قىتاي جىگىتى مەن قازاقستاندىق قىزدىڭ ماحابباتى جەلىنى دۇرلىكتىردى - ۆيدەو

استانا. قازاقپارات - قىتايلىق «شينحۋا» اقپاراتتىق اگەنتتىگى قازاقستاندىق قىز بەن قىتاي جىگىتىنىڭ ماحاببات حيكاياسى تۋراسىندا بەينەروليك تۇسىرگەن ەكەن.

بۇل جايىندا قىتاي پرەزيدەنتى شي جينپيڭ ايتتى دەپ حابارلايدى Qamshy.kz.

پرەزيدەنتتىڭ سوزدەرىنە قاراعاندا، قىتاي جىگىتى مەن قازاقستاندىق قىزدىڭ ماحابباتىن كورسەتۋ ارقىلى ەكى ەلدىڭ ىنتىماقتاستىعىن كورسەتپەك بولعان.

بەينەروليكتەگى وقيعا جەلىسى مىناداي: شىنجاڭدىق جاس قىتاي جىگىتى جەرگىلىكتى اۋرۋحانادا ۆالەنتينا ەسىمدى ارۋدى كوزى شالىپ، عاشىق بولىپ قالادى. اقىرى ەكەۋى باس قوسىپ، دۇنيەگە ۇلدارى كەلەدى. ۇلدارى 6 جاسقا تولعاندا ۆالەنتينا ساياسي جاعدايلارعا بايلانىستى ەلىنە قايتۋعا ءماجبۇر بولادى. ۇلدارى ەر جەتىپ، ءوز اناسىن ىزدەي باستايدى. تەك 2009-جىلى ۇلى 61 جاسقا كەلگەندە 80 جاستاعى اناسىن الماتىدان تابادى. ءسويتىپ ۆالەنتينانى قىتايعا اپارىپ، اسپان استى ەلىنىڭ جايلىلىعىن كورسەتەدى.

«بىرنەشە جىلداردان كەيىن باقىتقا كەنەلگەن بۇل وتباسىنىڭ تاعدىرى - قازاقستان مەن قىتاي تۇرعىندارى اراسىنداعى اجىراماس دوستىقتىڭ كورىنىسى»، - دەپ ايتتى بەينەروليك جايىندا قىتاي پرەزيدەنتى.

ەسكە سالا كەتەيىك، قاڭتار ايىنداعى قازاقستاندىق قىزدارعا قىتاي دوكەيلەرىنە تۇرمىسقا شىعۋدى ۇسىنعان حابارلاندىرۋ الەۋمەتتىك جەلىلەردى ءدۇر سىلكىندىرگەن بولاتىن.

Facebook الەۋمەتتىك جەلىسىندەگى «دوسكا وبياۆلەني الماتى، استانا» پابليگىندە مىناداي مازمۇنداعى حابارلاما جاريالانعان: «18-40 جاس ارالىعىنداعى باسى بوس قىزدار! بەيجىڭ تۇرعىنى، ءارى بويداق ەر جىگىتكە تۇرمىسقا شىققىڭىز كەلە مە؟ بىزگە حابارلاسىڭىز. بەيجىڭدەگى دوكەي جىگىتتەر توبى استاناعا وتباسىن قۇرۋ ءۇشىن كەلە جاتىر. ارنايى بىرنەشە شارالار دايىنداپ جاتىر. ەر ادامدار باقۋاتتى ءومىر سۇرەدى، ەۋروپالىق ءبىلىمى بار، اعىلشىن، ورىس تىلدەرىن جەتىك مەڭگەرگەن».

مۇنداي اقپاراتقا قازاق حالقى نارازىلىعىن ءبىلدىرىپ، ءتۇرلى پىكىرلەرىن قالدىرعان. وسى جارناماعا بايلانىستى قازاقستانداعى ق ح ر ەلشىسى چجان حانحۋەي دە مالىمدەمە جاساعان ەدى. اتالمىش ۇيىمنىڭ بار-جوعىنان حابارى جوق ەلشى قازاقستاندىق قىزدارعا قىتاي جىگىتتەرى قاتتى قىزىعاتىنى جايىندا ايتىپ قالعان.