ۇلان رىسقۇل: ءىنىم ەكەۋمىز فينالدا جولىقساق، توسىن جاڭالىق كۇتىڭىزدەر
بيىلعى باس جۇلدەدەن ۇمىتكەرلەردىڭ ءبىرى، جارىستىڭ كۇمىس جانە قولا جۇلدەگەرى، تۇڭعىش «قازاقستان بارىسى» ۇلان رىسقۇلمەن سۇحباتتاسىپ قايتقان ەدىك.
- ۇلان ءسىزدى حالىق تۇڭعىش «قازاقستان بارىسى» رەتىندە جاقسى تانيدى. ءبىراق سول العاشقى جەڭىسىڭىزدەن كەيىن ءسىزدى جانكۇيەرلەرىڭىز جەڭىس تۇعىرىنان كورمەي كەتتى. نەگە؟
- سپورتتىڭ ءوزى جەڭىس پەن جەڭىلىستەن تۇرماي ما؟! بىردە باعىڭ شاپقانمەن بىردە بابىڭ شاپپاي قالادى. كەيدە ويلاماعان جەردەن ساتسىزدىككە جول بەرەسىڭ. ءيا، العاشقى جىلى جۇلدىزىم وڭىنان تۋدى. كەلەسى جىلى جۇلدەگە ىلىگە المادىم. ودان كەيىنگى جىلى جاراقاتىما بايلانىستى قاتىسا المادىم. ودان كەيىنگى جارىستاردا ءبىر جىلى ەرجان شىنكەيەۆكە جول بەرسەم، ءبىر جىلى بەيبىت ىستىبايەۆقا ۇتىلدىم.
- ەندى بيىل سول ولقىلىقتاردىڭ ورنى تولا ما؟
- سول ءۇشىن جاتتىعۋ جاساپ جاتىرمىن. ەندى ءبىر مارتە «باس بەلدىككە» قول جەتكىزىپ جاتسام ول جامان با؟! بۇيىرتقانىن كورەمىز عوي.
- باستى قارسىلاستارىڭىزدى اتاپ وتسەڭىز...
- «قازاقستان بارىسىنا» ءالسىز بالۋاندار كەلەدى دەپ ويلامايمىن. ءبىر وبلىستان ىرىكتەلگەن ەڭ مىقتى ەكى بالۋان كەلەدى. ولار دا ءوزىمىز سياقتى «جەڭسەم، ۇتسام» دەگەن ماقساتپەن، جىگەرمەن كەلەدى. سوندىقتان قاي بالۋانمەن جولىم تۇيىسسە دە وڭاي قارسىلاس جوق. ونىڭ ۇستىنە وزدەرىڭىز دە بايقاپ جۇرگەن بولارسىزدار، سوڭعى جىلدارى جاس بالۋانداردان نەبىر مىقتىلار شىعىپ جاتىر. بۇل قازاق كۇرەسىنىڭ جوعارى قارقىنمەن دامىپ كەلە جاتقانىن بىلدىرەدى. ءوز باسىم بيىل ۇزدىك ۇشتىكتەن كورىنسەم دە جامان بولماس ەدى دەپ ويلاپ ءجۇرمىن.
- كەشە ءىنىڭىز رۋسلاننان دا سۇحبات الىپ ەدىك. «اعاڭمەن جولىعىپ قالساڭ قايتەر ەدىڭىز» دەگەن سۇراقتى قويعانبىز. وسى سۇراقتى سىزگە دە قويساق...
- قيىن سۇراق ەكەن. ەگەر جولىعىپ جاتساق، ءبىر ءجونىن كەلتىرەرمىز.
- ءوزىڭىز العاش «بارىس» اتانعان جىلى ءىنىڭىز سىزگە جول بەردى. مۇمكىن بيىل ءىنىڭىز ەكەۋىڭىز فينالدا جولىعىپ جاتساڭىزدار ءسىز وعان جول بەرەرسىز؟
- سوڭعى ەكى بالۋان قالعانشا جولىمىز تۇيىسپەسە كەرەمەت بولار ەدى. ال فينالدا جولىعىپ جاتساق، وندا توسىن جاڭالىق كۇتىڭىزدەر. ءبىرىمىز الماتى قالاسىنان، ەندى ءبىرىمىز الماتى وبلىسىنان شىعىپ جاتقاننان كەيىن ەكەۋمىزدىڭ دە ارتىمىزدا ءۇمىت كۇتكەن ەل بار ەكەنىن جاقسى بىلەمىز. ەگەر ءبىر قالانىڭ نە ءبىر وبلىستىڭ اتىنان سىنعا تۇسكەندە ءبىر-بىرىمىزگە ويلانباي جول بەرەر ەدىك.
- اڭگىمەڭىزگە راحمەت!
ايتا كەتەيىك، كەشە ۇلان رىسقۇلدىڭ تۋعان ءىنىسى رۋسلان ءابدىرازاقوۆتان سۇحباتىمىزدى وقىرمان نازارىنا ۇسىنعان ەدىك. وندا ول «اعاڭ ەكەۋىڭ بيىلعى دودادا جولدارىڭ ءتۇيىسىپ قالسا نە ىستەر ەدىڭىز؟» دەگەن سۇراعىمىزعا فينالعا دەيىن جولدارى تۇيىسپەۋىن اللادان تىلەپ جۇرگەنىن ايتا كەلىپ، «بۇل تۋرنير جالاۋىن جەلبىرەتكەن العاشقى جىلى ۇلان ماعان قاراعاندا بابىندا بولدى. ونىڭ ۇستىنە، قازاقى تاربيە الىپ وسكەندىكتەن، اعامنىڭ جولى ۇلكەن ەكەنىن ءتۇسىندىم. سوندىقتان، وعان جولىمدى بەردىم. فينالدا جولىعىپ جاتساق، مەنىڭ ءوز تۇسىندا جاساعان ىنىلىك قۇرمەتىمدى بۇل جولى اعالىق ىزەتىمەن قايتاراتىن شىعار دەپ ويلاپ قويامىن»، - دەپ ىنىلىك كوڭىلىن بىلدىرگەن ەدى.
اۆتور: كۇنسۇلتان وتارباي