الماتى وبلىسىندا «ءبارى دە راحمەت ءۇشىن!» دۇكەنى اشىلدى
الەۋمەتتىك ماڭىزى بار جوبانى اۋداندىق ىسكەر ايەلدەر كەڭەسىنىڭ ءتورايىمى كۇلسارا امرەيەۆا جۇزەگە اسىردى. قازىردىڭ وزىندە «ايگەرىم» ءدامحاناسىنىڭ ىشىندە ورنالاسقان دۇكەنگە 1000 عا جۋىق جاڭا زات جينالدى.
وندا الەۋمەتتىك جاعدايى تومەن ازاماتتار قاجەتتى زاتتاردى تەگىن الا الادى. سونداي-اق، جوبانى اۋداندىق كاسىپكەرلەر پالاتاسىنىڭ فيليالى، اكىمدىك پەن تۇرعىندار قىزۋ قولدادى. قايىرىمدى جانداردىڭ اكەلگەن زاتتارىن قابىلداۋ مەن كەلۋشىلەرگە قىزمەت كورسەتۋ ءۇشىن الەۋمەتتىك باعدارلامالار مەن جۇمىسپەن قامتۋ ءبولىمىنىڭ باعىتى بويىنشا دۇكەنگە ءبىر قىزمەتكەر جۇمىسقا الىندى.
«بۇگىنگى تاڭدا قوعامدا قارجىلىق جانە رۋحاني قولداۋعا ءزارۋ جاندار وتە كوپ. ءبىز بيزنەس وكىلدەرى ادامعا قيىن ساتتە كومەك قولىن سوزۋدىڭ ماڭىزدىلىعىن جاقسى بىلەمىز. دۇكەندەگى زاتتار از قامتىلعان، كوپبالالى جانۇيالاردىڭ قاجەتىنە جارايدى دەگەن ويدامىن»، - دەدى كۇلسارا امرەيەۆا.
ايتا كەتەيىك، اۋداندا اشىلعان «ءبارى دە راحمەت ءۇشىن!» دۇكەنى الماتى وبلىسى كاسىپكەرلەر پالاتاسى جانىنداعى ىسكەر ايەلدەر كەڭەسىنىڭ ەكىنشى جوباسى. وسىعان دەيىن الەۋمەتتىك دۇكەن تالدىقورعان قالاسىندا اشىلعان بولاتىن.
اۆتور: سامال قابىشەۆ