سەربيا پرەزيدەنتى قازاقستاننىڭ قورعانىس كاسىپورىندارىندا بولدى

استانا. قازاقپارات - سەربيا پرەزيدەنتى الەكساندر ۆۋچيچ استاناعا ساپارى اياسىندا بۇگىن قازاقستاننىڭ قورعانىس-ونەركاسىپتىك كەشەنىنىڭ كاسىپورىندارىن ارالادى، دەپ حابارلايدى قازاقپارات «قازاقستان ينجينيرينگ» ا ق باسپا ءسوز قىزمەتىنە سىلتەمە جاساپ.

«قازاقستان پاراماۋنت ينجينيرينگ» ج ش س باس ديرەكتورى ەربول ءسالىموۆ ا. ۆۋچيچ باستاعان دەلەگاتسيانى زاۋىتتىڭ وندىرىستىك مۇمكىندىكتەرىمەن تانىستىردى، سونىمەن قاتار ونىڭ الەۋەتى تۋرالى ايتىپ بەردى.

سەربيا پرەزيدەنتى استانادا شىعارىلاتىن بروندالعان «ارلان» مەن «بارىس 8x8» كولىكتەرىنە قىزىعۋشىلىق تانىتا وتىرىپ، «قازاقستان پاراماۋنت ينجينيرينگ» زاۋىتىنىڭ جابدىقتالۋىن جانە وندىرىستىك الەۋەتىن جوعارى باعالادى. ا. ۆۋچيچ باستاعان دەلەگاتسيا، سونداي-اق قورعانىس سالاسىنداعى ەلەكتروندىق-وپتيكالىق قۇرالداردى شىعاراتىن زاۋىتتا بولدى.

«ك ا ە» ج ش س شىعاراتىن ونىمدەردىڭ ىشىندە ينفراقىزىل لينزالار، تەپلوۆيزورلار، تىكۇشاقتاردى جەتىلدىرۋ جابدىقتارى سەربيالىق باسشىلىقتىڭ ەرەكشە نازارىنا ىلىكتى. سەربيالىق تاراپ قورعانىس سالاسىندا ءبىرقاتار باعىتتار بويىنشا بىرلەسكەن جوبالاردى جۇزەگە اسىرۋعا زور مۇددەلىلىك تانىتتى.

«قازاقستان پاراماۋنت ينجينيرينگ» ج ش س - ميناعا قارسى MRAP ۇلگىسى بويىنشا بروندالعان دوڭگەلەكتى كولىكتەردى شىعاراتىن العاشقى ورتالىق ازيالىق زاۋىت. 2016-جىلى جەلتوقساندا زاۋىت «ارلان» بروندالعان كولىكتەرىن قازاقستاندىق اسكەرگە جەتكىزۋ بويىنشا كەلىسىمشارتتى تولىق ورىنداپ شىقتى.

«ك ا ە» ج ش س تۇندە كورەتىن قۇرىلعىلاردى، تەپلوۆيزورلىق كوزدەۋىشتەردى، ەلەكتروندىق پلاتالار مەن وپتيكالىق لينزالاردى شىعارادى. ونىڭ ونىمدەرى بۇگىندە قارۋلى كۇشتەردىڭ ءتۇرلى جاساقتارىندا كەڭىنەن قولدانىلۋدا.

جاسۇلان جولدىبايەۆ