قازاقستان ستۋدەنتتەرى قىتايدا جانۋارلارعا وتا جاسادى

وسكەمەن. قازاقپارات - ءبىر اي بويى قىتايدا مال دارىگەرلىگى بويىنشا وندىرىستىك تاجىريبەدەن وتكەن شىعىسقازاقستاندىق ستۋدەنتتەر ەلگە ورالدى، دەپ حابارلايدى «قازاقپارات» ح ا ا ءتىلشىسى.

«ءبىزدىڭ جەتى ستۋدەنتىمىز باقىت ايتبايەۆانىڭ جەتەكشىلىگىمەن سانجى قالاسىندا بىلىمدەرىن شىڭداپ كەلدى» ، - دەيدى زايسان تەحنولوگيالىق كوللەدجىنىڭ ديرەكتورى ەرىك سەيىلحانوۆ.

 ش ق و اكىمدىگى باسپا ءسوز قىزمەتىنىڭ حابارلاۋىنشا، قىتايدا وقىتۋ وتكەن جىلى شىعىس قازاقستان وبلىسى باسشىلىعى مەن قىتاي حالىق رەسپۋبليكاسىنىڭ شىڭجاڭ- ۇيعىر اۆتونوميالىق ولكەسى اراسىندا جاسالعان مەموراندۋم اياسىندا وتكىزىلدى. وسى كەلىسىمنىڭ ارقاسىندا زايسان تەحنولوگيالىق كوللەدجى مەن شىڭجاڭ اگرارلىق كاسىبي- تەحنيكالىق ينستيتۋتى اراسىندا جاقسى بايلانىس ورنادى. قىتايلىق ارىپتەستەر شىعىس قازاقستاننان كەلگەن ستۋدەنتتەردى جوعارى وقۋ ورنىنىڭ ەرەجەلەرى جانە قاۋىپسىزدىك تەحنيكالارىمەن تانىستىرىپ، وقۋ كورپۋسى، مۋلتيمەديا جانە لينگافون كابينەتتەرىن ارالاتتى.

«تاجىريبە 60 ساعاتتان ارتىق جاسالدى، - دەيدى باقىت ايتبايەۆا. - ينستيتۋتتىڭ زەرتتەۋ- تاجىريبەلىك ورتالىعى ەڭ سوڭعى ۇلگىدەگى تەحنيكالارمەن: مەديتسينالىق ءدارى- دارمەكتەر، حيرۋرگيالىق وتالارعا ارنالعان قۇرالدار، رەنتگەن جانە ۋدز اپپاراتتارىمەن جابدىقتالعان» . تاجىريبەدەن ءوتۋشى ستۋدەنتتەر قىتاي فارموكولوگياسىنىڭ ەرەكشەلىكتەرىمەن تانىسىپ، اۋرۋ جانۋارلارعا دياگنوز قويدى جانە ولارعا وتا دا جاسادى.