ماڭىزدى تىرەگى بولىپ سانالادى. ءۇندىستان مەن پاكىستان وسى باس قوسۋدا سىندارلى ديالوگ جۇرگىزۋ ءۇشىن جاڭا مۇمكىندىكتەرگە يە بولادى دەپ ويلايمىن»، - دەدى ا. گۋتەرريش.